Khuangcawinak

Khuangcawi

 

Laimi nih sunparnak an tuahmi vialte lakah khuang a cawi khomi cu upat an co hlei khun. Khuang an cawi ningcang cu bawite an bawi i tiphul thlacamnak an tuahning he aa khat. A hmasabik ah sia kikawng an thah lai. Cucu siapichunh ti a si. Cu in sa-khua-thum-that nih a hun zulh i, sa phunthum, siatum, vok, arhli rang thah a si. Siapichunh caah siatum kikawng an thahmi sa cu an kawhmi hna nih ei a si i, a cheu cu khua ah hmaizah upat deuh mi hleh an si. Sia an thah hnu ah vok le ar an thahmi cu khuangcawi pa inn lawngah ei a si. Hi sa an thah chung karlak cu, khuang a cawi ding mi nih ruak suannak inn le ruak humhnak, nupi thitnak hmun ah a kal lai lo. Khuangcawi pa nih khuang-cawi hram aa thawk in khuangcawi ni tiang cu, mah kum i a vui mi fang/ facang a ei lai lo; a ni kum ta lawng a ei lai.

Thlathum chungah khuangcawi cu domh a si. A nikhatnak ni ah an thah i, a thaizan ah zohchunhnak ah siala thah a si. A nithumnak ah zu an dah, sareu (sahreo) caah vok an thah. Cu ni a thaizing ahcun thlacam tiphulnak caah naa tum le sia, a zanlei ah khuangtum caah vok thah a si i, sa dang zong thah chih an si. Sa dang an thahmi ah a tlawmbik sa 5 in a tambik sa 10 tiang thah ding a si. A ninganak ni cu, sa can le sa phawt rian an fialmi hna nih inn tang loin sa an thah mi a sa cu khuami an zamh cio dih hna. Cucu tlangzam ti a si.

A niruk ni ah, khuangcawi pa i a nupi `ta nih khuang an cawinak ding hmunhma a remhpiak hna lai; rua in a tungruang sermi khuang a serpiak hna lai i cu khuang cun nu cu voikua tiang an cawi lai.

A thaizing a ni sarihnak cu khuangcawi (nipi) ni a si. Khuangcawi pa nih khuang a cawipi mi a nupi cu a ngeih hlawn thilthuam tling he aa thuam lai i, a `ta nih a tikhawh ahcun a sam a phiar piak lai. Aa `tamh aa serh dih hnu in khuang cungah a kai lai i, mah khuang cun khuangcawi a zawhmi hna nih khuang cung i a `thumi a nupi cu an cawipah in cun voi 9 tiang thuipah thliah-mah bu tein cunglei ah an hlerh lai.

Khuang cung i an cawipah in cun tangka le thildang an ngeihmi cu mi lakah a vorh hna lai. A vorhmi thil cu ngakchia rual nih i cuh/char a si. A vapa nih khuangcawinak caah a pekmi thil dang manngei deuh (dar umpi tbk) tu cu a nupi nau nu le i laak a si.

Cu khuangcawi a thaizing cu mar le thor laam an laam lai. Laam ah an sawm mi hna Lushais asiloah Thor unau nih an laampiak hna lai. A kiptuh-thai holh cu rem ni ti a si i, laam an sawmmi hna caah sathah piak a si. Cu nih a hun zulhthan mi cu bawikil ti a si i, bawite bawi bantuk in siapi le vok le arhli thah a si ve nain, ni 50 chung karlak ah thahdah a si.

Khuang voihnih an cawi hnuah lawngtuk tuah a si. Hi lawngtuknak an tuah ahcun lawng cu a tuahtu pa a rualchan cingla le midang nih ramlak ah laak piak a si. A tuahtu pa nih ukmi khua a ngeih hna ahcun, cu khua a ukmi hna nih lawng caah a herh mi thing thluan put piak a si.

Ramlak in thingthluan a put piaktu cu Hakha khuami an si ahcun, sia no pakhat a pek hna lai i, a dang tein sia siakhat le vok sumhnga in rawl a dangh hna lai. Fang zong a pek cio hna lai. Khuangcawitu pa nih an dihlak in a pek khawh hna hlan chung cu khuami mizei aho hmanh nih a pikpak in an ei lai lo. Lawng cu khuang a cawimi nih hmelchunhnak ah an inn hmai tual i tungchon in bunh mi thingphel thluan an `tial`tamh mi a si.

Hi ca hi CHIN TLANGAU chung i kan lakmi asi.

Add new comment

6 + 2 =