Mithiang Cecilia

November 22

ST. CECILIA (zabu 2)

(Nungakthiang le Martyr)

            Ring-on thiamsang hna kha a bawmh i a zohkhenhtu Mithiang Cecilia cu Rome khua ummi upat awktlak chungkhar in kum zabu (2) ah a chuak. Nungak thiang sinak in a nunchung um dingah bia aa kam nain a nu le a pa nih hramhram in an fial ruangah upattlak mi Valerian he an i um. `Thitumhnak puai an tuahliopi ah Cecilia cu a dang tein a `thu i a lung chungin Pathian kha thang`thatnak hla a sa. Curuang zongah cun a hnuah hlasak ringon fimthiam hna mithiang tiah thanhnak a hmuh. A khaan chungah an i din tikah Cecilia cu Valerian kha a lung a thlenter i nuva sinak kha i sum dingin an hna a tla. Valerian tipilnak a in hnuah, Vanmi pakhat cu Cecilia pawngah a dir i hninsipar le lilypar in thilmi luchin kha Cecilia lu cungah a chinh lio kha a hmuh.

            Cecilia cu a vapa i a naupa Tiburtius zong kha a lung a thlenter. 192 kumah Commodus nih Bupi kha a hrem tikah annih unau pahnih hna zong Pagus Triopius an timi Rome khua in kilometer tlawmpal aa hlatnak hmunah a biathiang caah thihnak an rak ing ve. Siangpahrang Prefect Almachius hmai bakah a zumhnak a hmaannak kong kha fektein a chim dih hnuah a hngawng ah voithumbak tuknak a ing i thidengin an rak chiahtak. A ruak cu St. Carlistus i vawleitang thlan chungah an rak vui i a hnuah Trastivere i St. Cecilia Biakinn ah an rak `thial. 1599 kum ah Cecilia a ruak cu a thut in zeihmanh rawknak umlo in amah ningin a um kha an hmuh