Mithiang Francis Xavier

St. Francis Xavier

December 3

ST. FRANCIS XAVIER (SIANGBAWI)

(1506-1552)

            Ramdang ah mission rian`tuan mi hna zohkhenhtu St. Francis Xavier cu 1506 kum, Spain ram, Pamploma khua ah a chuak. Francis Xavier cu France ram Paris khua ah fimnak a cawn lioah Loyola khua in mithiang St. Ignatius i a hnuzul (asinum) pa (7) hna chungin pakhat a sive. Siangbawi cannak a lak hnu kum (4) a rauh, 1541 kum ah Francis Xavier cu India ram ah phungchim dingin an thlah. Tilam in thla (13) an rauh hnuah Portugal Coloni uk a simi Goa khua ah phungchim hram a thawk i cu khuachung i minung hna kha dinnak le eihmuarnak in a khamh hna. Abikin rianngeitu bawi a cheuhna nih a inkhawhlo tiangin an rak tuah hna. Thla (5) a rauh hnuah amah cu Pearl Fishery Pale ngatlaihnak rian ah a `tuan i rilikam Pearl Fishery Coast i Paravas miphun hna sinah thathawh ngaiin phung a chim caah mi tamdeuh nih tipil ing kan duh tiah an hal. Brahman miphun hna kha thla (12) khengte phung a chim nain zumtu Khrihfa pakhat lawng a hmu mi Francis Xavier cu sunghnak kha zeitindah ka doh lai i ka cohlan lai ti zong `tha tein a hngalh.

            1549 kum ah Francis Xavier cu Japan ah a kal i pakhatnak Japan phan phungchimtu a rak si. Sifah inkhawhnak aa zuam i sifah tein um cu Japan ah santlaihnak a um lo ti kha a hmuh tikah thianghlim tein aa hrukaih i khi hmun i nawlngeitu bawi hna hmaiah Portugal ram kuzale pakhat ka si tiah a ti hna. Nawlngeitu bawi hna kha laksawng caah ringonkuang pakhat, cabuai cung chiahmi nazi pakhat le mithman tuahkhat laksawngah a pek tik hna lawngah phungchimnak nawl le mission rian`tuannak nawl a hmuh. Francis Xavier i hmuhning ahcun “Pathian a zum lomi minung hna lakah Japan miphun tluk a lungthin a `thami hi kawl zongah hmuhkhawh a si lai lo” tiah a rak ti. Tuandeuh i teinak a hmuh mi nih cuka i hruaitu hna kha thinphang le lunghrinnak a ngeihter caah lamkaltu rian`tuannak in an thlauh. Cuhnuah Tuluk ramah phungchim dingin a lung aa thlen. Asinain Hongkong pawng i a ummi Sancian tikulh a phak tikah a zaw i cu tikulh ahcun 1552 kum ah Bawipa Jesuh min kha a kaa in chim buin a thi.

Add new comment

4 + 3 =