Mother Angelica (1923–2016)

Mother Angelica (1923–2016)

Rita Antoinette Rizzo (Mother Angelica) cu John Rizzo le Mae Helen Gianfrancesco hna i fanu dawt a si. Amah cu April 20, 1923 kum ah Ohio peng,  Canton khua ah a rak chuak. Kum 6 a si ah a nu le a pa an rak i then i Rita cu a nu he an rak um ti. August 15, 1944, Ohio peng, Cleveland khua um Franciscan Sister (Poor Clares) sianginn ah a rak lut i  Sister Mary Angelica of the Annunciation timi min aa rak lak.

Mother Angelica cu 1973 kum in Catholic cauk hna le capar chuah mi te te in zumhnak a karh khawhnak hnga ding caah tiin rian tuan hram a rak thawk. Simhamhsehlaw aa rak i tinh mi thil a rak i ruah chan mi bang in a si taktak kho lo. Cu tikah TV an thlahnak hmun ah a va kal i August 15, 1981 ni thawk in "Eternal Word Television Network (EWTN)" timi cu a rak dirh. Nikhat ah suimilam 4 chung, inn 60,000 hna sinah an rak thlah piak hna( EWTN hi Pathian sinin thlarau thazang lak nak ca lawngah thlah mi a si). Kum hnih a tlin hlan ah inn 1 million tluk nih an rak zoh khawh cang. 1987 kum ah cun suimilam 24  chung mi zapi sinah an rak thlah piak khawh cang hna.

Nihin ni ah minung 160 million nih ram 140 in EWTN satellite, TV le radio an zoh cang. EWTN (online zongin an thlah) cu catholic bupi thlahmi network vialte lak ah a nganbik mi network pakhat a si. Mother Angelica zong hi EWTN thawng-thlah rian tuan nak ah hin hmun tam ngaiin a rak i tel leng mang ve.

1946 kum ah Mother Angelica cu ruah lo pi in i khawn dennak a rak ton caah dam lo ngai in a rak um mi a rak si. January 28, 1998 kum ah a rak theih ballo mi Italian nu pakhat he thla an rak cam tti i cu lio ah cun khuarauhhar ngai in a rak ton mi hma vialte in damnak a rak hmu. 

Mother Angelica cu 2001 kum ah cawlcangh khawhlo (lephiat dam lonak) a rak tong i biachim kho loin a rak um. Cu bantuk thil sining a rak ton hlaan deuh kum ah network tawlrel tu dingah lenglei mi Catholic zumtu hna sinah a rak ap ta manh hna. Cun March 27, 2016 kum ah cu zawtnak in a thi. Thong tampi nih a rauk an humh i EWTN channel in million tampi nih an rak zoh ve.