St. John of Capistrano

October 23

ST. JOHN OF CAPISTRANO

Capistrano khuami Mithiang John, Siangbawi (1386-1456)

            Franciscan phu in minthang phungchimtu St. John cu Italy ram Capistrano khua ah, 1386 kum ah a chuak. Upadi fimnak leiah paraku degree a lak hnuah Perugia peng uktu bawi ah riankhinh a rak si. Cupeng ah a rum ngaimi muidawh nu pakhat he an i `thit um.

            Kum 1416 ah a rak thomi Perugia le Maltesles Pine karlak raldoh lioah an tlaih i thong an rak thlak. Cu hnuah a nupi he an i `then (phungning in) i Franciscan Phu i chungtel pakhat a rak cang. A luancia mi a nunnak kha i remh`than khawhnak caah Perugia peng chungah a sualnak vialte kha hngawng-oih in rang fate pakhat aa cit i a vak. Sal bantuk tuahsernak in Friar Miner peng Siangbawi caannak Sianginn ah luh ding in a sawk ve. Culioah amah cu kum 30 asi cang nain voikhatnak Bawipa thisa hmanh a rak hmu rih lo.

            Cu Sianginn uktu nih John i kawh-auhnak a dinfel le thianghlimnak kha cekhlatnak caah a harbikmi hneksaknak kha a rak tuah. Cuthil hna kha zumhnak le toidornak in a rak ing. Kum 1420 ah Siangbawi cannak a rak hmuh. Cu hnuah Pathian phungchim hram a rak thawk i Italy, Germany, Hungary ram chungkip ah teinak nganpi a rak hmuh.

            Kum 1456 ah Pope nih a hleice `tuanvo peknak in Turky miphun hna he ral aa do liomi Crusade ralkap hna sinah a kal i phung a va chimh hna. Turky miphun hna cu Belgrate khua kha an kulh dih i Europe ram vialte kha an tuk laite a si. John cu minung (70,000) lawng a simi Crusade ralkap hna kha an sunghnak in teinak ah a rak hruai hna. Thlathum a rauh hnuah vanchiatin chawnhmi zawtnak `thalo nih a tlunh ve i a rak thi.