Jesuh Thlaici Tthabik

Rev.Fr.Pius Kei Lian Cung

Jesuh Khrih Thlaici tthabik

Nihin kan relmi kan Bible nih Pathian pennak kong a kancawnpiak. Kan pawngkam kan zoh tikah sattil/ saram, thingkung, pangpar, inn le lo tampi an um i minung hi saram he kan i dannak bik hi khoika zawn ah dah a si hnga tiah kan zoh a si ahcun tampi a um ko lai. A sinain minung le saram/sattil he kan i dannak bik pakhat te a langhnak cu minung cu bia kan chim kho, Kan i chawn kho. Kan lung lawmhnak kan i hrawm kho, kan ngeihchiatnak kan i hrawm kho. Bia kan i ruah khawhmi hi saram nakin Pathian thluachuah a hlei in kan conak hi a si. Hi bantuk in pakhat le pakhat kan i chawnhbiak khawhnak a ruang cu zeidah a si tiah cun kan biakmi kan Pathian, a kan sertu kan Pathian a mah hrimhrim hi bia a chimmi Pathian a si. Bia a chimmi Pathian kan ngeih hih! Rome chan lio ah siseh, Jesuh Khrih a raknun lio ah siseh, a tuchan zong ah an um ko lai, mi tampi nih bia a chim lo mi pathian a bia mi tampi an um. Sihmanhsehlaw kan biakmi kan Pathian cu vawlei a ser le cangka bia a chim i nihin ni tiang bia a chimmi Pathian a si mi hi lunglawmh awk tak tak a si. Pathian nih Adam le Eve sinah bia chim hram a rak i thawk i Abraham te chungkhar hna siseh, Moses sinah siseh vawlei tuanbia vialte ah bia a  chim zungzaltu Pathian a si. Cun caan a vun tlin tikah, bia a khiahmi a vun tlin tikah a mah i a biakam a si mi a Fapa Jesuh Khrih hrimhrim kha kan sinah a rak thlah tikah kan sin bak ah kan hna hrimhrim in theih khawh ding in bia a kan chimtu Pathian tthiamtthiam a si. Cu a si caah vawlei hram thawk in a kan chawn zungzal tu, bia a kan ruah zungzal tu Pathian aw hi zeizat dah kan theih hngalh?

Thawngttha kan vun rel tikah a donghnak ah zei kan ti tawn? “Pathian Bia a si” kan ti . Kan zapi nih “Pathian kan i lawm” tiah kan ti. Bia a kan chimhmi, an vun relmi kan vun theih set lo ah cun a zei tu kha kan i lawm? Mah ruangah Bible kan rel i a donghnak i Pathian Bia a si ti mi zawnte i Pathian kan i lawm kan ti taktak ahcun Pathian bia an rel mi kha kan lungthin dihlak tein ngai i lunglawmmi bia taktak kha si seh. A zei an rel an chimmi theih huaha lo, ngai huaha lo in Pathian kan i lawm kan ti mi khi zei hmanh sullam a ngei lo. Kan nu kan pa nih an kan chimhhrin an kan cawnpiak tikah na ka chimhrin, na ka cawnpiak caah ka lawm tiah kan kan vun ti tikah an chimmi an bia kha ttha tein kan ngai tik lawngah lunglawmh awk a si le lunglawmh awk, ngeihchiat awk a si le ngeihchiat awk, an chimmi an bia kha ttha tein ngai ding kha a bia pi mi a si. A bia kan theihmi cungah khan Pathian kan i lawm ti kha kan lungthin takin rak chim cio u sih. Bia a chim pengmi kan Pathian a si bantukin atu kan chan tiang zong ah a Bible Cathiang in siseh, a Bupi cawnpiaknak in siseh, kan Pathian nih bia a kan chimh len ko. Thawngttha a phuangmi hna sin in kan sinah bia a chim ko. Kan nu le kan pa, kan saya/ sayamah tehna, kan pawngkam kan minung hawi hna sin in kan Pathian nih bia a kan chimh lengmang ko. Hlan lio in profet ngan pipi a rak petu Pathian, siangpahrang tthattha a rak petu Pathian a si bantuk in a tu kan chan zongah hruaitu tthattha, cawnpiaktu tthattha a kan pek lengmang ko. Pathian nih kan sinah biachim hi a ngol bal lo.

          Cun Jesuh Khrih hrimhrim kha ‘Bia cu minung ah a cang’ ti i John Thawngttha chung i a kan chimh bantukin Jesuh Khrih cu a bia zong in bia a chim i, a nun zia hrimhrim zong in Bia a si. Pathian Bia a sining kha phunhnih a si. A kan cawnpiaknak in Pathian bia kha a kan chimh hrin i, a nunning hrimhrim, a ruangpum hrimhrim kha Pathian Bia a si. Jesuh Khrih kan cohlan mi le Jesuh Khrih kan ngeihmi te kha Pathian Bia kan sin i a ratnak cu a si. Thlaici ttha Jesuh Khrih kan sin i a ratnak te kha si. Pathian bianung kan cohlan mi kha kan chungah thlaici ttha tuh a si cang. Minung nih thlaici kan cin tikah, a theipar ttha seh, a vui rah tam seh ti kan duh tikah thlaici kha a ttha deuhdeuh in kan thim. Vawleicungah minung nih thil ttha kan ti mi hi tampi a um ko lai. Thil ttha tampi lak i a ttha cem cu Pathian i Bia Jesuh tthiamtthiam a si ko. Mah ruangah thlaici ttha lakah thlaici tthabik Jesuh Khrih pek kan si mi hi lunglawmh awk ngaingai a si. Thlaici kan va tuh tikah, thlaici tthat lawng hi a za lo i thlaici kan tuhnak vawlei hmunhma le tuahsernak a si mi nawn te hna, timhlamhnak tam pi a herh ve. Vawlei tthatnak le nawn ttha tein kan pekmi vawilei i a kheu mi thlaici cu a tthan a fawi i a theipar a tampi. Cu ve bantukin Jesuh Khrih kan sin i a rat i theipar a ngeih khawhnak ding caah kan lungthin le kan thlarau hi ni fatin kan nunnak ah timhtuahnak ngei zungzal u sih. Zarhpini caan lawngah timhtuahnak ngeih ding a si lo. Nifatin kan nunnak ah Jesuh Khrih he hawikomhnak caah timhtuah i kan lungthin innkaa kan hun piak tikah thlaici ttha Jesuh Khrih a mah hrimhrim kha kan sin ah a ra i thei ttha a tlai kho lai. Vawlei ttha le thlaici ttha an i ton tikah a theipar tampi le vui tthattha tampi ah an i chuah kho. Pathian Bia Thlaici Thiang kan sin i a rat tikah a karhter chintu kan si ah cun lei thluachuah le van thluachuah a co tu kan si lai. A tawinak i kan chim ahcun Thliaci ttha bik a si mi Kan Bawipa Jesuh Khrih vawlei cung i a rat tikah hin kan vawlei ah hintah khoika hmunhma te kha hmunhma tthatnak bik cu a si? A tawinak in kan chim ahcun Nu Mary i ruang, Nu Mary pum hrimhrim kha pei vawlei ahhin hmunhma tthatnak bik cu a si cu. Vawlei tthatnak bik ah a ra i a theipar tam pi a karh mi cu Jesuh Khrih a si. Jesuh Khrih a thi i a thawhtthannak kha theipar tam pi a tlai nak le a karhnak cu a si. A nun chung vialte i a hmuhmi sunparnak le lianhngannak vialte nak in a thawhtthannak kha theipar ttha bik a si nak cu a si. A thawhtthannak thawng in kan sualnak vialte a thah dih, a ttawl dih i nunnak a kan pek. Nihin ah kan Bawipa Jesuh Khrih cu Thlaici a si i, thlaici vorhtu zong a si i a bia in siseh, a nunning in siseh, a karhchin lengmangtu a si bantukin kan nih zong nih kan co mi thlaici kha a theipar tampi tlai ter in mikip sinah thlaici ttha a vorhtu le a petu si kho i zuam u sih. Donghnak ah Isiah Bible cathiang chungin donghter u sih. “Ka Bia cu van in a rung tla mi ruah le hawrha bantuk a si lai. Ruah le hawrha nih cun van ah kir tthan ti loin vawlei kha a hnawn ter i thlaici kha a khoh ter i, a tthan ter i thlaici tuhtu kha thlaici a pek hna i rawl eitu kha rawl a pek hna. Cubantuk cun ka kaa i a chuakmi Bia cu a si ve lai. Ka sin ah a lawng in a ra kir tthan lai lo. Tuah seh tiah a fial mi kha  a tlolh lai lo i ka thlah hnawhchan mi thil ah khan a tlam a tling lai”. Pathian nih ruahti le dapti(hawrha) hmanh a sin ah tthatnak pe lo i kir tthan lo ding in bia a kan kamh. Ruahti le dapti nak in man tampi a ngeimi minung kan nunnak zong vawlei ah Pathian nih a kan thlahnak chan tlamtling loin Pathian sinah a kir tthan dingmi pakhat hmanh kan um lo. Pathian nih a kan thlahhnawh chan mi tlamtling tein a theipar, a vui a rah he Pathian sin ah a phan dingmi lawngte kan si timi hi lunglawm tein i nun pi u sih.

Add new comment

3 + 0 =

Please wait while the page is loading