Ka kal lo a si ah cun Bawmtu Thiang Thlarau a ra lai lo (Jn 16:7).

Ka kal lo a si ah cun Bawmtu Thiang Thlarau a ra lai lo (Jn 16:7).

Kan Bawipa Jesuh Khrih vawlei cungah a riantuan a dih tik zongah, Pathian thawngttha bia chim tu hna sinah tello um ding cu a si kho hrimhrim lo. Vawlei taksa duh in kan nun ning hna hi kal tak in nunthar thlennak he kan Bawipa Pathian duhning zulh ding hi kan rian hrimhrim cu a si. Cucu Thiang Thlarau Pathian kan sin a um lawngah kan tuah khawh hnga ding mi zong a si.

Kan Bawipa vancung a kai i a kan tlenhnak langhter nak ah, Thiang Thlarau Pathian a rak thlah mi hi hmual a ngei i kan caah a tha tuk hringhran mi a si. Kan Bawipa Jesuh Khrih minung sining in a zultu hna sin a rak um lio ah zultu hna caah cun zeizong vialte a tling dih ko tiin an rak ruah. Sihmanhsehlaw, Pa Pathian sin a kir tthan lai nak caan aa naih tikah, Bawipa a zum i a bia mi vialte hna nih a Thiang Thlarau umpi nak in siseh, zumhnak in kan thinlung cio chungah Bawipa Thlarau hmun kan pek ve cio ding zong a herh taktak mi a si. Kan Bawipa Pathian kan chungah a um lawngah zumhnak tlingin Pa Pathian kha “ka Pa” tiah auh ngam khawhnak thazang kan ngei lai. Thiang Thlarau Pathian pek mi thazang thawngin zumhnak ah siseh thian-hlimnak ah siseh a kan tthanter. Satan tukforhnak kan ton caan zongah teikhawhnak thazang a kan pek.

Biakamhlun ah siseh, Biakamthar zongah siseh, Thiang Thlarau Pathian an cungah a tum i an chungah hmunhma an pek tik caan paoh ah thinlung thlennak an rak ngei hna timi kong zong hmun tampi ah kan hmuh khawh ko. Thiang Thlarau Pathian an sin a hung um tik paoh ah an nunnak dihlak in thlen an si. Prophet Samuel nih Saul sinah a chimmi cu: “Cun Bawipa thlarau cu na cungah ṭhawng ngaiin a tlung lai i nang zong an lakah na holh cukmak ve lai i midang ah naa cang lai (1 Sam 10:6)” tiah a ti. Mithiang Paul zong nih a ti ve mi cu: “Kannih caah hmai khuhnak puan kha a um ti lo caah kan dihlak in Bawipa sunparnak cu thlalang chung i kan mui a langh bang khin kan langhter; cuticun sungpar chin lengmang in amah lo chin lengmang ah thlen kan si i cucu Thlarau a simi Bawipa rianṭuannak cu a si” (2 Cor 3:18).

Hi konglam kan zoh tikah Bawipa Thlarau an sin a um tik paoh ah an nunnak dihlak in an i thleng hna timi hi fiang ngai in a langhter a si lo maw? Thiang Thlarau Pathian an sin a um tik paoh ah vawlei duhnak lawng a rak zultu hna zong nih lungthin thlennak an ngei tthan hna i van lei duhning in an nung, ttihphannak ngeih ti loin raltthatnak an ngei hna. Cu bantukin, zultu hna sinah Thiang Thlarau a rungtum lio caan zongah hlaan lio Bawipa thimmi a sal hna bangin an si ve hna lai ti cu theih khawh hrimhrim a si ko. Thiang Thlarau Pathian sinin an hmuh mi thazang nih kan Bawipa Khrih cungah an zumhnak a fehter chinchin hna i hremtu hna cung zongah zeibantuk ttihphannak hmanh an ngei ti hna lo. Cu a si caah, Khamhtu Bawipa nih vancung ka kai cu nan ca tthatnak a si a ti bantukin (Jn 16:7), vancung a kai cu Thiang Thlarau Pathian an sin a rungtum lai nak caan zong a si.

Siangbawi hna thlacamnak chungum Mithiang Cyril of Alexandria (bishop) nih Johan Thangtha (Jn 16:7) fianhternak leh mi a si.