Ruahnak ttha. . .

Ruahnak ttha. . .

Act 17:22  “Athens khuami hna! Nannih cu biaknak lei thil paohpaoh ah zuamnak lungthin a ngei ngaingaimi nan si kha ka hmuh”

Mithiang Paul le Silas nih Athens khua mi hna sin Bawipa thawngtha an phuan tikah, an rak cohlang duh hna lo. A cheu nih “Hi mihrutpa” (Act 17:18) a timi zong an rak um len. Sihmahsehlaw Mithiang Paul cu an khua chungah aa chawh i a hmuh mi thil hna in cu miphun hna sinah thawngtha aphuan tikah sual pawtnak zeihmanh chim lo in ruahnak ttha an ngeih mi in khan kan Bawipa thawngtha a rak cawnpiak hna. Bawipa thawngtha a cohlang  mi hna le a cohlang duhlo mi hna tiin an um zong kan hmuh khawh.

Nihin kan vawlei pi zongah Khrihfa cawnpiak nak a cohang mi le a cohlang duh lo mi tiin kan um len ko rih hna. Khat lei ah Khrihfa timi min hmanh a thei rih lo mi hna zong tampi an um kan hmuh khawh rih.

Nikhat cu rawl a kan chumhpiak nak coka ah cun ka lut i meh an kio lio ko mi pawngah khin ka hei thu ve.  Cu meh kio nak pawng  te ah cun kan hei but i pakhat le pakhat cu kan hei i chawn sawh ko hna.  Ka phone cu a hung ring i ka thawh tak hna i leng ka chuahtak hna. Phone ka chawnh dih cun ka angki cu kan hun hnimh  tikah meh rim nih a benhchih dih caah ka kut-ke kaa tawl than hna i ka thil cu kaa thlen tthan hna.

Mithiang Paul le a hawi le hna nih kan Bawipa Jesuh Khrih thawngtha an rak phuan lio  zongah hin  an cawnpiak hna nak a thawtnamh a thei mi hna nih an rak cohlan hna, i a lung a puam deuhmi hna le nek ngeihnak a rak ngei mi hna nih an rak cohlang duh lo.

Bawipa thawngtha, nunnak lam a kan hmuhsak tu thawngtha, a hmanmi le a dik mi ruahnak lam a kan hmuhsak tu thawngtha cohlaan ding cu mah pakhat cio thim ning in a si ko lai.

Ka angki cungah meh rim benhter ka duh lo a si ah cun meh kio lio nak coka ah va luh lo le va kal lo ding a si ko. Theih ko nabuin ka tuah mi cu keimah nih ka zun ding a si ko.

Thatnak ka cohlan, ka chungah ka um ter, ka rauhnak ah ka luhter duh a si ah cun keimah tthatnak caah a sibantuk in; ka ruahnak hna ah chitnak lawng te ka luhter, ka ruah peng a si ah cun keimah chiatnak caah a si ko lai. Chungkhar thlacam ti duh le duh lo; biaknak lei zuam duh le zuam duh lo zong  mah nawl a si ko. Pawngkam caah tthatnak a tuah tu si le si lo ding zong mah nawl a si ko. Sihmahsehlaw, i ralring hna u sih.

Cu a si caah, mithiang Paul bantukin midang nih kan soi hna hmanhseh, ruahnak ttha he Bawipa thawngtha a cohlang i a phuang kho tu si khawh i zuam zungzal hna u sih.

Add new comment

1 + 7 =