THIANG THLARAU PATHIAN SINING HNA

THIANG THLARAU PATHIAN I SINING HNA 1. ATHIANG MI ASINAK Thiang Thlarau Pathian cu thiannak dihlak he a khat lawng siloin, thiannak dihlak i hrampi zong asi. Thiang Thlarau a min cu Thiannak asi (Ps. 111:9). Amah cu thiannak Bawi (Sanctifier) asi. Lk. 1:35,46,49 ^{1. Saya Judson lehmi Kawl Bible ca tu ahcun Holy is His Name kha “Cu Pathian i a min cu upat awktlak asi” (Lk. 1:49)} tiah a leh. Lk. 1:35,46,49 ah a ṭialmi cu “Vancungmi nih cun a leh i, Thiang Thlarau kha na cungah a phan lai i Pathian Fapa ti asi lai. Mary nih aa thawh i ka lungthin nih Pathian kha a thangṭhat. Keimah a ka khamhtu Bawipa Pathian min in ka thlarau cu aa lawmh. Bawipa, a ṭhawngmi Pathian nih ka cungah khuaruah hartukin rian a ṭuan. Cu Pathian i a min a thiang. Thianhnak vialte Bawi asimi Thiang Thlarau Pathian cu a thianglo mi thil fihnung he aa komh lo. Hi ruangah Thiang Thlarau umnak hmun cu a thiang, a thiangmi thil hna, sualnak ṭhatlonak hna kha thuhphenh khawh asilo. Muihnak i hmuhkhawh lomi thil paohpaoh cu ceunak ah fiangtein an langh bantukin, Thiang Thlarau umnak hmun ah sual ṭhatlonak vialte cu thuhphenh khawh an silo. Cucaah Bawipa Jesuh nih a chimmi cu “Thiang Thlarau a rat tikah vawlei mi kha sualnak an ruahning le zeidah ading ti an ruahning le Pathian nih bia a kan ceih lai ti an ruahning i an palhnak kha fiangtein a hngalhter hna lai” (Jn. 16:8). Thiang Thlarau Pathian cu mi nauta kan sinak, kan sual ṭhatlonak hna le Pathian hmai i aa tlaklo kan sinak kha a kan theihter hmasabik. Kannih kha ruamkainak leiah a kan phakter lo. Asinain toidor mi lungthin a kan ngeihter. Toidornak lungthin cu kan sualnak kha a kan cohlan ter i ngaihchihnak leiah a kan phawrh. Cuticun Thiang Thlarau cu thiannak leiah a kan phawrh. Pehzulh tein, toidor mi kan sinak kha zohin khuaruahhar veel hna le kannih cu a tlingmi Pathian hngatchanh in kan thinlung chungah fakpiin lunglawmhnak asiter i, cu bantuk veel a kan zaangfah mi Pathian kha thangṭhat lawmh thiam dingah lam a kan hruai. Thiang Thlarau he pehtlaihin abiapibik mi cu kannih kan sualnak le toidor mi kan sinak kha a kan hngalhternak asi. Phundang incun, Pathian hmaiah mah sining kha sining tein theihnak thinlung a kan ngeihter i adikmi ngaihchihnak le lunglawmhnak kha hmunkhat teah asi ternak kha asi. Aruang cu athiang lomi thil paohpaoh kha fiangtein a kan hmuhter caah asi. Khi ruangah Thiang Thlarau he a ton a komhmi, Thiang Thlarau laksawng a cotu timi cu sual ngaihchihnak le ngaihthiamnak (Lam. 2:28), mah le mah dornak lungthin he Pathian ah lung hlerhhlau in ilawmhnak, Pathian kha thinlung in thangṭhat thiamnak le Pathian caah kuttongh tein nunnak kha an hmuh an theih lai. Thiang Thlarau i a rian paoh ah thiannak he aahlat lailo. Thiang Thlarau nih amah i a thianhnak in veel laksawng hna kha zumtu hna a pe bantukin a thianhnak kha zumtu hna cungah a toih. Sual ṭhatlonak in luatding ah sual ngaihchihnak thawngin forhfial a kan auh hnuah thiannak theipar (Rom. 6:22) kha a kan hmuhter. Cuti asi ahcun Thiang Thlarau nih zeibantuk thiannak theipar hna kha a kan pek? Thiang Thlarau nih a kan pekmi thiannak ṭhathnemnak kan ti tikah Thlarau sining taktak ṭhathnemnak laksawng hna he pehtlaihin St. Paul nih a chimmi cu; “Thlarau nih a chuahter mi hna cu- dawtnak, lawmhnak, daihnak, lungsaunak, zaangfahnak, ṭhatnak, zumhawktlak sinak, nunnem toidornak le mah le mah i tei khawhnak hna an si. A minung sinak kha tuah a duhtawn mi thil le pumsa duhnak, pakhat le pakhat thinhun ternak le nahchuahnak hna kha hrial in kan nung lai” (Gal. 5:22-23, 26).