Mithiang

St. Polycarp mei an khangh lio

February, 23

ST. POLYCARP (+155)

BISHOP & MARTYR

            St. Polycarp cu Thawng`thabia `tialtu St. John nih Khrihfa a siter mi lawng si loin Smyma khua Bishop (Bishop of Smyma) ah khinh a si. A salpa Irenaeus nih Florinus sin ca kuat a `tial mi ah “Mithiang Polycarp a `thu i Bawipa bia a chimnak hmun kha keimah nih kan chimh khawh. Ka khuaruahnak chungah hin Polycarp i ramkip a kal lio, a thianghlim mi a tuahsernak, a nun ziaza, a tlingmi mithmai umtuzia, cun minung hna sinah a forhfialnak thilvialte kha ka mitthlam in ka hmuh dih. A thiangmi Polycarp nih Bawipa Jesuh he an rak umlio tein mithiang St. John he midang hna cungah zeitin dah bia a chim, Anmah hna kaa in zeibantuk bia an chim timi vialte kha keimah pumpak bak nih ka theih bantukin a si, tiah a rak `tial. Tamuzana khua tan in Rome khua leiah an rak kalpi mi Biatak caah thihnak a ing hnga dingmi pa St. Igiaro an `tem khihnak thirhri hna kha a rak hnamh.

            St. Polycarp cu St. John sin in Biaknak le zumhnak hmanlo hna (pialsual) he hlatpi ah hrial ding a si ti a rak hngalh. Nikhat cu, Rome khua lampi pakhat cungah zumhnak aa palhmi (apial sualmi) pakhat Marchizon he an i tong i biak a chawnh lo caah a thin a hungtuk i St. Polycarp kha “Na ka thei maw?” tiah a hal tikah Polycarp nih, “A si, kan hngalhtuk ta, Nang cu khuachia fater pei na si cu” tiah a rak leh.

            155 kum ah Barges Orilimus nih Khrihfa hna a rak hrem lio hna ah Polycarp tlaih dingin ralkap cheukhat kha an rak thlah. Cu ralkap hna kha zanriah in `thate a rak don hna i upatnak he thla a rak campiak hna tikah a thlacamnak ruangah ralkap tampi cu an nunzia an i thleng. A zumhnak i thleng dingin a rak fialmi Siangpahrangpa kha, “Kum saupi a rian ka rak `tuan cang i Bawipa nih ka cungah zei `thatlonak hmanh a rak tuah bal lo; Zeitindah keimah khamhtu pa kha ka mawhchiat lai i ka hlawtkhawh lai a ti. Nangnih chikhat lawng a kaang i a mit `than colhmi mei in na ka `thih. Asinain nang cu, nanmah hna bantuk mi `thalo hna caah an remh mi zungzal sualdantatnak a pe hnga mi mei kha pei na philh cu” tiah a rak leh.

            St. Polycarp cu Fei in chunhnak kha a rak ing i, tungah vutcam a si tiang mei in an rak khangh. A thih lai te ah, “Maw … Bawipa, keimah kha martyr hna chungah telhin Khrih hrai kha dinnak nawl hmuh dingah hi caan tawite kha aa tlak ngaiin na ka pek caah tampi kaa lawm,” tiah thla a camtak.

Add new comment

12 + 6 =