Biak`thengfate Kongkau

Biaktheng

CATHOLIC PAWL NIH BIAKTHENG FATE AN TUAHNAK, MEI AN VANNAK LE PANGPAR MUICI PHUNPHUN IN AN TAMHMAWIHNAK KONG

Hal (5);    Nannih Catholic (RC) pawl nih zeicahdah Biakinn biak`heng ah  Phazawngdan mei nan  van? Bible ah a um maw? Zeicahdah Bible zulh loin nan duh paoh in nan tuah? Bible ah a um ahcun ka chim tuah? Zeicahdah Bawipa Thisa inn fate nan tuah i kuang chung i Bawipa Thisa kha nan biak? Zei Bible nih dah bia uh an ti hna? A santlaihnak zeital a um maw? Cubang nannih RC pawl nih innkip ah biak`theng hmete nan sak i mei-khuat, phazawngdan hna nan van? Bible nih tuah u a ti maw? Bible ah aatel lomi tuah cu Pathian serhsat a si lo maw? Cuhna kong Bible ah a um ahcun Bible chirhchanh in ka chimtuah.  
Lehnak:
        Hmasabik ah RC bupi nih Bible ah a um lomi kha tuahchom in kan tuah mi pakhat hmanh a um lo ti leh kan duh. Bible kha pakhat hmanh thlau loin a zul mi kan si i zeibantuk phun in biaknak nih santlai mi a si, tiah Bible ah an hmuh caah Mei vannak, Pangpar `tamhmawihnak, hlasaknak, khukbil nak, tiin tuahning hna kha kan hman tiin leh`than kan duh hna. Pathian nih Moses kha Exo 25:10-15 ah, “A tung donghnih, a vang dongkhat a simi kuang kha a serter i a chung he a leng he suithiang in a tuamter hna. Amah nih a rak pekmi biakamnak hngalhter `hantu lungtlap pa hnih a chiahter hna. Cun a tung donghnih, a vang dongkhat a simi a chin(အချင်း ဂရုဏာာ ပလင်-zaangfahnak `theng)zong na ser lai i suithiang in na tuam lai. Sui Cherubim pahnih na ser lai i a tung khatte lei dongh veve ah na chiah hna lai. Hmaitonh in an um lai i kuangchin kha an ven khawhnak hnga an thla kha an samh veve lai. Zaangfahnak `theng(a chim)kha kuang cungah na chiah lai,” (Exo 25:16-21) tiah thiannak a langhter mi dawhnak he a serter hna. Hi Bible caang ah Pathian nih amah pekmi biakam nak kuang caah a herhtuk ruang ah vanmi pahnih, sui Cherubim pahnih milem kha a rak serter hna cu a si. Cuve bang in Exo 25:37-39 zongah, “Mei-inn pasarih na ser hna lai. Cabuai kha ceuh dingah na van hna lai. A cengceh le a vutcam chiahnak hna cu sui in na ser hna lai,” tiah a ti rih. Cucu Catholic pawl Biakinn mei an vannak hramthawk a si. 
    Exo 30:7-8 ahcun, “Aaron nih zinglei he zanlei he mei a ser tik paoh ah biak`heng cung i zihmui kha a khangh lai,” tiah Pathian nih a ti. Nam 8:2 zongah, “Aaron sinah mei-inn  na van hna tikah mei-inn pasarih hna nih khan mei-inn tung hmailei kha an ceuhawk a si lai,” tiah a chimh bangin Aaron nih a tuah kha kan hmuh. Ex 40:24-25 ah, “Bawipa nih a chimh bangin mei-inn tung kha thlam chung thlanglei kam ahkhan cabuai he hmaitonh in a chiah i Pathian hmaiah mei-inn kha a van,” tiah `ha tein kan hmuh. Ex 40:3-4 zongah “Biakamnak kuang kha a chungah na chiah lai i puanzar na khum lai. Cabuai kha a chungah na chiah lai i a cungah a thilri vialte kha na chiah hna lai. Mei-inn tung zong kha na luhpi lai i mei-inn kha na van hna lai,” a ti. Ex 27:20-21 ah, “Mei-inn caah Olive chiti a `thabik phun kha nan rak put lai,” tiah Israel mi cu nawl na pek hna lai i mei-inn cu na van thluangthluan lai. Aaron le a fapa hna nih khan hi mei-inn cu Pathian nih a mi hna a ton hna nak thlam chungah khan an chiah lai, cucu puanzar leng, biakamnak hngalhter `thantu lungtlap hna hmaiah khan a si lai. Cuka ahcun, Pathian hmaika ahkhan zinglei in zanlei tiang a alh zungzal lai. Hi nawlbia hi Israel mi le an tefa hna nih an zulh zungzal awk a si lai, ti kan hmuh. Hi Bible ruangah Catholic pawl cu Pathian thimmi Israel phun(12) tefa an si caah Bible kha hmante an zulh i Biakinn ah chunzan in mei an van, phazawngdan an van, muici phunphun mei an vannak a si. Thabat men tangka dih in duh paoh an tuahmi a si lo.  
    Cuticun Pathian  nih mei vanternak, rimhmui meikhanghter nak ruang pi cu Pathian cu anmah he a um zungzal ti langhter awk, Pathian cu zungzal ceunak a sinak, a nungmi a sinak, zungzal in a thiangmi a sinak hna kha Israel mi nih an cohlan khawhnak ding caah a si. Cucaah Chanthar Israel a simi Catholic pawl zong nih cu sullam kha an hngalh caah an tuah ve mi a si. Pathian nih thlam kha suithiang in `tamh zungzal awk a duh nain sifakmi Myanmar ram i a ummi RC hna cu aa dawhbik puanthan an cawk i aa dawhbik kut`tial in pangpar he an `amh cionak a si. Pathian caah aa dawh bik, a `thabik, a thiangbik thil an pek duh caah a si. Pathian caah mah le kut`ial cio a si. Cucaah Catholic bupi nih Pathian caah Biakinn zong kha aa dawhbik in an sak tawn.
    Cu hnu ah Exo 40:34 ahcun, cuticun Moses nih a rian aa lim tikah, “Pumhnak thlam cu minmei nih a khuh i Bawipa sunparnak kha a chung cu a khat” ti kan hmuh. Cun Nambar 7:89 ahcun thlam kha a pekchanh hnuah, “Moses nih tonnak thlam chung ah Bawipa he i ton awk i a luh tikah khan biakamnak kuang cung i a ummi vel ngeihnak `thutdan cung khan, Cherubim pahnih hna karlak khan Pathian nih a run chawnh tikah a leh ve” ti kan hmuh. Hi Bible hna cu Pathian pek mi biakamnak kuang chung i nawlbia pahra a `ialnak lungtlap pa hnih caah Pathian nih a rak fialmi a si. Cucaah Moses le Pathian hi `tha tein ton biaruahnak an ngei, ti kan hmuh. Cu ruangah Catholic pawl nih Biakinn ah mei an vanmi le biak`thengah mei an van bangin, Jesuh Khrih nih, Biakam thar ah, “Kei cu hi vawlei ceunak ka si,” tiin a rak cawnpiak hna caah “Khrih cu ceunak a si,” ti langhternak ah a ceu zungzalmi phazawngdan  an vannak a si (Jn 8:12). Biakam hlun i tonnak thlam cu Catholic Bupi i Biakinn hna i muithlam a si i biakamnak kuang cu Bawipa Thisa chiahnak Catholic biak`heng a sang-bik dot, a thiangbik dot ah a ummi “Bawipa Thisa inn fate” kha a sawh. Cu Bible hlun nih biakamnak kuang chung i a ummi Pathian Nawlbia pahra an `ialnak lungpher tlaphnih cu Catholic biakinn a parzik ah a ummi, Bawipa Thisa inn fate ah a ummi, “Pathian sinak le minung sinak pahnih, Changreu muisam in a ummi Jesuh Khrih i a sa” kha a si.

#Kan pehthan lai
 

Add new comment

3 + 1 =