Bible cu Pumkhat Sinak

Bible cu pumkhat sinak

5. LAMKALTU TUANBIA BIBLE CU PUMKHAT SINAK, PATHIAN KHA TEHTE A KHAAN
    Lamkaltu tuanbia (Bible) a dihlak zong hi Thiang Thlarau rian`tuannak kha tehtekhan in a `ialmi asi. Zumtu hna kha pumkhatte pakhat sinak ah a serpiaktu Pathian a sinak kha tehte a khannak asi. Pentecost ni ah a rak `tummi Thiang Thlarau Pathian cu lungngetnak, hmunkhatte umnak, pumkhat sinak i Bawi a sinak kha hmasabik ah fiangtein a langhter hnu ah tehte a khan.13

(a) Pentecost ni ah zumtu hna hmunkhat tein an umnak hmun, lungkhat thinkhat tein an umlio caan, lungnget tein a ummi zumtu hna cungah Thiang Thlarau Pathian a rak `tum (Lam. 2:1).

(b) Thiang Thlarau Pathian cu minung a `thencheu tertu Pathian asilo. Bawipa cu minung a pumhkhawmhtu  Pathian asi. Hi konglam he pehtlaihin bible ah tehte a khaanmi cu, Thiang Thlarau Pathian a rak `umnak in a chuakmi awthawng an theih cio tikah mitampi hna cu lamkaltu hna le zumtu hna hmunkhatte pumkhat in an i pumhnak hmunah an rak i khawmh (Lam. 2:6).

(c) Miphun zakip, holh phunphun hna zong cu, mithiang Peter phungchimmi kha dik thliar tein an ngaihcio (Lam. 2:5-36). Ahohmanh hmun aa cuhmi an umlo. Kei cu Thiang Thlarau ka hmuh, kei zong ka hmuh ve, keimah zong ka ngei ve tiah bia-alnak pakhat hmanh a um baklo. Thiang Thlarau nih a toihmi hna cu Peter pakhat lawng asilo.
    Lamkaltu dangdang hna le zumtu hna cu an dihlakin (120) tluk an si. Asinain, cu ni ah lamkaltu Peter lawng nih phung a rak chim, adang lamkaltu hna, zumtu hna le Jerusalem ah a rak i pumkhawmh mi vialte hna cu mithiang Peter phungchim mi kha an ngaihcio. Lamkaltu hna cu pakhat le pakhat i cuh in phungchimnak an rak tuahlo.
    Hi konglam cu Thiang Thlarau Patian cawnpiak hmuhsak mi biatak cu, lungngetnak, hmunkhatte pakhat sinak asi kha fiangtein a langh.

(d) Thiang Thlarau Pathian cu lamkaltu hna le annih rocotu hna hmangin zumhnak he pehtlaih mi biatak kha zungzal in an cawnpiak i an hmuhsak. Zumhnak kong an cawnpiaknak zongah pumkhat sinak kha an ser peng. Zeitindah kan theih khawh lai ti si ahcun;
(1) Lamkaltu hna he pumkhat tein a pehtlaihter.
(2) Lamkaltu hna i tuah tawnmi Pupa phunglam kha zohkhenh kutchanh in a pekpiak.
(3) Mit in hmuhkhawh asi i, lamkaltu hna sinin a ra mi, pumkhatte asimi Bupi pakhat lawng sernak.
(4) Bawipa Jesuh chiahtak mi biak phunglam asimi Missa tuahnak in pumhnak ah pumkhat pakhat asiter.
(5) Hmunkhat tein thla a camter hna nak thawngin zumtu dihlak kha pumkhat pakhat siternak tiin hmuhkhawh, tonghkhawh, komhkhawh mi hmunkhatte umnak, pumkhat pakhat sinak kha a saktu Pathian asi.
    Khi kong tehte a khaannak ah; Pentecost puai ni ah Khrih an zumh i tipilnak a ingmi minung milu (9,000) tluk asimi zumtu hna le zumtu (120) hna cu “Lamkaltu hna cawnpiaknak kha ngaihnak, annih he hawikomhnak” (fellowship or koinonia-communion) “Changreu cheunak (Missa tuahnak le Bawipa Thisa cohlannak), pumhnak hna kha atu le atu an tuah (Lam. 2:42) tiah lamkaltu tuanbia nih tehte a khaan in a `tial.
(6) Thiang Thlarau Pathian cu hmuhkhawh lomi, zumhawktlak asilo mi, mit hmuh kuttongh asilomi pumhkhawhnak le pumkhatte sinak kha a saktu Pathian asilo. Aruangcu Thiang Thlarau a hmuh, a comi zumtu vialte cu “A zummi vialte hna cu i kom `thep`thep tein khua an sa i an thil kha pakhat le pakhat an i hrawm” (Lam. 2:44).
    Hi Bible ah kan hmuhmi cu, Thiang Thlarau Pathian cu hmuhkhawh mi lungkhat lungngetnak, hmuhkhawh mi pumkhat sinak, hmuhkhawh tongh khawh mi lawng siloin mithmuh kuttongh in komh khawh mi pumkhat pakhat sinak le umnak kha a sertu Pathian a sinak kha fiangtein tehte a khaannak asi.
    Jesuh Khrih kha a zummi, Thiang Thlarau a hmuh mi asi taktak ahcun zumtu dangdang hna he pumkhat tein aa kom lai. Cuti asi ahcun vawleicung hmunkip le ramkip i zumtu vialte hna cu holh phunphun kan holh i miphun pakhatte kan silo, a dangdang kan si cio ko nain hmuhkhawh mi le tonghkhawh mi asi i pumkhat pakhatte asimi zumtu hna i pumhnak ah hmunkhat tein i telve awk asi. Hi kong hi pakhat lawng a um i a thiang, lamkaltu hna sinin a rami Catholci Bupi kha ka zumh timi Nicene-Constantinople Creed tiah an timi zumhnak kha asi.

13. Cf. Raniero Contalamessa, The mystery of Pentecost, trans, Glen S. Davis (Collegeville, MN: Liturgical Press, 2001), especially chapter 1; Matthew Levering, Engaging the Doctrine of the Holy Spirit, 281-284.

Add new comment

8 + 10 =