Dawtnak le Daihnak

7. DAWTNAK LE DAIHNAK

“Daihnak kha kan zuamnak ahhin teikpan fimthiamnak le remkhel rian thil sining `hanchonak hna lawnglawng in a phi kawl khawh asi lailo. Khat le khat lungkuainak hna cu minung hna i thinlung nih dawtnak kha a cohlanlo a al cio caah asi”.¹

Daihnak hmuh dingin dawtnak lungthin he teinak hmuh khawhnak ningcang lawngin naih awk asi. Takpum lei he pehtlaimi `hanchonak ngeih a hauh bantukin thinlung lei he pehtlaimi, biaknak lei he pehtlaimi, nun ziaza lei he pehtlaimi, dawtnak he pehtlaimi hna an `hancho lawnglawng ah diahnak cu aamahkhan a ngei.

Cu asicaah,  Batron Russel nih atanglei bangin a rak chim bal. 

Amah nih, “Minung hna i takpum lei he pehtlaimi `thanchonak le thinlung lei he pehtlaimi `hanchonak, cuaithlainak lei aa tlukmi vawlei ahhin ahlun le athar hnahnawhnak, upa le mino biaalnak lei huatnak a  chuah tawn ningkel le chantiluan ralchanhnak piahtana hna an thiang i a dai a nuammi minung chungkhar nganpi asite lai” tiah kan rak i ruahchan a ti.

Minung cu taksapum le thlarau in sermi kan si. “Minung hna cu annih minung nunning kha anmah pumpak nih hrawh`hannak kha an in duhlo asi ahcun taksa le thinlung (taksa kongkau le thlarau kongkau)kha cuaithlainak lei aa tluk dingin zohkhenh awk asi”.

Miphun thleidannak umlo in a caankip ah dawtnak na langhter lai. Dawtnak cu miphun pakhatte lawng asi ter. Dawnkhannak le i `then`theknak hna kha a hrawk kho tiah (CHIRRALUBICH) nih, dawtnak ngeih cio dingin a rak forhfial bal. Dawtnak cu minung adot thleidannak ngeilo in minung pakhat le pakhat kha manngeih ah a chiah. Upat in a hmaizah. Dawtnak a umlo ahcun ningcangte sinak a um kho lo, dinfelnak a um kho lo, minung hna i nunnak le a man kha khampiak awk asi timi a theithiam lo. 

“Minung pakhat cio i a man hna kha khampiak asilo ahcun, minung hna cu khat le khat annih lungthin `tha rumnak le thil tikhawhnak kha zalongte zumhfek tein an `thencheuh lo ahcun, midang hna, miphun dang hna le an huham hna upat dingah, a thukmi biachahnak a umlo ahcun hi vawlei ah daihnak a umkho lai lo, tiah Pope John Pawl II nih fakpiin bia a kan cah”. ²

Mikip nih pakhat le khat kha dawtnak in i bawmhchanh a herh bantukin pehtlai tein  zangfah zawnruahnak ngeih ding zong a hau ve. Mi hna kha ruahnak tuaitam ter dingah, a`tha mi ruahnak lohtlau dingah tuah awk asilo. Mi hna lungdonghnak tuah loin lungthawh thathonak tuahpiak ding asi. Minung khat le khat huatnak serpiak loin an lungrualnak ding kha tuah awk asi. Innchungkhar lungkuai i `thennak tuah loin an lung aa khah pengnak ding kha nan tuah lai. Mihna rawl`taam terlo in a rummi an siding kan tuahpiak hna lai. Tlaihkip  namchih loin minung kha zoh in kan zaangfah hna lai. Biakamnak hna hrawk loin kan kilven lai.

Minung hna fir in pawcawmnak cawnpiak loin an zuamthiamnak ding kan cawnpiak hna lai. Min langh minthannak kan sersiam piak lai i a dotsang (dothlei cung) an phanh khawhnak ding kan bawmhchanh hna lai. Cubantuk dawtnak lungthin ngeihnak nih, vawlei pumpi kha `thanchonak caah a bawmhchanh khawh lai. Minung khat le khat hawikomhnak kha a remter i a dai ter. Hmunkhatte i dawte in kutsih umnak kha tha a pek. Hi a sungmi lungput hna cu vawlei sernak ah thazaang asi kha a fiangtuk mi asi.

Dawtnak khuhchilhnak cu, hi vawlei minung chungkhar ah daihnak a hmun i a feknak ding caah a um a herh hrimhrim mi thil pakhat asi kan ti khawh. Dawtnak i aman kha tlaihchan cio awk asi. Dawtnak a umnak ah Pathian a um. Cucaah Pathian a ummnak ahcun Daihnak zong a um zungzal ve.
End Notes:
1). Cf. Gaudium et Spes N. 28
2). Cf. Pope John Paul II, Second Vatican, Constitution of the church in the modern world No. 78.