Hrin`thannak (TTP Ka Zumh)

2. TIPIL INNAK LE THAING THLARAU AH TIPIL INNAK
(Baptism in the Holy Spirit)
    Thiang Thlarau ah tipil innak timi cu abikin Pentecostal Christian17Pentecostal Christian kan ti tikah United Pentecostal Church an timi, a tawinak in UPC bu kha chimduh mi asilo. hna nih an hmanmi biafang pakhat asi. Khrihfa zumhnak ah ti le thlarau in tipil innak pakhat lawng a um tiah Jesuh nih (Jn, 3:4-6) ah siseh, Mithiang Paul nih (Efs. 4:5) ah siseh, fiangtein an cawnpiak. Lamkaltu hna sinin cawnpiaknak ning hlan pupa Khrihfa hna zong tipil innak pakhat lawng kha an rak hman bangin, lamkaltu hna in a rami a thiangmi Catholic Bupi zong nih khan lamkaltu hna le hlan pupa Khrihfa hna zumhnak kha kutchan in an cawnpiak bangin Baptism pakhat (tipil innak pakhat) asimi ti le Thiang Thlarau in Baptism pakhat lawnglawng a um tiah an zumh.¹⁸

    “A kan zaangfah ca lawnglawngah kannih cu a kan khamh i, cu a kan khamhnak cu hrin`thannak Ti thawng le Thiang Thlarau nih mi `thatternak a ngeihmi `thawnnak thawngin asi: (Titu 3:5) tiah a cawnpiak.
    Hi Bible caang ah ahleice cinken awk asimi cu ti in tipal innak le Thiang Thlarau i a thar thlennak cu aa dang bantukin `thenkhawh asilo ti kha asi. Aruang cu a pahnih tein hrin`thannak he aa pehtlaihmi asi i (Jn 3:3,5) he kemhchih in kan relding asi. (Jn. 3:3,5) ah Bawipa Jesuh nih a chimmi cu “Biatak tein kan chimh, ahohmanh hrin`han asilo ahcun Pathian Pennak kha a hmu kho lailo, tiah a leh; ti le Thlarau in hrin asilo ahcun Pathian Pennak chungah cun a lut kho lailo)” ti asi.
    Cuticun voihnih hrinnak he pehtlaihin tiin tipil innak le Thlarau i a thar thlenremhnak cu a dangte a cangmi asilo. Caankhatte chungah aa tluk tein a cangmi asi. Bible ningin kan Nu Catholic Bupi cu ti in tipil innak le Thlarau in thianhnak tiah a dangin a `thenlo. Cubantuk a dangte `thennak kha zumh in hmannak cu:- 
(a) Bible he aa tlakmi asilonak,
(b) Lamkaltu hna le hlan pupa khrihfa hna i tipil innak he pehtlaihmi zumhnak he aa ralchanhnak,
(c) Bupi Pa hna i tipil innak he pehtlaihmi zumhnak, cawnpiaknak, tuah phungning zulhnak hna ah cuti ti in tipil innak le Thlarau ah thianhnak tiin adangte hmannak a rak um lonak;
    Hihna ruangah Thlarau in tipil innak timi biafang hmannak hmanh kha Bupi nih cun an rak hmanglo.¹⁹
    Asinain, Pentecostal Christian hna cu Thlarau ah baptism innak kha hleice tein pa an pek. Annih cu holh phunphun chimnak (strange tongues), thlacamnak le thang`thatnak tuahnak ah tlukrilnak, `ahnak, laamnak, i hlawtnak hna kha ahleikhun tuahsernak cu Thiang Thlarau ah baptisma innak i fiangte hmuhkhawh mi hmelchunhnak asi tiah zumh in an cohlan.²⁰
    Pentecostal Christian hna chung hmanhah mi cheukhat hna cu holh phunphun in holhnak kha Thlarau ah baptisma innak (asiloah) Thlarau hmuhnak (asiloah) Thlarau laksawng hmuhnak asi, tiah hleicein zumh an cohlan i, holh phunphun a holhthiam lomi hna, annih thlacamnak le thang`thatnak ah aa tel thiamlo mi hna kha Thlarau a hmuhlo mi, thlarau laksawng a hmulo, a colo mi hna tiah an ti tawn hna. St. Paul cawnpiaknak ahcun holh phunphun holhnak, holh thiehlo le thlacamnak cu thlarau laksawng tampi lakah a donghnakbik dot ah an chiah hlei ah cubantuk holh thiehlo a holh kho ko nain dawtnak a ngeihlo ahcun a tumphit hnachet thawng le sumsel tum thawng bantuk men asiko, `thathnemnak zeihmanh a umlo, santlailo asi tiah a cawnpiak (1Kor. 13:1-2). 
    Hi hna ruangah holh phunphun thiamnak kha thlarau hmuhnak i a fiangmi hmelchunhnak asi ti ruat in zumhnak cu ngaite tiah cun biahalnak tuah awk a um. Asinain holh phunphun thiamnak paohpaoh hi thlarau laksawng an sidih lo ka ti duhnak asilo.
    Cardinal Leo Josef Suenens of Brussels nih Catholic Khrihfa hna cu Thlarau ah baptisma innak timi biafang hmannak kha hrialawk asi, tiah ralring a rak pek.²¹ Cardinal Suenens cu Catholic Charismatic Renewal cawlcanghnak kha 1979 kum in nunnak pakhat ah thlennak kum 1996 kum tiang pumpak tlangtlak a hruai lawng siloin charismatic cawlcanghnak kha vawleicung hmunkip ah a cekhlattu zong asi.
    Pentecost puaini bantuk siseh (Lam. 2), Cornelius inn i a cangmi bantuk siseh (Lam. 10:44-46), Thiang Thlarau cu a laksawng hna kha a toih kho lo maw? tiah biahal ding a um. Thlarau Pathian cu amah nih a herh taktak mi hna cungah, a herh tik caan ah a veel le laksawng hna kha a toih ti cu ahmaanmi asi. Asinain Catholic Bupi cu, cu veel le laksawng hna a toihnak kha Thlarau ah baptisma innak tiah an auh tawnlo. Aruang cu, ti le Thlarau in hrin`hannak a thar remhnak pakhat lawng a um caah asi i ti in hrintharnak le Thlarau in thar remhnak pahnih cu `thenkhawh asilo. 

End Notes:

18.  Cf. Leo Joseph Cand, Suenens, A new Pentexost? trans. Francis Martin (New York, Crossroad; Seabury Press), 79-80.

19. Leo J. Suenens. A New Pentecost; 78-80.

20. See Ann Abor, ed. Life in the Spirit Seminars; Team Manual (Servant Books. 1979).

21. Leo J. Suenens, A New Penticost, 80.