Intuarnak le Daihnak

8. INTUARKHAWHNAK LE DAIHNAK

President Lincoln nih a rak chim balmi cu kannih he kan lungduhnak (methlak duhnak) aa khahlo ruangah khoika rammi pakhat hmanh kha an cungah rimthaw lomi (hnuhrangmi) lungthin nan nei lai lo. Kanmah vialte cu a caan kipah ramchung umkhat (ramchungmi ciocio) kan si ti kha i cinken uh. Unau chuahkhat lugthin `emnak hri he hmunkhatte kutsih in um hna usih, tiah a rak nawl hna.

Aakhah lomi hmunhma (thil) hna ah pakhat le pakhat lungsau lonak kan hrial lai i rimthawlo hruhrangnak kha lehrulhlo dingin John Wesley zong nih ralrinak a rak pek. Amah nih “Ralchanhnak hna he i ton tikah kan lung a sau khawhlo zia kha i cinken u, kannih kan hmuhning bantukin, kannih bia kan khiahning bantukin fawi le bai in a hmuhkho lomi le biachahnak a tuah kho lomi hna kha sual va phawt hna hla uh.

Cheukhat minung hna cu, annih an cohlan mi kong pakhatkhat kha midang hna i an pomning he a ralchanh menmen nakin mah hna cungah khan fakpi in thinlung tenaunak a um sual lai ding kha kan thin a phang ngaingai. Kha thil vialte nih khan miphun thleidannak leiah hmai a hoihter. Kannih kha ralchanh dingah a `thalomi cawnpiaknak hrimhrim asi, tiah a hmuhning kha a rak langhter. Ahelice in miphun kongkau, biaknak kongkau aa thleidannak ah lungsau lo in tuarhkhawh lonak cu `tih nuntuk mi asi.

Rawonda ram, miphung kongkau hnahawh buainak i thlakhat chungah minung milu singthum le cheu in singnga lohn (350,000-500,000) tiang an rak thi tiah (4.8.94) Gyimung-The Mirror) thawngzamh ca ah kan rak rel. Cardinal Francis Arinze cu 1994 kum July thla ah, Indonesia ram lei a va len hna lio ah, a rak chimtak mi cu, minung hna cu annih an tinhnak kawltung phak ding ah biaknak kha ningcang loin an hman tawn. Hibantuk tuahsernak umtu ziaza cu `tih nuntuk mi asi. Zeitik caan paoh ah siseh, biaknak kongkau raldohnak puai an thanh asi ahcun minung hna cu thih ding kha an `tihcio lo caah asi. Thih an ngamhcio caah asi.

Biaknak bukip fonh nih dawtnak lungthin he kutsih in a`tha i adai mi vawlei thar kha serding in Pope Paul VIII nih 1964 kum December 2 ni, Bombay khua ah a rak chimmi cu “Kannih vialte cu mi vialte i minung nunnak tinhnak hna kha tlin cikcek ter dingah mikip cu Pathian fale (fanu,fapa) asimi huham he aa tlak in um ding; a `thakhun mi vawleipi asi khawhnak ding caah kan i zuamcio hna ko lo maw? Khi caah kannih cu pakhat le pakhat i naihniam dingah, thawngzamh ca in, Radio in pehtlaih kan i zuam lawng siloin lungthin le lungthin i theihthiamnak hna in, hawikom `tha thinlung put in a thiang a sungmi pehtlaihnak kha kan tuah lai i minung vialte i a `tha khun mi hmailei caan kha kan sercio hna lai, tiin a rak nawl hna.

Pakhat le pakhat zatlang nunphung, biaknak, phunglam hna aa thleidannak cungah theihthiamnak kan ngeicio hna lai kan upat cio hna lai. Aakhah mi, a thiang mi minung dihlak he pehtlaimi thil hna ah dawtnak thinlung he kutsih in kan `uancio hna lai. Hi kong cu thleidannak a phunphun a ngeimi minung vialte caah tlolh lo tein kan i thimding mi zulh awk lam asi. Dawtnak nih zeizong vialte a tuah khawh ti kha kan zumh a hau.

Catholic Bupi nih a cawnpiak mi cu zatlang nunphung, ramkhel rian, biaknak kongkau hna ah kannih he lungput ning aadang ngaimi hna zong kha nan upat hna lai, nan dawt hna lai ti asi.