Israel mi hna i an Hrampi

ISRAEL MI HNA I AN HRAMPI
    Hlanlio Khrihfa bu i Pathian biakning cu hlanlio Israel biaknak phung le Bible ca in lakmi a si, cun nihin i kan Pathian biakning zong ah a tla ve. Dal 1 nakah Jesuh nih zeitindah Missa raithawinak kha a dirh timi ah Lanhtak puai rawl danghnak can ah a si kha kan hngalh. Amah “Lunglawmhnak a pekning” Amah changreu le mitsur hang einak zong kha a tling lai, a tling lai i lanhtak puai raithawinak zong kha a lonh lai. Hi a pakhatnak chan i Khrihfa mi hna cu, hi he pehtlaihnak ahhin an fiang, mi tampi hna cu Pathian sinah aa pe mi Judah miphun kha an si. Hitihin Lanhtak puai i thlacamnak kha a rauh hlan ah Khrihfa mi hna phung chungah a hung luh kha hmuh a si.
    Lanhtak puai rawl i mitsur hang le thilnu phulh lo changreu cung i thla an cam mi kha ruat hmanh: ~ha chin petu cu nangmah, Bawipa kan Pathian na si, thingthei le mitsur ruang sertu zong na si fawn. ~hachin na cungah tlung ko seh, maw Bawipa kan Pathian, lei le Van vialte i Siangpahrang, Nangmah cu, Vawlei in changreu a chuah tertu na si. A thiang, a thiang, a thiang ti mi cu bu nganpi hna i Bawipa na si! (Isaiah 6:3) hi hmun cu Judah mi hna Pathian biaknak hmun kha a si ve. Hi nih hin Khrihfa biaknak phung chungah lam kha a hmuh i a sial. Biathlam cauk chungah khan kan ton lai, Pope palinak, St. Clement of Rome zong nih A.D 96 i a rak phuah mi chung zong ah a lang.

TODAH AUH `THANNAK
    Hlan  ‘Pupa’ nih biaknak phung an rak ser mi cu Missa raithawinak an ti mi todah hlaan lio Israel mi hna hman mi kha a si. Hebrew holh in a todah ti a si i Greek holh in Eucharist an ti ve, a sullam cu “Lunglawmh raithawinak peknak” asiloah “lunglawmhnak peknak” ti a si. A sullam cu raithawinak rawl hawikom sinah phawt zamh mi, mi pakhat nih Pathian sinah lawmhnak a ngeih tik i tuah mi kha a si. Todah a hram aa thoknak cu thihnak tiang tlirhnak vun tuah `han i cu hnu ah mi pakhat i Pathian khamhnak tlirhnak chung in hmuh `han mi kha a si. Hihi cu Pathian pennak le zaangfahnak ka zumh ko tiin fakpi in a sullam fianter mi kha a si. Salm 69 nak kha zohchunh awk tlak mi a si. A herh taktak mi zaangfah nawlnak kha a si. (Maw Pathian, ka khamh tuah). Hi zong hi caan khat ah a hnu deuh tlanhnak a ra ding mi conglawmhnak kha a si. (Pathian cu hla in ka thang`hat lai... zeicah tiah Bawipa nih mihar mi kha a theih hna).
    Salm 22 nak hi todah caah a `ha bik mi a si ko lai, aa thoknak ah “Ka Pathian, Ka Pathian, zei ruangah dah na ka hlawt tiin a um? Jesuh hrimhrim zong nih Vanlamtah nak an thlai i a thih lai ah hi bia hi a chim ve. A bia a ngai mi hna nih hi bia a lak mi kha an theih ko lai, hi hla hi cu an rak theih cang ko lai, ai thoknak cu kaltak dingmi rawhralnak kha a si, a donghnak cu khamh teinak kha a si. Jesuh amah hrimhrim nih todah kha a chim lengmang, Jesuh nih cun amah zumhnak le ruahchannak kha tlanhnak caah a langhter. Todah le Eucharist (changreu le mitsur hna karlak ah aa lawhnak a um veve i an sullam cu lunglawmh peknak kha a si ko.  Cardinal Joseph Ratzinger nih hi ti hin a `ial. “A tung tlangpi dirh in a chim mi cu, Khrih kong kha a si, a ngaite Eucharistic Christology” an ti mi Khrih kong i changreu le mitsur zu hna cu, todah Bible ca hlun i thlarau kong ah a ummi a si. Todah le Eucharist hna cu Pathian biaknak ah bia holh in le rawl in telh mi an si. Cu lengah todah cu, Missa raithawinak bantuk in thi tel loin pekchanhnak kha a um i thilnu phulh lo changreu le mitsur zu zong kha an i tel.
    Hlan lio Rabbis (saya) hna zong nih todah kong ahhin a biapi mi bia chim chungnak kha an rak ngei. (Messiah) chan a phak tikah raithawinak vialte ngol a si lai, todah raithawinak lawng hi a um lai. Hihi cu zungzal in hloh khawh a si ti lai loh.