Jesuh Khrih le Mithiang Hna Milem

Jesuh Khrih Milem le A dang Milem Hna

Catholic pawl cu Pathian nih amah he aa pehtlaimi vancung mi pahnih milem a rak tuahter hna caah vancung mi hna nak in let tampi a sang deuh mi Pathian Fapa, thihnak teitu kannih caah vailam cung in thisen thlet in a kan khamhtu Jesuh Khrih milem kha an tuah cio. Amah nih a rak thlahmi Lamkaltu hna milem, mithiang hna i milem, Jesuh hringtu Nu Mary milem, vancung mi hna milem kha an tuah cio. An bia hna lo. Israel mi hna nih cu vancung mi pahnih hna milem le biak`theng, biakamnak kuang, thlam hmaiah lukuun khukbil in an biak zungzal ko nain an thinlung ah Pathian lawnglawng nih hmun a lak, an lungthin ah Pathian lawng a um, lenglei zohnak cun mitin hmuhkhawh mi milem hna cu Israel mi caah Pathian kha ruahnak caah a `thami thil a si bantuk in Catholic pawl nih milem hna hmaiah lukuun in khuk an bil tik paoh, cu milem hna kha Pathian aiawh in an biakmi siloin hmuhkhawh lomi Pathian kha thluak in ruah`than khawhnak caah a `thami thil an si i Pathian he aa pehtlai mi an si, tiah kan theih.

A ngaite ah, Israel mi hna nih Nawlbia pahra aa telmi lungtlap biakamnak kuang le Cherubim pahnih hna milem lawng kha an biak a si ahcun zeicah Pathian nih dan a tat kun hna lo. Israel mi nih Pathian silo mi an hmai i a ummi Cherubim milem pahnih le biakam kuang kha an biak tiah nan hmuh ahcun RC kha milem an biak tiah zalong tein soisel ko hna. Israel mi nih Pathian lawnglawng kha an biak ko tiah na cohlan ahcun Catholic pawl zong hi Pathian pakhat lawng a biami an si ve ti kan theih a hau. Pathian nih milem hna, biak`theng hna, thlam hna, biakamnak kuang hna a tuahtu ding pa kha hngalhthiamnak thluak le Ceunak a pek hnuah a rak thim taktak hna. Pathian nih Moses kha, “Bazalel le Oholiah” an timi pahnih kha sui, ngun, dar thlet  thiamnak fimnak, thing hna ker thiamnak le dawh tein suai thiamnak, cun zungthiam dang vialte kha thiamnak phunphun ka pek hna i cucaah ser awk tiah kan chimhmi vialte kha an serkhawh dih lai,” Exo 31:1-11 tiah a khinh `than. Hika ahhin zohtuah hmanh. Kan hawi Khrihfa hna Pathian he pehtlaimi zuk lemilem hna kha huattuk in aa umter mi hna caah, Pathian tu nih cun cu milem le zuk hna a tuah thiam dingmi thluak fimnak hmanh kha zungthiam mi hna sinah a pek rih hna.

Pathian nih, nannih nan chimmi Jesuh milem, Nu Mary milem, vancung mi hna milem kha tuahawk a duh lo ahcun hi bantuk in thluachuah nak a pe hna hnga maw? Pathian nih a duh caah pei Cherubim a tuahtu ding hna kha thluak fimnak a pek hna cu. RC na soisel hlan ah Pathian kha soisel hmasa tuah. Pathian duh lomi milem phun hi na hngal maw? Jesuh zuk le milem, Nu Mary zuk-milem an si maw? Cunglei i kan chim cia bantuk in Moses cu tlangcung i Pathian sinah nisawm li a va um tikah Pathian nih voi (7) tiang ralrin a pek i Bawipa nih a chimmi paoh cu kan zulh lai, tiah a cohlang dingmi Moses le (Pathian biachim hmanh a dih hlan ah) Israel mi hna cu Aaron he hmunkhat in cawfa te milem an ser i “Hihi Izipt ram in a kan chuahpi tu Pathian a si,” Exo 32:4-6 tiah an ti i cawfa hmaiah biak`theng pakhat an ser i an rak biak. Cuticun Pathian nih, “Keimah hlei in pathian dang kha lukhun in nan bia lai lo, vawlei cung vawlei tang keimah he aa loin milem nan tuah lai lo,” tiah voi tampi a rak cah mi hna nawlbia kha an buar tikah an dihlak hrawh dih ding tiangin Pathian thin an rak phawh. Asinain Moses nih Pathian kha `tha tein a nawl`than caah a mi hna dantat ding a ruahnak kha aa ngaichih `than ti kan hmuh. Sihmanhsehlaw Moses cu tlangcung in a rak `tum i annih cu cawfa milem pawng i an i hlawh i an lam len ko kha a hmuh tik hna ah a thin a hung tuk i nawlbia pahra lungtlap kha a hlonh i a den, cawfa kha a lak i dip tein a rial i ti chungah a hlonh. Cun Israel mi cu kha ti kha a dinter hna, Aaron zong nih Israel mi hna nih an hnek ruangah an rak put mi dihlak sui hna kha a tit i a thlet i cawfa milem a serpiak hna nak kong a cohlan, Moses cu cutin Israel mi hna an sualnak ruangah Pathian sin tlangcung ah a kal`han i a nawl, cu ni ah minung 3000 tluk an thihnak kong Exo 32:1-35 ah kan hmuh. (12.11.2021) 

Asinain Pathian cu a dingfel mi a si caah cunglei i kan chimcia bantuk in amah a daw i a nawlbia a zulmi paoh thluachuah-nak a pemi a si caah a rak thimmi Israel mi hna kha a zaangfah `than hna i Moses hmang in khahlan i lungtlap he aa lomi nawlbia pahra aa telmi lungtlap thar kha pek`than dingah Moses he an i ton `than lioah milem he pehtlai in `tha tein a cah mi cu Moses kha hmundang ah thlah in cuka i a ummi hna biak`theng hna kha hrawh-piak dih ding le an lungzarh le an thing hna na hrawh dih hna lai; Pathian dang hna biak lo awk ca zongah `tha tein a cah`than hnuah nawlbia lungtlap thar a peknak kong cu (Exo 34:1-35) ah kan hmuh.

A phi cu ramdang mi hna i khuahrum pathian hna, khuahrum-zuk milem hna kha Pathian nih a fih i Pathian he lawng aa pehtlai mi Khrih milem, Nu Mary milem, Lamkaltu hna milem kha a fih lo caah cu hna a hmang mi Catholic bupi lawng hi Jesuh Khrih Bupi sinak in nihin tiang tluk loin a dirnak a si. Pathian thluachuah a copeng mi a si. Deut 9:6-35 zongah, “Cawfa milem he an biakam an hrawhnak kong kan theih i, Deut 10:1-32 ah voihnihnak lungtlap thar an lak `thannak kong kan theih. Cuhnu bak ah Pathian thluachuah pekmi zungthiam saya hna nih Pathian cah mi rian hna kha an dih tiang an `tuannak kong kha (Exo 36:1-35/ Exo 37:1-9) ah kan hmuh. Hi tluk in ka chim cang hnu cun cunglei i Bible kha `tha tein a relmi hna nih cun a theih cang ko lai. Pathian duh lomi milem cu zeidah a si? Pathian duh lomi milem biak timi cu zeidah a si? An thleidan khawh cang ko lai. Pathian nih a thlauh ko buin Israel mi hna nih cawfa milem kha Pathian tiah an ti i an biakmi lawng kha milem biaknak a si ko lo maw? Cu cawfa milem nunnak ngeilo milem hmai lukhun khukbil mi le bawh te hna kha Pathian nih a rak duh lo caah a thin a hun kha budang hna nih an theihawk a si. Cuti a si ahcun Israel mi hna nih Cherubim pahnih le biakam nak kuang hmaiah lukhun khukbil in an bawk i thla an cam bantuk in Jesuh milem, Nu Mary milem, Vancung mi hna hmaiah khukbil cu Bawipa sin thlacamnak le biaknak a si. Kan hawi hna nih Pathian duh lomi cawfa milem le Jesuh/ Nu Mary/ Vancung mi milem hna hi an i khat, an i tluk tiah nan ruat maw? Catholic Biakinn ah rak zoh tuah hmanh uh.

#Pehthan asi telai