Milem zuk kong Biahalnak

Zeitikhmanh ah Catholic nih cawfa milem an tuah bal lo. Cawfa milem hmaiah khukbil in an bia bal fawn lo. Cawfa milem hna siseh, khuahrum milem hna Biakinn ah an chiah in an hmaiah Pathian sin thlacamnak, annih kha tlangtlak piaktu ah an chia bal hna lo. An tuah fawl lo. Fiang deuh in chim ka duh rih mi cu a nungmi Pathian Fapa Jesuh milem, a Nu Mary milem, vancung mi hna milem, zultu hna milem, mithiang hna i milem hna kha Biakinn i a thiangmi hmun ah an chiah i Pathian lawnglawng kha an biakmi a si. Annih nih Pathian sinah tlangtlak thlacam piak dingin an hal. An milem hna hmanh kha upat peknak thawngin hmuhkhawh lomi annih kha upatnak tehte a si. Kan hmai i milem a um tik paoh ah kha milem kha kan biak a si lo. Cu milem hna kha kan biak mi siloin Pathian sin kan ruahnak kan chiah bantuk in cu milem hna hmai i thla kan cam tik zongah annih nih thluachuah an kan pekmi a si lo, cu Nu Mary milem hnuphen ah Nu Mary nih a Fapa sinah tlangtlak thlacam piaknak in thluachuah a umnak kong le Jesuh Pathian lawng nih thluachuah a kan pekmi a si kha an zumh. Cuticun milem hna hmaiah khuk kan bil ahhin kha milem  nih a langhter mi a rak nung bak taktak mi mithiang hna, Nu Mary Jesuh Khrih kha upatnak pekmi a si. Nannih kan hawi Khrihfa hna caah zeica’h hitin ka chim ka ti ahcun Israel mi hna nih Cherubim milem pahnih, biak`heng hmaiah lukhun khukbil in an bawh caah a si. Cu ruangah kan nih zong vancung mi hna nak in a sang deuh mi Jesuh milem hmaiah khukbil in upat kan pekmi a si. Nannih nih hi hna hi nan hngalh ahcun Jesuh milem kerlak cu Pathian biaknak ah bawmtu a si kha nan hngal hnga lo maw? Nannih hmanh nih Jesuh milem tuah nan duh deuh men lai.                           

Nambar 21:4-9 ahcun, Lamthluan a har caah Pathian mi Moses kha sual an phawtnak kong, culio caan ah Pathian nih mei rul a rak thlah Moses a zaihnawh mi  hna kha a cuk ter hna caah mitampi an thihnak kong, cutik ah Moses kha an nawlthan i Pathian nih mei-rul a ral thlah i kha a hlonh`than nakhnga thla an camter nakkong, cuticun Moses nih Pathian sin thla a cam `han i Pathian nih darrul kha a serter i tung ah a thlai ter i cu rul milem a zohmi paoh sinin rul sivai a lo i damnak an hmuh`thannak kong kan hmuh. Hika ah Pathian nih milem sawhsawh hmanh a si lomi rul milem kha dar in a biapi in a serter `than hoi. Kan hawi hna nih Bawipa kha nan soisel ko lo mei. Nannih nan chimning ahcun Pathian tu nih Pathian milem asilo mi rul-milem kha a tuahter caah amah cu a dingfel lomi bantuk a si lo mei. Moses nih thla a cam tikah rul-milem tuahter loin zeicahdah cuti ningin mi kha damnak a rak pek hna lo?

Hika ahhin mi hna nih rul-milem kha kan Pathian a si, tiah Pathian ai in an rak zohmi a si lo. Cucaah biak timi sullam a kheng lo. Cun kan bawi Khrih cu vailam cung thihnak a in lai nak muithlam zong a si bantukin vailamcung i Jesuh kha zohawk le rul-milem a tuahternak cu Pathian nih kannih kha Jesuh milem ser i amah khamhnak ruahnolh awkah zohawk hrimhrim a si timi kha a hlan-kanh hmelchunhnak a langhter mi a si lo maw? Rul milem nih vailam cung i thah a ing dingmi hmelchunhnak a si ahcun rul-milem a zohmi paoh nih damnak an hmuh cio bangin vailam cung i Jesuh Khrih milem a hmang mi zumtu Catholic Khrihfa pawl lawng nih sualnak in an luat awk a si lo maw? Cuti  lo ahcun Pathian nih mi hna caah bia in nundamnak a rak pek cang tiah tiin a bik in rul-milem a rak tuahter hnga lo a si lo maw? Rul aa tel lomi dar tung lawng kha zoh a fial hna lo bangin Jesuh Khrih milem aa tel lomi vailamtung lawng kha zoh a fial ve lo. Hihi kan hawi Khrihfa hna nih nan hngalh awk a si.

Atu caan ahhin profet bang aa umter mi cheukhat nih Jesuh zuk hmanthlak milem hna an hmuh tik paoh ah mahthil hna chungah hin khuachia an i hrolh, cu khuachia hna nih innchungkhar ah a rak tlung dingmi thluachuah kha an fir caah innchungkhar hna cu zawtfah an ing, (sipuazi) `han-chonak a rawk tiin pialsual kan hawi Khrihfa profet, pastor hna nih Catholic pawl innchung i zuk hmanthlak le milem hna kha an hlawtter hna i a hrawhter mi hna an um. Cu bantuk in Catholic zong nih cu profet hna chimmi kha a zum sualmi cu Catholic Bupi  cawnpiaknak kha tlingte le fiangtein a thei kho lomi RC min lawng aa bunhmi, Biakinn a phan bal lomi RC an si kha a fiangtuk. Catholic nih cun zumhpalh mi hna kha innchung hmanh lamhter lo ding an si. Khrih, Nu Mary, zuk le milem an hman lo hmanh ah innchungkhar ah dam lo zawtfahnak, sipuazi rawhnak, thleidannak a ngei mi Khrihfa innchungkhar hna ah zeinihdah thluachuah cu a lakpiak tawn hna; khuachia hruaitu hna an si hnga lo maw? Catholic a si ko nain profet aa canter mi hna bia a zummi hna cu cuti zumhnak nganh dingin a rak chimtu hna sinin bawmhnak a hmu mi an si kho men. A chia le a `ha a thleidang kho lomi zong an si men ko lai. Jesuh Khrih i milem, hmanthlak pachi suaimi hna kha khuachia a si tiin a cohlang mi profet, profet nu, saya hna cu luantuk in chiatnak lawng hmuh an hman caah thinlung lei tlamtling lo, lungmolh cang mi an si ti a fiang ko. Zeicahtiah ca`ial tu ka hmuhtonnak chungin chim tuahning. 

#Kan peehthan telai>>