Pa Pathian, Fapa Pathian, Thiang Thlarau Pathian i thluachuah conak

Biatlang kan komh ahcun Pathian nih amah he pehtlai mi vancung mi Cherubim hna i milem hna, Thlam le biakam kuang zuk le milem hna, Pathian biak tik i a herh hngami thilri hna, khanghthawinak rimhmui thawkin Moses kha dikthliar tein a rak tuah ter. Hi hna cu a dihlak in a lim hnuah biakamnak kuang chiahnak biak`heng ah a rung`um i Moses he bia an i ruahnak kong, thluachuahnak a peknak kong kha Nambar 7:89 ah fiang tein kan hmuh. Bible hlun chan ah Israel mi hna nih an kalnak kipah biakam kuang kha an phorh caah annih kha Pathian nih chun ah minmei bangin le zan ah mei-alh bangin khuaihliti tamnak ram kha a phak ter hna, Nambar (9:1-23) tiah kan hmuh. Cuticun Pathian silo milem a simi biakam kuang khanghthawinak, flun cu Pathian Nawlbia chungah a um caah an caah a rak biapi ngai. Cu bangin Catholic nih biakam thar a simi Khamhtu Jesuh milem kha an ser i kan Pathian muithlam a cuangmi milem a si caah khuapi khuate ah Khrih milem lenpinak a thisa lenpinak, a Nu Mary milem put in lenpinak hna hi Khamhtu he pehtlai in hmuhkhawh mi an si tiah aupi nak a si. Israel mi hna nih nawlbia aa telmi biakam kuang kha hmunzakip ah an phorh i cunglei i Pathian he hmunkhat ah um`inak in thluachuah an tinco bantuk in Catholic zong nih vancung i Pa Pathian, Fapa Pathian, Thiang Thlarau Pathian i thluachuah cu an co ve. Jesuh milem, Nu Mary milem put in lenpinak cu Israel miphun thar Catholic an si kha a fianter i pehzulh in an tuahnak kong, Bible zulh a sinak kong zong langhternak a si. Theih dingmi cu zeibu hmanh nih Catholic tuahning le zulhning tluk in an tuah kho lo ti hi a si. Kaa lawng in Bible a zulmi hna cu kan hawi Khrihfa an si i kuttongh in a zulmi hna cu Catholic an si. Bible caangkhat an relnak in an soisel mi a si. A dihlak an hlathlai lo. Deut 4:16-19 ah, “Pathian nih nanmah caah mipa bantuk maw, minu bantuk maw zei bantuk saram milem paoh nan tuah lai lo, a timi ahhin Rome pathian hna bantuk a simi khuahrum, khuahrum nu milem kha nan caah nan tuah lai lo a tinak a si. Deut 4:20-31 ah, Israel mi hna nih a dang khuahrum pathian kha an biak lai i palhnak an tuah te lainak kong, an i ngaihchih `han ahcun Pathian nih a zaangfah hna lainak kong kan theih. RC nih khuahrum milem a tuah lo. Deut 5:8-9 ah, “Nangmah caah serchom mi siasal, cunglei van i a ummi thil a lomi siseh, tanglei vawlei i a ummi thil a lomi siseh, vawlei toi i a ummi ti chung i a ummi thil a lomi siseh, na ser lai lo; an hmaiah na kun in na bia hna lai lo,” a ti bang khan Va, Rul, Nga tiah saram hna milem kha an ser bak lo; lukun zong in an bia bak fawn lo. Deut 6:13-14 zongah “Israel mi hna nih, Pathian lawng kha `ih awk le biak awk, a si i a min in chiat i serhawk, an kiangkap i a ummi an pathian, pathian dang hna, zulh lo dingin nawlbia a pek hna. Khrih cu pathian dang a si lo caah amah kha khamhtu Pathian in an biak i a zuk le milem kha upatnak a petu hna cu Catholic an si. Cuti a si ahcun Pathian duh lomi cawfa milem le khamhtu milem hi aa lo maw? Khrih milem kha cawfa milem ah na hmusual rih lai maw? Na thleidan thiam ahcun soisel nak na ngol lai i Jesuh milem tuah a herh ning nan theih te ko lai. Pathian zuk le milem na cohlan lo i hmelchunhnak milem ser na ning a zah rih zongah mi tuah ciami tal na upat te ko lai. Cun milem pawl kha pathian duh lomi cawfa milem tiin na hmu maw? Catholic pawl hi milem a biami an si hrimhrim lo. Pathian he aa pehtlai mi milem hna kha hmelchunh nak pakhat caah lak in Pathian pakhat lawngte a bia mi an si. “Pathian nih milem ser hlah, bia hlah, na lukun hlah, nanmah caah tuah hlah” (Exo 20:3-5) a timi Bible a zulmi  hna nih Pathian fial a simi “Vancung mi Cherubim” milem tuah u, a timi Bible bia kha Cherubim milem nan tuah i Biakinn ah nan chiahnak in Bible bia nan zulhnak tehte langhter cio uh (Exo 25:18-22).
#Milem zuk kong Daal khatnak a dihcang. Daal hnihnak kan peh`than telai#