Thangchiat mi bu (95 Theses n,87-90)

Kawl u, nan hmuh lai
87.    Jesuh nih a thlahlo mi bu `then`thek pawl cu Pathian nih a huattuk ti cu a fiang ko cang. Jesuh thlahmi Lamkaltu hna dirhmi Khrih Bupi (cf; Rom 16:16) cu khoika Bupi deuh dah a si ti cu a fiang deuh lo. Vancung ram biathuk umnak Khrih Bupi cu  Pathian sunparnak in huap mi asi caah (cf; Phung. 25:2) kanmah Bupi hi Khrih bupi a si, ra lut ve tiin Bible ca an in sawh piak len zongah va zum hlah u. Jesuh Khrih nih amah umnak Bupi cu, “ kawl u law nan hmuh lai” tiah a ti (cf; Mt. 7:7). A kawlning phun tampi a um nain phun (4) hi “`tha tein ruat u law kawl u” tiah kan forh duh hna.
Rom. 16:16     “Khrih Bupi…”
Phung. 25:2     “Pathian sunparnak cu zeithil paoh a fianter lo mi hi a si.”
Mt. 7:7     “Kawl law na hmuh lai....”

(1) Lamhlun 
88.     St. Peter cung i sakmi Khrih Bupi cu  AD.33 kumah, Lamkaltu hna nih an dirh i Jesuh a  Bupi ah a cang. Cu Bupi ahcun Nu Mary, Lamkaltu pawl le Bible Ca chung i  Mithiang pawl an um. Vawlei cung tuanbia zoh in, a hlunbik mi Bupi cu kawl u law lut u (cf; Jer. 6:16). Cu Bupi cu hlanlio zumtu pawl an si i an um tilo tiah an in hlen hna ahcun va zum hlah u. Zeicaah tiahcun Peter cung i dirhmi Bupi cu a hlun kho, a rawk kho lai lo i zungzal in a hmun lai (cf; Mt. 16:18-19). Bu `then`thek lam a zulmi hna cu vanram an phan kho lai lo (cf; Jer. 18:15).
Jer. 6:16     “Lam `then ah dir u law, lam `thabik a simi hlanlio lam kha khoi ah dah a um tiin hal hna u, cu lam cu zul u law nan hna a ngam lai.”
Jer. 18:15      “An kalnak ding lam ah an kal i an tlu, lam `thing an zawh ti lo, sial lomi lam an zawh.”

(2) Thangchiat mi Bupi
89.     Jesuh nih amah a zumlo mi unau pawl kha nan thil tuahning ahmaanlo tiah a ti zungzal hna ruangah Jesuh kha an huat ngai (cf; Jn. 7:7). Khrih Bupi zong nih bu `then`thek pawl an hmaanlo tiah a ti zungzal hna ruangah Bupi kha an huat ve (cf; Jn. 15:18). Jesuh cu mi a hruaipalh hna tiah an thangchiat (cf; Jn. 7:12). Cubantukin, Khrih Bupi zong kha vawlei khuazakip ah an thangchiat ve (cf; Lam. 28:22). Bu kip nih an thangchiat mi Bupi cu kawl hmanh.  Khrih Bupi cu na hmuh lai. Khrih Bupi an thangchiat tikah phunhnih in an thangchiat.
(a) Cathiang chung i a um ko nain an theihthiam lomi bia kha an thangchiat.”(cf; 2Peter 2:12).
(b) Cun Thlarau thur pathum utlak a lomi kha ka hmuh hna (cf; Bia. 16:13) An ziaza `thalo kha mi tampi nih an i cawn lai i cu hna ruangah cun biatak lam kha thangchiatnak a hmuh lai  (cf; 2Peter 2:2-3).
Jn. 7:7     “Jesuh nih ‘Nan thil tuahning ahmaanlo tiah ka ti zungzal caah vawlei nih aa ka huat.’ ”
Jn. 15:18     “Nannih kha vawlei mi nih anin huat hna asiahcun Keimah an ka huat hmasa ti kha i cin ken zungzal u.”
Jn. 7:10-12     “Puai ahcun Jesuh zong a kal ve. Minih a bia kha an ngaih i mi a hruaipalh cang hna an ti.”
Lam. 28:22     “ Nan Bupi bia hi khuazakip ah an thangchiat ti hi ka theih tiah a ti.”
2Peter 2:12     “An theihthiam lomi bia cu nautat in an thangchiat.”
Bia. 16:13     “Utlak bantuk asimi thlarau thur pathum ka hmuh, nal profet kaa chungin a chuak mi an si.”
2Pet. 2:2-3     “Mi nih biatak lam cu an thangchiat lai; cawnpiaktu hmaanlo pawl cu hakkau mi an si caah phuah chawm mi bia an chim....”

(3) Hremnak le thahnak a tuarmi Bupi
90.     Kannih cu aman pekin cawkmi kan si (cf; 1Kor. 6:20). Jesuh nih a kan cawknak dingah a thisen kha a thlet, thisen in cawkmi Bupi cu, zumtu pawl zong nih an thisen in an dawhter chin i an nunnak an pek chanh ve. 
    A hleice in, AD 350 hlanah Rome Siangpahrang (10) hna nih `thaloin an rak hrem hna i an rak thah hna (cf; Bia. 11:7-12). Jesuh nih Johan le James sinah “ka in dingmi tuarnak hrai cu nan tuar kho ve lai maw?”  tiah a ti hna caah, a Bupi cu hremnak le thahnak a in tuar i minung tampi an nunnak an liam (cf; Mt. 20:20-23). Asinain, zumtu pawl nih cun, zumnak kha fekte in an i tlaih cang caah luatnak nak in thihnak tu kha an i thim deuh i sifak ngai in an vakvai(cf; Heb. 11:35-37) nak cu a si. 
    Na umnak bu chungin, Jesuh Thawng`tha bia caah thisen luan in a nunnak a pemi  an umlo asi ahcun, cu bu cu a hmaanlo mi bu a si.  Cucaah cun minung relcawk lo tiangin hremnak le thahnak an in tiang in zumtu an sinak (cf; Bia. 6:9) Bupi cu kawl tuah u.
Bia. 11:7-12    "Cun sahrang nih a do lai i a tei lai. Cun an ruak cu an Bawipa vailamtah cung i an thahnak khuapi lamthluan ah an tar tak lai. Miphunkip le  ramkip le pengkip i a um mi vialte nih an ruak cu nithum le acheu tiang an zoh lai i an phum ter hna lai lo.”

Mt. 20:20-23     “Ka hrai cu a din zong nan din khawh taktak ve ko lai. Sihmanhsehlaw ka orhlei ah anih `thu seh, ka kehlei ah anih `thu seh ticu keimah thim khawhmi asilo. Cuka hmun cu ka Pa nih a timhpiak mi hna caah a si.”
Heb. 11:35-37 “A dang cu a `tha deuh mi nunnak i thawhter si kha an duhdeuh caah, luatnak kha i  lak duh loin hremnak in an thi. Acheu cu nihsawhnak le fungtuknak kha an ing i a cheu cu temnak le thongthlaknak kha an ing. Lung in an cheh hna, hluah in cheuhhnih ah an chuah hna, vainam in an thah hna.”
Bia. 6:9     “Cun Tuufa nih cun cakhenh panga-nak kha a phoih. Pathian bia an chim ruangah le Pathian tehte an sinak ah zumhawktlak in an um ruangah an thahmi hna thlarau kha biak`theng tangah cun ka hmuh hna.”