TTP cu Pumkhatte sinak, Lungngetnak Bawi

3. THIANG THLARAU PATHIAN CU PUMKHATTE SINAK, LUNGNGETNAK BAWI
    Bible chungah kan hmuhmi cu: “Veel laksawng a phunphun a um nain Tharau pakhat lawng a um (1Cor 12:4). Hi thil vialte a tuahtu hi Thalrau pakhat asi, a duhning bantukin mi kha laksawng phun dangdang cio a pek hna (1Cor. 12:11). Kannih vialte hi Thlarau pakhat nih tipilnak a kan pek cio. Kan dihlakin Thlaruan pakhat kha din awk ah a kan pek (1Cor. 12:13). ^{5. Saya Judson nih a letmi Kawl bible ahcun “We were all given to drink of one Spirit” kha ...... Hika zawnah timi biafang cu pakhat te asimi a thiangmi Thiang Thlarau Pathian kha a sawh lo. Minung thinlung thlarau lawng kha a sawh.}
    ‘Biatak khamhnak leiah kawhnak he pehtlaih mi ruahchannak pakhat chungah nannih kha auh i khumh nan sibangin pum pakhat (Bupi pakhat, Thiang Thlarau pakhat lawng a um). Bawi pakhat, zumhnak pakhat, tipilnak pakhat, kannih vialte Pa asimi Pathian pakhat lawng a um (Efs. 4:4-5).
    Thiang Thlarau Pathian cu thiannak hrampi asi. Pathian i dawtnak zong asi. Lungnget lungrualnak le hmunkhatte sinak i Bawi zong asi fawn. Thiang Thlarau Pathian cu lungnget lungrualnak le hmunkhatte  sinak i bawi a sinak kong kha mithiang Paul nih pum pakhatte he tahchunh in a cawnpiak hna. Mithiang Paul cawnpiaknak cu: 
“Pum pakhat teah nge tampi a um i, hi pum pakhatte i nge tampi hna cu pum pakhatte an si bantukin, Khrih zong cubantuk a si ve. Aruangcu Judah mi siseh, Jential mi kan siah, sal kan siah, mi luat kan siah kan dihlakin Thlarau pakhat nih tipil a kan pek i kan dihlakin Thlarau pakhat nih tipil a kan pek i kan dihlakin Thlarau pakhat kha din awk ah pek kan si (1Cor. 12:12-13).  Hi Bible kha mithiang Paul nih biapibik in a cawnpiak mi cu; Thiang Thlarau Pathian cu `then`theknak bawi hrampi asilo, bu `then`theknak hna i bawi le a hrampi zong asi fawnlo.
    Minung chuahkehnak kokek aalo lomi si tawnnak in umnak, a rang a nak, sendum titvun i lawhlonak, vawlei hlunpi `thennak in a chuakmi i lawhlonak hna le minuing pakhat le pakhat ri`thennak in a `thenmi ri hna kha Khrih ah peh in a komhtertu Bawipa cu Thiang Thlarau Pathian asi. Miphun a thleidan mi “Ri” hna, miphun a thleidanmi ‘ri’ hna kha a hrawk i, Khrih ah pumkhatte sinakin pehtlaih a fonhter i a komh hnuah pum pakhatte sinak a sakmi Bawipa asi. Jesuh Khrih a zumh taktak mi cu Thiang Thlarau Pathian thawngin pumkhat asimi Bupi pakhat ah sernak a ing.
    Khrih pum pakhat ah a pumh i a tonmi Bupi cu vawlei caandongh tiangin khamhnak thawng`ha kha a chim a cawnpiak hna lai pinah, thihnak kutka hna asimi khuachia dohnak hmanh nih cu Bupi cu a tei kho lailo (Mt. 16:15-18). Khuachia dohnak hna cu a dikmi zumhnak in palhter a pialter mi a palhmi zumhnak le cawnpiaknak hna an si. Bianaah, Jesuh Khrih hi Pathian asilo, a hleikhunbik mi minung sawhsawh asi tiah cawnpiaknak le zumhnak hna (Arianism), Thiang Thlarau cu Pathian taktak silo, hmuhkhawh lomi `hawnnak huham he a khahmi sertu Pathian he aa naihbik sermi pakhat asi (Pneumato-machianism) cawnpiaknak le zumhnak hna, Khrih cu Pathian asi i a thikho bak lomi asicaah, vailam cungah a thilo. Asinain amah aiawhmi pakhat nih thihnak a inpiak timi cawnpiaknak le zumhnak hna tiah a palhmi zumhnak le cawnpiaknak hna cu chan a pehpeh ah a chuak.
    Cu zumhnak palh hna kha doh in teikhawhnak caah Khrih hrimhrim nih bia a rak kamhmi pumkhatte le pakhatte asimi Bupi (Mt. 16:15-18) kha Thiang Thlarau cu zungzal in a sak ko timi fiangtein a lang.
    Bawipa Jesuh Khrih hrimhrim nih a rak dinhmi Bupi cu pum pakhatte asi timi va hman sehlaw, Thiang Thlarau Pathian cu, kha Bupi pakhatte kha a saktu, hmunkhatte asiter mi inn muisam suaitu le cu Bupi pakhatte i nunnak thihripi le nunnak petu bawi (Giver of Life) asi.^{6 John Paul II, “The Spirit of Unity” in the Spirit: Giver of Life and Love, 325.}