TTP cung Sualnak Pathumnak

3. RILHNAK, `TAHNAK, HAWINAK HLEIKHUN UMTU ZIAZA HNA

Thlacamnak le thang`that hlasaknak tuah tikah khuaruahhar asimi tuahsernak hna a chuahnak, tlukrilhnak, `tahhramnak, ngaihchiatnak, i hlawk in lamnak, a lawnmi saram hna bantukin vawlei ah a lawn in lawnnak tiin thil sining hna kha Thiang Thlarau a `tum (asiloah) toihnak asi tiah biatak in zumh le cohlang mi khrihfa cheukhat an um taktak ko. Asinain bible ah cubantuk cawnpiaknak cu a umbak lo. Cuti ningcanglo khuaruahhar asimi umtu ningcang kha Thiang Thlarau a `tum tiah a zumhmi hna cu (Lamkaltu 2:23, 15-18) chung i kan hmuhmi bible kha an rinhchanh `theo. Cu bible cacang chung i kan hmuhmi cu: 

Mi cheukhat hna nih cun, hi mihna hi a thlummi mitsur zu an vuai i an ri tiah sersat in an ti hna. Atu caan cu zinglei suimilam pakua lawngpei asi ko rih hi. Nannih ruahnak bangin zu an ri lo, hi thil cu profet Joel kaa in a rak chimbal  mi thil asi. Zeitindah a ti tiah, Ni hmanungbik ahcun mi vialte kha ka Thlarau ka toih hna lai. Nan fapa hna le nan fanu hna nih bia an chim lai. Nan tlangval hna nih langhnak an hmuh lai i nan tar hna nih mang an manh lai. Ka salnu le ka salpa hna cung hmanh ahkhan cu ni ahcun ka Thlarau kha ka bungh lai i profet kaa in bia an chim lai.

Hi bible kha fawitein an rinhchanh i hleice mi sining pakhatkhat kha Pentecost puaini bantukin a cangmi tiah an ruah mi cu Thiang Thlarau Pathian min kha sersatnak in hmanmi sualnak asi tawn i, Na Pathian, zungzal Pathian i a thiangmi min kha sersatnak in va hmanghlah a timi Pathian Nawlbia kha an theih ko buin an buar ah a cangtawn. Hi bible ah ningcanglo umtu ziaza he pehtlaihin bible bia kaakhat hmanh a umlo. “A thlummi mitsur zu ding i rit bantuk asi” tiah a langhter mi kha ralring tein zohding asi. Mitsur zu ritnak le ningcanglo tuahsernak le biachimnak, `thutdirnak hna cu aa khat baklo pinah, a ralchanhmi sullam a ngeih ti kha kan i cinken awk asi.

Sining hmaanlo mi taksa cawlcanghnak in langhternak, hleikhun mi sining hna he pehtlaihin bible ah a langhter mi a umlo. Asinain khibantuk sining hna kha bible cahlun chungah kan hmuh. Profet Elijah le Baal pathian kha a biakmi hna cu Carmel tlang cungah aho pathian hi dah a nungmi Pathian, a dik ahmaan mi Pathian asi tiah an i zuamnak ah fiangtein hmuhkhawh asi. Baal pathian kha a biakmi hna cu sining hmaan asilo mi cawlcanghnak hna an tuah tawn ti kha cu bible chung bakah a `tial. Hi kong kha  (1Siang. 18:16-40) ah a rak `tial.

Cardinal Suenens cu ICCRO timi International Catholic Charismatic Renewal i lutlai sinak in kum (10) leng rian a rak `tuanmi asi. Amah nih a hlathlai i a cekhlatnak in a hmuhmi hna kha `thatein a khawmh i A Contro-versial Phenomenon: Resting in the Spirit tiah minpek in cauk a rak chuah.²²

Hi cauk cu abikin thlacam thang`hat pumhnak tuah lio ah rilhnak, `ahnak, au khuannak, sining hmaanlo cawlcanghnak hna he pehlaihin, Catholic bupi chung i a ummi Charismatic Renewal he pehtlaihin thil cangmi dihlak kong hna pinah Pentecostal Christian hna thil si tawnmi, cu thilcannak hna kha pumpak telin rian a rak `uanmi hna vawleimi tampi nih an theihmi Pentecostal Revival Pastor ngan hna i kuttongh an chimmi hna kha a khamh i a `ialmi asi. Cardinal Josef Suenens i a hmuhmi konglam hna kha a tanglei ah ka vun langhter lai. <<<< Kan Pehthan Telai>>>>

End Note:

22. Leo-Joseph Cardinal Suenens, A Controversial Phenomenon: Resting in the Spirit (Bublin: Veritas, 1987).