Zeibantuk Mi hna hi dah a Ril Tawn?

Thiang Thlarau

4. RILHNAK. AHNAK HAWINAK HLEIKHUN SINING HMAANLO UMTU ZIAZA HE PEHPAR IN CARDINAL JOSEF SUENENS HMUHNING

(1)NAK; ZEIBANTUK MI HNA NIH DAH AN RIL TAWN23

Cardinal Suenens nih cun phunruk (6) in a `then. Cuhna cu amah pumpak nih `thatein a hal a cekhlat hnuah a lakmi asi. Cu phun (6) hna cu:
(a) Nu pawl hi khibantuk tlukrilh, `tahnak, lawngvanghnak le zunngaih in `tahnak tambik mi an si. Hiti ka chim tikah pa pawl an i tello tinak asilo. Cekhlatnak ningin nu pawl an tambik tinak asi. Hikong hi kannih kuttongh kan hmuhton mi he sining aakhatbak kha kan hmuh.

(b) Lungdermi hna, lung rethei thabatuk mi hna, a theih zong theihlo zongah lung retheinak a ngeimi hna cu pahnihnak a tambik an si. Hi konglam hna hi thinlung le fimthiam hna i an cawn cekhlatnak he zohchih mi asi caah pehtlaihnak a umtuk tiah kan hmuh.

(c) Huatnak le in khawhlo lung a `thawng i, mi pakhatkhat kha siseh, mah pum kha siseh lungfah i a ngaihthiam kholo mi hna, nahchuahnak le a thin a hungtuk mi hna cu a tambik pathumnak an si.

(d) Harnak buainak pakhatkhat lonh dingah voitampi an i zuam ko nain teinak an hmuhlo hleiah, kha harnak buainak ruang i nifate nunnak ah tlamtlinglo teinak hmuh setsai lomi hna zong cuticun an si tawn kha kan hmuh. Bianaah, inchungkhar nunning daitein a umlo siningah a nungmi hna, zu dingtuk mi (asiloah) puarhrangmi pakhatkhat he aa kommi hna, innchuangkhar eidin rawl harnak ruangah siseh, sipuazi tlamtlinlo ruangah siseh, abiapi asilo mi hna, thlanhripi pot thabat zaang batukin rian `tuanmi hna, `tahnak thinlung thinphannak nih a khuhchilhmi hna vialte kha chim duhmi asi.

(e) Kum (18) a tling rihlo mi hna zong an rilve tawn kha nan hmuh lai. Asinain vawleicung ramkip khrihfa bu pakhat cio ah khibantuk rilhnak, `tahnak kha pumhnak i a cheuchum sinakin a tuahtawn mi cheukhat Pentecostal khrihfa hna chungah kan zohtikah, kum (18) a tling rihlo mi hna cu tlukrilh, `tah, zuunngaih phun in `tahnak le saram bang a lawn in lawnnak hna an sinak  a tlawmdeuh kha kan hmuh. Sihmanhsehlaw, a `thangcho rih lomi, sifakmi hmunram hna le ahak a harmi nunnak kha a tanlio mi ngakchia hna ahcun khabantuk sining a tamdeuh kha kan hmuh hna. Ahleice in thabat ngai in pumsa rian a `tuanmi ngakchia hna, `tihnun ral le kokek `tih nunnak hna a tongmi ngakchia hna, thazaang sitermi rawl chanbaumi ngakchia hna, luattein i celhnak nawl le zalong tein lenkai (tlawngleng) nak nawl a ngeilo mi ngakchia hna ah sining a tambik kha kan hmuh.

(f) A dohnghnakbik pakhat cu ngandamnak he pehtlaimi asi. Cardinal Suenens i cekhlatnak ningin, takpum ngandamnak he pehtlaimi nakin, thinlung ngandamnak he pehtlaimi zawtnak a ngeimi hna cu rilhnak, `tahnak, a lawn in lawnnak le zuunngaih `tahnak hna asi tawn kha a langhter. Pawpi zawtnak a intuarmi hna, atu le tu luak hmangmi hna, punghman bantukin lufah a intuarmi hna, mang`halo mangchia a manh thiammi hna tiin zawtnak phunphun a ngeimi hna zong khibantuk an si tawn ve kha hmuh asi.

Cunglei i konglam hna kha thukpiin kan cekhlat tuah ahcun rilhnak, `tahnak, lawnnak, zuunngaih `tahnak hna cu Thiang Thlarau a `tumnak asiloah Thlarau laksawng toihnak asi tiah fektein ruahkhawh asilo kha kan hmuh.

Pehzulhin Thiang Thlarau cu pumsa thinlung thader mi hna kha adangte a thim hna i an cungah a rak `tum timi bible chungah a `tialmi kan hmuhbak lo. Pentecost puaini ah lamkaltu hna he hmunkhat tein thlacam mi dihlak cungah siseh, Rome ralbawi Cornelius inn ah siseh, Thlarau a ra `tumlio ah thazaang dermi hna kha a dang tein a thim hna i an cungah a ra `tumnak le laksawng a toih hna ti a umlo.

Abiapi mi pakhat cu Pentecost ni le Cornelius inn ah Thiang Thlarau a rak `tum ahhin hlankan timhlamhnak a umlo, hlankan theihchungnak zong a umlo. Hmunkhat teah thinlung khattein thlacamnak he thawng`ha chimmi kha zumhnak le taksa thinlung in an ngaihmi lawng kan hmuh. Zeitik caan zeitin phun in Thiang Thlarau a `tumte lai ticu hlankan an theihbak lo i timhlamhnak zong an ngeibak ve lo. 

 #Tuchan ahcun Thiang Thlarau kha zeitik caan ahdah a `tumlai i zeitin phun in a `tumlai ti kha hlankan in an theih i timhlamhnak an tuahnak cu kuttongh in kan hmuh mi pakhat asi. Hi konglam hna cu bible ah cawnpiaknak a umlo hlei ah, Thiang Thlarau Pathian sining he zong aa tonhpehnak a umbak lo kha thukpiin a hlathlai mi paoh nih fiangfai tein an hmuh an theih awk asi.

23.Cardinal Suenens, A Controversial Phenomenon, 19

Add new comment

14 + 5 =