ZUU

Zuu

          Zu kong hi kan Bible ah kan hmuh dih cang i tampi ka ttial ti lai lo. Zu kan timi hi, kan Bible kan zoh tikah, kan din i a kan ritter kho mi paoh hi a chim duh mi asi. Mirang nih Wine, Strong, a tthawng mi ti a si. Cucaah zu rit timi cu, mi he i sik i velh, nu le pa sualnak tuah mi hi, a chim duhmi a si lo. Hihi cu rit zongah tuah khawh a si i rit lo zongah tuah khawh mi a si. Cucaah zu rit timi cu, na lung a thlenter mi khi a chim duh mi a si. Daitein na um zongah na lung a thleng ahcun rit a si ko. 

              Pathian nih zeizong vialte a ser, a zoh, a lung a tling i, thluachuah a pek mi chungah, zu zong aa tel vi mi asi ( Gen;1:21-22, 29,9:3). Asinain, Pathian nih a ttha mi le a ttha lo mi he a ser caah, zu nih tthatnak a pekmi kha, Biakamhlun, Biakamthar chung zudin a tthatnak kan hmuh. Cun tthatlonak tampi a pek ve caah biakamhlun, Biakamthar chuangah zudin a `thatlonak kan hmuh ve.  (Efs. 5:18) chung i kan hmuhmi cu, zu rit hlah, zu cu nanmah hrawktu a si. Adang cu, pumsa nunnak lawng a hrawh i zu cu, pumsa nunnak le thlarau nunnak he a hrawk. Cucaah thil tthalo lam ah a kan hruaitu cu zu a si. Pathian fa kan sinak chungah Pathian lung a kuaitertu cu zu a si. Laimi hi Khrihfa ram kan ti i Laimi le zu hi a tthen kho rih lo. Athiangmi raithawinak a tuah ding a si caah Pathian nih Aron cu, a tefa chan tiang zu nan ding lai lo a ti hna ( Lev.10:8-9). Minih zohchunh awk Nazir mi cu, zu nan ding lai lo a ti hna ( Biaceihtu; 13:3-4,7,13-14, Nambar 6:1-2, I Samuel 1:14-15, Ezekel 44:21, Lk 1:15). Zeicah tiah, sualnak lei hruaitu a si. Noah a fapa chiat a serhtertu cu zu a si ( Gen; 9:18, 21-27). Lot a fanu a sualpi tertu cu zu a si ( Gen 1119:30-36). Sualnak hme nih sualnak ngan lei ah a hruai ( Jeim 1:15). Cu bantukin dinnak nih ritnak lei ah a hruai ve.

              Bul thawi eidinnak kongah, zu nan din, nan rit, mi tluk rilhter hna ahcun, Pathian cungah nan sual a ti (1 Kor; 8:12). Dinnak cu ritnak lei a hruai i ritnak cu kan thlarau a thi ter, sualnak a si i Pathian Pennak a co kho lo ( 1 Kor-6:10, Gal;5:21). Khrihfa kan sicu, Pathian Pennak co ding asi. Pathian bia nih zu a rimi cu Pathian pennak a co lailo ati fawn. Cucaah, nihin nitiang, dinnak cu sualnak a si lo. Ritnak lawng sualnak a si tiin, zurit hi kan tlaih peng ahcun, Khrihfa kan si hi man ngei lo a si sualnak hngalo, zu hi kaltak cang usi law, Pathian duhnak tu kha i ukter cang hna u (Rom 6:14, 1 Pet 4:2). Zeicah tiah atu cu Lawki si ti loin , Khrihfa kan si cang (Rom 6:19, Gal 4: 8-9), 1 Pet 4:4). Cucaah Khrihfa mi cu sualnak le sualnak lei hruaitu lampi cu na hrial lai a ti  (mt-5:29-30, Pro. 23:29-32). Cucaah zurit cu, kan thlarau a thi, sualnak a si i, dinnak cu sualnak lei hruaitu a si caah, kan Bible nih din zong a duh lo i rit zong a duh lo ( Mt; 24:49, 1 Pet 4: , 5:11, 22:13,56:12, Hose-4:11).

By Saya John Min Hu