Aa khatmi Sinak

Niamdeuh taktak maw?

Pa le nu hna cu aakhatmi an si

Pa le nu hna cu aakhat mi an si. Aruangcu annih cu minung timi sinak ah aakhatmi minung an si veve. Asinain minung tuanbia ah nu hna cu pa hna i thleidan namnehnak kha an rak ing.

Nuhna cungah chiatkhat hmuh ruahnak

Aristotle nih nuhna cu lenglei muisam lawng siloin thinlung lei zongah a dermi an si. Mah nu cu kokek ningtein chambau mi taktak an si tiah nuhna kha a rak hmuh hna.

Tertullian- AD. 200 hrawng, nih nu pawl cu khuachia vanghru hna an luhnak innka an si, arak ti. Cuhleiah vawlei hramthawk minung hna an tlaknak le Pathian Fapa thihnak a rak innak cu nu ruangah asi i minu ah `tuanvo a ngei tiah fiangtein a rak langhter. 

Pythagoras, 6th BC. zong nih, pa pawl cu daihternak he siseh, ceunak he siseh pehtlaihnak a ngei i nu pawl cu ningcanglo sinak he siseh, mui padupnak he siseh pehtlaihnak an ngei tiah a rak zawmtaih.

Sheobinhower zong nih nu pawl cu theih hngalhnak a tlawmmi an si tiin a rak ruah ve. Amah nih biaceih zung ah nunau pawl hi tehte caah chuahpitlak an silo, nu pawl cu a ding le a dinglo an thleidan thiamlo a rak ti. Annih cu `thitum lehthahnak puai i an tlawmh hna tikah `thi`thet fung le hri kha an tlawmh tawn hna, cuti an tlawmhnak cu nu pawl ruamkai kholo dingin hri in fekte `tem hnu ah `thi`thet fung he tukin chimh hrinnak caah asi tiah a chim.
    Nietzshe nih a hmuhnak ah ‘nu vialte cu kokek ningtein sal bantuk an si i an `tumchuk a ti.
    Hi ruahnak le hmuhning hna cu kamkhat lei lawnglawng hruhchih mi hmuhnak hna an si.

Bible hlunchan hlanlio Judahmi hna le nu pawl nawlngeihnak

Cu chanlio ah nu pawl cu pa pawl nakin an `tumchuk deuh tiah an rak ruah. Cu chanlio ah Judahmi pa pawl nih nu pawl cu pumpak ngeihmi thilri bantukin an rak chiah hna. Amah a nun khamhnak caah a herh ningin hmankhawh a rak si (Gen. 12:12-20).

Nu pawl kha minung pakhat sinak cazin ah an rak khumh hna lo. Pumpak thilri he hmunkhat in cazin an rak khumh hna (Gen. 18:9).

Sualnak cu nu nih a tuah hmasa i cu minu ruangah thihnak kan ing (Ecus/Sir. 25:24).

Biaknak lei thlacam biaknak zongah nu pawl cu sal hna, ngakchia hna bantukin zinglei thlacamnak (the Shema) cam le chimnak nawl an rak  ngeilo. Rawlei hlan le rawl ei khawh thlacamnak zong an rak tuah lo. Jahudi Bible (Talmud) ah hitin a ti; “A nupi le a fale hna nih amah caah thla an campiak ahcun chiatnak tlung ko seh” tiah a langhter. Judah biakinn zongah nu le pa an `then hna.

Mi zapi hmaiah nu he bia i ruahnak kha an hrial cio. Bible thiamsang (Peter Ketter) nih hitin a langhter.

“Rabi bible thiam saya pakhat nih cun mi zapi hmaiah nu he biaruahnak cu a limhang he aatlaklo i thangchiatnak a si kho” tiah a ruah.  

Cu lengah nu pawl cu biaceih zungah tehte chuahnak nawl an ngeilo. Nu pawl cu anmah zalonnak ningin an duhmi nunnak kha sernak nawl an rak ngeilo. A pa nih siseh, a vapa nih siseh an rak uk hna. Nuhmei asi ahcun a vapa i a nau, asiloah a u nih a uk tiah a langhter.

Vapa pakhat cu nupi tampi a `thitkhawh nain, nupi pakhat cu va tampi a la kho lo. Vapa cu nupi kha `then ding a fawituk ko nain nupi cu vapa he `thending a rak fawilo.

Fapa le tampi a ngeimi nu le pa hna cu thluachuakmi an si tiah an rak ti hna. Fanu le tampi a ngeimi nu le pa cu vanchiat mi an si tiah an rak ruah.
 

Add new comment

8 + 0 =