Chimmi bia karhter hlah

Fale Chrimhrinnak

Fale chimhrin tikah mah pumpak hrimhrim kha zohchunhawk tlak si a herh. Cuti lawngah mah chimhmi bia cu teinak a hmuh lai.

            Voikhat ah aa porhlawt thiam mi ngakchiapa pakhat cu lamcung in innchung lei ah a rak le i hitin aa porhlawt, “Ka nu, ka nu... chizawh fate a hringka mi ka hmuh, kan uico tum tia asi” tiah a nu kha porhlawt in a chimh. A nu nih a fa kha hitihin a chimhhrinh, ‘Ka fapa’ bia na chim ahcun na karh lai lo, na porhlawt lailo, tiah atu le atu kan chimh lo mei? ‘voi thongnuai hlei a reng tilo’ tiah a ti. Hi nufa an pahnih tein an biachim a karh mi kha kan theih.

            Hipa a nu bia hi fale chimhhrinnak ah teinak a hmu kho lailo. Voikhat zanlei sang ah Mahatamah Gandhi sinah nu pakhat nih a fate a rak hruai. Cu minu nih Mahatamah Gandhi kha ka fa hi a thlummi tamtukin a ei, a ngandamnak a hnursuan lai ti ka phan caah hi ngakchia hi ka chimhpiak tuah tiah a nawl. Gandhi cu tlawmpal aa ruat hnu ah a hnu zarhkhat ah ra `than te, kan chimhhrin piak telai tiah bia a tiam.

            A hnu zarhkhat rauh tikah ah le a fate cu Mahatama Gandhi sinah an rak phan `than. Cutik lawngah Gandhi nih ngakchia kha a thlummi tamtuk eilo dingah le a thlummi tamtuk ei ruangah a `thalo mi chiatnak hna kha a fianh piak.

            Ngakchia i a nu nih ‘Sayagyi nih hite menmen chimh dingah zeicah zarkhat thengtheng caan na kan rauhter’ tiah a hal i Gandhi nih “a hnu zarhkhat nan ratlio ah keimah zong a thlummi tampi ka ei ve. Cucaah pumpak hrimhrim nih ka thazaang a dermi kha midang remhter dingin ka duhmi asilo. Asinain atu ahcun zarhkhat chung keimah zong ‘a thlummi’ luantuk in einak kha ka sum hnu ah hi ngakchia kha a thlummi luantukin ei hla tiah ka chimhhrin” tiah a leh. Mah zaangdernak kha i remh hnu ah midang zaangdernak a remhtu cu `thawnnak thazaang (power) a ngei, teinak a ngei. Cu thil ruangah Mahatamah Gandhi cu mitampi i upatnak kha a rak co.