Chungkhar kong

Chungkhar dawtnak

NUPI ~HA

                                                                     

Norbert Ca Ling-OSC(Hakha)

 

          Innchungkhar pakhat ahhin a biapi bik cu nupi le cio hi an si. An vale an hmuhmi le an chuahpi mi lawng i rinh in zeitindah ka hloh khawh lai ti rumro aa zuam mi nupi le cu nupi `halo an si i an chungkhar an si a fak. Nupi le khuasak tintuk a thiammi innchungkhar cu zeitik hmanh ah an si a fak bal lo. An si a fah bikah hawitluk tal in an nung kho.

          Nupi `ha le nupi chia tiah `hen in kan vun zoh hmanh lai. Zeibantuk khi dah nupi chia cu an si lai, ziah keimah le ka duhdawt bikmi in pei kaa thim i ka `hitmi a si cu, ka nupi hi nupi chia tiah na tikhawh lai, tiin biahal nak na tuah kho. Asi, a hmaan ko. Tuchan ahhin Pa pakhat nih nupi a kawl tikah a duh lomi cu a `hi bal lo. Asinain a `hangcho mi chan (IT-chan) kan vun phak tikah pum pak i hmuh bal lo le ziaza dikthliar in i hngalh lo buin phone i chawnh, ca i kuat nak menmen in aa `hi ummi zong an um ve ti kan hmuh. Nu belte hi hlan chan ahkhan an duh lo zongah an nu le pa, an chungkhat nih an hnekchih tawn hna. Tuchan ahcun hnekchih hau ti loin tlangval le ngaknu anmah pahnih an i duh ko ahcun tlikpi le fir ti bantuk a tam ngai. Kan lai nunphung a buar mi kan tampi cang tinak a si.

          Pa pakhat nih ngaknu pakhat a `hit tikah, a duhtuk i a `hitmi zong a um lai i a fel ruangah a `hitmi zong a um lai. Nu pakhat aa dawhtuk kan timi khi zei bantuk khi dah kan ti hna, a mui aa dawh, a sam a `ha, a tungtai aa rem mi hna pawl khi aa dawh ti a si ko hnga lo maw? Mah dawhnak kha cu lenglei dawhnak lawng a si kho men. Ziaza `hatnak, thinlung `ha ngeihnak le umtu ningcang `hat nak le dawhnak zong zohchih a herhnak kha Pa tampi nih kan philh tawn. Pa pawl hi zapi zaran cu lenglei dawhnak nih hin a kan molh tawn.

          Atu chan ahhin cun pakhat le pakhat i duh lo ahcun i `hitum tihi a um lem ti lo va si kaw, Pa pakhat nih nu pakhat kha aa dawh ruangah duh cia in a helh a si ahcun mah minu a `hatlo nak kha a hmu kho ti lo. Bia`ha a chim zongah bia chia a chim zongah a duhchih dih cang. Chiatnak a tuah zongah a duhchih dih cang caah a maimilh piak dih. Mah minu cung i a `halo mi khi cu chim lo, an arhli a hmul kawng dih mi le an vokpi a dertuk i a khawm-ruh le a kengruh bo liangluang i a chuakmi hmanh khi, aa dawh ngai in a hmuh i minu a duh ruang ah a duh chih. Uico sehhrang ngai mi hmanh kha a duhchih i mah minu duhnak tuah le zulh lawng kha aa zuam cang. A helh chin a duh chin, ahnu ahcun mah nu hmuh loin a um kho ti lo. Tlangval pa thinlung chung cun mah minu kha a `hen kho ti lo. Thingtum leh lawng nu leh lawng, tiah a `hit khawh ve.

          Cun pakhat a um kho rih mi cu nu lei nih tlangval pa kha a duh hmasa ai. Sihmanhsehlaw pa nih khan cun a duhtuk lem lo nain nu nih khan a vun hleh ciammam i zeiti tuah awk a `tha ai lo. Kuva te a vun cawkpiak, lakphakti le changreu te a vun dangh, viber le message in a hei sawm lengmang. Cuka dawr, khika dawr ah a chozi te, a kik haangte thawkin pekkhat, pekhnih te a vun ti i an ei `i an ding `i. Cu vialte ngaknu nih `uanvo a vun lak dih. Ahnu ahkhan cun a thil vialte a vun sukpiak dih i a vun `eihpiak dih. Sa`al ngai in tlangval pa aa chawk cang ai. Zan ah puai kal le video zoh hna a vun sawm lengmang i zan`im le khuamang ah an `in `i. Khuahnu tuk hna i an `in chel ah an inn riak ding hna a vun sawm caan a um tikah cun nu le pa kan ti cu khua fakpi in an ruat kho ti lo, pa zong lam hlapi tiang a hmu kho ve ti lo, khuaci an mui cang i a hnu tlawmpal ahcun mah hna pahnih `hitumnak puai an tuah ti thawng kan theih cang.

          Chim duh mi cu i helhnak le i `hitumnak kong siloin a nuam mi innchung khor khar si ding tu deuh kha a si. Nu le va timi cu an i hmuh an i ton ning aa dang cio ko lai. Zeibantuk in an va i ton zongah nu le va an si cang ko i nupi ngeih hnu le va ngeih hnu cun ka nu le ka pa sinah ka um peng ko lai, ti awk a `hat ti lo caah mah tein i cawm a hau cang. Vawlei cung i kan nunhnawh chan mi hi kan paw ca a si ti usih law kan palh lai lo. Pathian theihlo ahcun vawlei cung kan nun hi pakpalong a si ko. Minung a si mi paoh nih Pathian kan ngei cio i kanmah le Pathian cio cu kan biak .

          Pathian `hatein biakkhawh nak dingah, nupi le zong hi biapi ngai a rak si ve. Nupi le hi amah pumpak in Pathian hngalhcia a rak si ahcun mah innchung khar cu a nuammi innchungkhar a si ko lai. Kan Chin mi chung ahhin Pathian a hngal mi zatuak 90 hrawng kan si men lai nain Pathian a hngal taktak mi hi kan tlawm ngaingai.

          A cheu Khrihfa cu Pathian hi kan zumhtlak, kan hngalh tuk cang caah amah dir hmun i a dir mi zong kan um. Nang cu mithi na si, vancung ram na kai lai lo, ti le mah Khrihfabu cu mithi bantuk an si, vanram an sung lai a timi hmanh kan um rih. Vanram kai le kai lo cu Pathian lawng nih a ceihte ding va si kaw, Pathian dir hmun i kan dir tikah Van le Vawlei sertu ko khi kan lo. Hi ban-tuk pawl hi Nu pawl deuh hi an si tawn. Zeicah kan ti ahcun hlen thiam Pastor pawl i hlennak kha biatak in an i zumh caah a si lai. Mah Pastor le Evangelist pa zong cu tinhmi pakhat khat a ngeih ruangah a si i a hnu ahcun amah lila zong nih a zumh beh ve. Hi bantuk hlen thiam phungchimtu (nal prophet) hna ruang ah nu le va aa `hen mi zong an um.

Add new comment

5 + 0 =