Chungkhar Lamthluan

Pakhat le pakhat thazaang i peknak

Nu le va hna cu chungkhar kong nunnak lamthluan ah harsatnak tampi he an tong hrimhrim lai.
Cutikah, caan khatkhat cu lungdongh le hnabeidongh caan zong a umko lai.
Pakhat a lungdongh caan le hnabei dongh caan ah pakhat nih thazaang pek thiam a herh ngaingai. Pakhat le pakhat i pehnak cu chungkhar kong ah fahnak hna, harnak hna lonhnak ah tampi a bawmh.

Cucaah Paul nih, “Pakhat le pakhat i bawmh uh” tiah (1Tesal. 5:11) ah forhfial in a chim.

American tuanbia `tial minthang sayakyi Nathaniel Hawthrone cu a min a rak langh setsai lo hlanah a rian a sungh ruangah fakpiin a lung a rak dongh.
    Amah cu rianngeilo asicaah lungnuamhlo ngaiin a um tikah a nupi Sofia nih a rak theihthiam piak i thazaang a rak pek. Sofia nih “Ka dawt aw lungnuamh loin um hlah! na `tial duhmi, thazaang na ngeih deuh mi tuanbia hna kha teirial in `tialchih ko. Chungkhar eidin kongah phanghlah. Keimah ka khon mi tangka tein chungkhar eidin hrukaih caah cun a za ko lai. Ka dawt, a `thabik tuanbia na `tialkhawh te ko lai, tiin hnemhnak thazaang a rak pek. A nupi Sofia hnemhnak thawngin Natheniel Hawthrone cu a tha a tho `than colh. Zumhfeknak, ruahchannak khatlak he tuanbia hna a `tial`than i a rauhhlan ah tuanbia `thabik a rak chuah kho i vawleicung minthang ca`tial thiam sayakyi ah aa chuah.

Nu le va nunnak ah pakhat le pakhat hnemh le thazaang i peknak in teinak nganpi hna hmuhkhawh asi. Pakhat a lungdongh lio caan le teinak a hmuhlo caan hna ah a dang pakhat nih hnemh loin sualphawt bia chimnak te hna cu santlaimi asilo. Harnak lawng a chuahter chih.

Pakhat le pakhat i hnemh le thazaang i pekthiam a hau timi philhhlah u sih. Zaangfah a thlummi thazaang peknak bia hna cu ngaih a nuam i thazaang a siter taktak. Zaangfah mi thazaang peknak bia cu dawtnak hmelchunhnak a si i “Dawtnak nih a sersiam hna” (1Cor. 8:1) a ti.

Chungkhar i harnak ton caanah pakhat le pakhat mawhchiat, ralser mi nakin, pakhat le pakhat dawtnak in tazaang pek i hnemhnak lawng cu santlaimi asi. Mizeipaoh nih zaangfah mi, ngaihnuam mi bia lawng theih an duh cio mi a si.

“Lehnak neem nih thinhunnak a damter. Biahrang nihcun thin a phawh, `thatlonak a tuahtu lei nih lungthin kha a khuai tawn” (Phungthlukbia. 15: 1-5).

“Biathlum cu khuaihliti bantuk a si, nunnak caah a thlum i pum caah damnak asi” (Phungth. 16:24).

An rumko nain duhdawtnak a ngeilo mi innchungkhar cu a nuam mi innchungkhar an si ballo. Mi sifak an si ko nain zaangfah zawnruahnak a ngeimi innchungkhar tu cu a dai i a nuam.

“I sik lengmang bu in puai tuahnak inn i umnak chacun daite i buh`hing peikhat ei a `thadeuh” (Phungth. 17: 1-2) tiah a ti.

1.c; Pakhat le pakhat aatluk tein i komhnak

Nu le pa cu an i khat. Pathian mithmai ah annih cu aakhat mi huham, aakhat mi `thawnnak an ngei. Curuangah mithiang Paul nih nu le va cu pakhat le pakhat i nawlthiam uh tiah (Efs. 5:21) ah a forhfial. Pakhat le pakhat upatnak in aatluk ruangtein i komhnak in chungkhat kongah tlam a tlinter deuh.

Theihthiamnak a karhter deuh. Keimah cu ka dawtmi he kan i khat bangin ka dawtmi zong keimah he kan i khat timi thilhmaan kha nu le va hna nih i tlaihpeng ding asi. Pakhat le pakhat mah pum bantukin i dawtnak timi cu pakhat le pakhat, khat le khat mah pum i dawtnak bantukin aakhat, rengkhat dawtnak kha asi. “Nupi upat hmaizah, ha a tlonglo” timi phungthluk le “Nupi le caw zaangfah awk asilo” timi phungtlukbia a pahnih tein hrial awk asi.

“Nu le pa hna cu ahohmanh  a reng a sangdeuh lo i a niamdeuh hlei an umlo. Minung sinak ah an i khat dih. Pathian fa sinak zongah i khat dih asi. Ca`tialtu Saya pakhat nih bible chirhchanh in a tanglei bangin biatlang a rak kawmh. Nu kha pa hnakruh in a rak ser. Nu cu pa a lu in a sermi asilo ruangah cunglei ah chiahding an silo. Nu pawl kha pa hna ke in sermi an silo caah ke i lamhchih ding an silo. Anmah cu hnakruh in sermi an si caah aatluk tein komh awk an si. Bantang in sermi an si caah zohkhenh kilven awk an si. Cu ca`tialtu saya nih abiapiin a chimduh mi cu pa le nu hna cu an i khat tiah a ti duhnak asi. Cucaah khat le khat upat le dawtein i komh ding asi. Pakhat le pakhat upat peknak cu chungkhar kongah teinak tawhfung pakhat asi. 

#Ca lehmi