Hmual a ngeimi Rosary

TEHTE KHAANNAK

(Rosary huham kong tehte khaannak)

Tehte khaan ni-   26 July 2022 (Parent’s Day- Nu le Pa puai ni)

Keimah hi Baptist khrihfa ka rak si i Catholic Bupi (RC) a dohmi, a huattu ka rak si. Vailamtah hmelchunhnak tuah te hna, Rosary cam te hna hi ka huattuk. Asinain, nupi ka ṭhitmi hi Catholic  a rak s ii bu kong ahhin kum (17) chung buaingaiin khua a sami chungkhar kan rak si.

(1)       Kan nu cu Catholic Biakinn ah pumhter tiloin Baptist Biakinn ah kum (6) chung rumro (aana) in ka rak pumhter i ahnu ahcun Catholic Biakinn ahcun aa pum ṭhan. Kan nu hi Rosary cam a duhtukmi a rak si i nikhat ahhin voi (200) lengmang a cam pinah September thla ni (8), Bawinu Mary chuah ni khi cu voi (1000) a cam zungzal. Kum (10) chung sakta kan um lioah a rak cam pinah Hakha kan i ṭhial kan um hnu zongah kum (8) chungtlolh lo tein a cam peng rih.

Kan nu hi Biaknak dang lehthahnak (mix marriage) in leh kaa thahpi i lehthahtu cu Fr. Paul Thla Kio asi. Fr. Paul Thla Kio nih a ka chimhtakmi cu Pathian nih khuaruahharnak an hmuhter te lai a ka ti.

Lehthah hnu zongah saupi tiang bu dang (Baptist) ahcun ka um ko rih. Ka thin a hungtuk cang i voikhatnak ka tuahmi cu;

Kan nu thlacamnak ṭhi (Rosary ṭhi) kha ka la i ka hlonh lai, tiah kaa tim i, cutikah ka hlonh kho lo; pakhatkhat nih ka kut a ka tlaih bantuk khin ka um. Ka hnulei kaa mer i ka zoh, ahohmanh an um lo. Ka ṭih i hlonh ngam lo in, athuh tuin hmunking ah ka thuhpiak. Mah caan zong ahcun biahalnak le thinhun loin thla cu a cam peng i ka khuaruah a har ngaingai. Ahnu ahcun Rosary ṭhi cu a um tawnnak kel ah ka chiahpiak ṭhan. Mah zong ahcun biahalnak um lo tein a cam ko.

(2)       Avoihnihnak rawl-ei lai thla ka cam dih in, vailamtah hmelchunhnak (PA, FAPA, THIANG THLARAU) na tuah ahcun na til le zang na sawh lai tiah ka fapa Than Hei kha ka rak ti. Asinain lunglawm tein an nufarual rawl cu an ei ko kha ka hmuh hna tikah ka ning a zaktuk i kaa ngaichih i an hmaite hmanh ka khap hna lo; sihmanhsehlaw ka sual ticu kaakhat hmanh ka chim duh lo.

(3)     Nikhat cu lo ah ka riah lioah zanthum (3) chung Vui nih a ka nenh tiah ka mangphun, ka cangphun in ka um. Ka thiammi vialte chuahdih in thla ka cam ko nain aa hlei lo. Zanthum chung mah tining cun ka um ko rih. Ka ṭihtuk caah inn ah ka tlung. Ka kal ṭhan ahcun Rosary ṭhi kha kan hlang hna tiah ka ti i lo ahcun kaa phurh. Mah zaan cu lothlam innka pawngah Rosary cu ka thlai i ka it. Zarhkhat chung zeibantuk hnahnawhnak umlo in daitein ka um.

         Ka lung cu aa tuaituk cang; ahnu ahcun Catholic ah kaa pum ve canglai tiah ka ti hna i an ka let lo. Asinain keimah kaa ruahning ahcun an lung aa lawmtuk lai i, zarhte zaan cu “Ar” kan that lai. Zarhpi zing ei dingah tiah ka ruah ko nain zarhte zaan cu a phan i “Ar” kong cu an chim ti lo. Zaan cu ka it, deilei suimilam pali (4) hrawng ahkhin Sahngar nih kan Ar a ti liomi cu a seh i a kaltak. Zingka ah ka fapa nih 'ka nu, Ar a ti liomi kha Sahngar nih a seh i a kaltak' tiah a nu cu a chimh kha ka ihnak in ka theih i “Halleluijah! Sahngar a ṭha” tiah fakpiin ka au.

(4)     Catholic khrihfa ka um hnuah Bishop Felix Lian Khen Thang le Siangbawi pathum (3) cu kan innte ahcun an lut, thlachuah an kan pek, ka lung aa lawmtuk i nihin ni ah kan cotawk thluchuah cu kan hmuh.

  Acung lei i langhter mi hi Hakha peng Sakta khuami John Dar Cin le Theresa Ni Cer nuva hna nih 26 July 2022, Nu le Pa puai ni, Hakha St. Joseph Cathedral ah tehte an khannak kha atawinak in ka langhter ṭhanmi asi.

Norbert Ca Ling (OSC)

Hakha Diocese

27 July 2022 (Mon).