Khrih Bawipa le Nupawl Nawlngeihnak

Nu hna cungah Mithiang Paul hmuhning

Mithiang Paul nih a rak `tialmi cakuat hna chungin bible cang cheukhat kha an langhter i cheukhat nih mithiang Paul cu nu pawl kha pa pawl nakin a dot niamdeuh in a rak chiah hna tiah an soisel.

Sihmanhsehlaw, bupi kha khamhpiak in a chimmi bible thiamsang hna nih mithiang Paul cakuat hna kha ahmaan ningtein theih i a sullam kan leh ahcun mithiang Paul cu a dot a thleidan mi asilo tiah amah leikap in an khamh i an rak dirkamh.

Mithiang Paul nih nu hna cu pa pawl he aakhat in Pathian rian`tuan an si tiah a langhter (Fili. 4:2-3).
Nu pawl cu hlan khrihfa phu ah min langmi hruaitu hna si awkah telnak nawl an ngeihnak kong a `tial (Rom. 16:1).
Mithiang Paul nihcun nunphung, miphun, biaknak a dot thleidannak kha a rak doh (1Kor. 12:12).

Khrih Bawipa le Nupawl Nawlngeihnak

Bawipa Jesuh Khrih cu minung kip zalonnak huham duhdanh lo; aatluk tein a sinak kha a cawnpiak i nupawl kha hmasabik tehte khannak nawl a rak onh hna (Jn. 20:11; Mt. 28:9).
Jesuh Khrih cu Judah miphun upadi ningin nupawl phungning in tehte khannak nawl a rak umlonak kha ralchanh in nu leikap in a rak dir.

Mi zapi hmai i nu pawl kha biaruahnak cu limhang a zormi rian, aatlak lomi rian asi tiah Judah mi nih an ruahnak kha Bawipa Jesuh nih minung le minung zei rello in thuhphenhnak phunglam kha a ralchanh in a sualmi asi tiah an timi nu hmanh kha mizapi hmai ah duhdawtnak a rak langhter. A sual mi kha thuhphenh mi nakin dawtnak in remhmi nih aatlak deuhnak a rak langhter (Lk. 7:47).

Fa pakhatte lawng asimi nuhmei nu fapa zong kha a `thawnnak in a rak nunter piak `than (Lk. 7:11-17). Cuhleiah nu pawl kha pa pawl he a dot thleidan loin dawtnak a rak langhternak kong Bible chungah tehte tampi a um rih. Minung vialte hi Pathian nih amah muisam he aalo mi in ser kan sinak kha meivan a rak pek. Nu hna cu pa pawl he aatluk, a reng aakhat timi chimphung hna 

Khrihfa bible lei thiamsang Mondine nih;

Chim cawklo man ngeihnak le zungzal tung leiah kaar a hlanlio mi miphun hna aiawhtu (kuzale) asimi mi pakhat cio cu biapi in upat peknak, biapi in ralrinnak, biapi in dawt deuhnak he aatlak mi an si. Mah pumpak siseh, midang zong siseh upat awk hrimhrim a herhnak kong, zeicah tiah kannih vialte cu miphun, biaknak, kum le khua, mipa, minu, nunphung, ngandamnak thleidannak umlo in kan i khat dih; man kan ngei dih tiah a rak chim.

Chiara Lubich nih;
Kannih caah pakhatnak dot minung timi a umlo. A dot niamsang, a cuar muici (a rang, a nak) thleidannak zong a umlo. Khoika hmun paoh asiah minung vialte hi pumkhat kan si dih.

Pope Pius VII zong nih pa pawl ban tluk in nu hna zong a dot an `tumchuk lo tiah a rak chim. Amah nih a chimnak ah Pathian fale asimi mipa le minu hna cu annih pumpak he pehtlaimi limhang ruangah an i khat. ‘A ruang cu annih cu Pathian he zungzal an i komh in vancung nunnuamhnak co dingah aakhat mi a hnubik kawltung an i ruahchanhnak ah pehtlainak an ngeih caah asi.

Pope John Paul II nih Pathian i Nu Mary thawngin nu pawl huham a sannak a tahchunhmi cu, “Bianaah Bawinu Mary cu nu vialte lakah thluachuakbik nu asiahcun nu vialte zong hi thluachuak nu an si dih” tiah a chim. Apeh rih mi cu;
Pa hna nih keimah timi le ruamkainak ruang i atuletu a chuakmi nuhna thuhphenhnak kha ralchanh in dohpiak ding `tuanvo a ngei tiah a chim.

Hlanchan he tahchunh ahcun tuchan nupawl nawlngeihnak cu tampiin a `thancho cang ko nain vawleicung i hmun cheukhat hna ahcun nupawl nawlngeihnak a sungpeng rih. Nuhna zuarnak, sersatnak, miaknak (sipuazi) caah hmannak hna kha atuletu kan theih. Cu thil sining hna caah Catholci Bupi nihcun a ngaihchiatnak kong Vatican II pumhnak nih a chimmi cu “Minung a hran nawlngeihnak kha vawleicung tahning in upatlo, an zulh rihlo mi kha kan ngaih a chiatuk. Tahchunhnak ah nupawl nawlngeihnak le zalonnak asimi `hitvat dingmi thimnak nawl an ngeihlonak, fimthiam cawnnak nawl, mivialte he pehtlaimi nawlngeihnak hna kha an fehter lomi hna an si” tiah a ti.