Mino le Kawltung (Chunmang)

Mino le Kawltung (Apeh)

Keimah ka ngakchiat lioah si ka rak duhmi cu ralbawi asi. Ka pa i thapeknak, ralkap. Ralbawi hna kha ka tlaihchan hna nak ruangah ka upat tikah ralkap ka tla lai. Ralbawi siding ka tuah lai timi cu ka chunmang a rak si.

Ahmasabik Bawipa Thisa ka laklio caan, Thiang Thlarau thapeknak caah Pathian bia cawnnak ka kai lioah, Biakinn le Siangbawi, Sister hna he naihniamnak ka rak ngei.

Ahnu ah mino pakhat sinakin biaknak chung luh in ka rak cawlcangh tik ahcun chungmang thar pakhat a ra lutṭhan.

Nikhat cu Sister pakhat nih caan khatkhat ah zeidah si na duh tiin a ka hal. Ralbawi si ka duhnak cungah ka lung a fek. Asinain, Siangbawi siduhnak lungthin zong fiangset loin hnihsawh hram a thawk. Siangbawi canding cu a hartuk tiah ka hngalh caah ka phuang ngam deuhlo.

Ka rak lehmi cu; Ni khatkhat ahcun, ka liang cungah arfi he nan ka hmuh le hmuh. Nan ka hmuhlo sicun Siangbawi angkifual he nan hmuhte ko lai, Sister.

Tanghra ka vun phanh tikah khi kawltung pahnih cu thazaang an rak ṭhawng ngai cang. Pakhat kha ka vaa thim lai. Ka pa tu cu a fale ralkap tlakding kha asi. Amah zong khitluk tiangin a lungṭhawng mi asi. Ka ule pathum hna nih ralkap an lut dih cang.

Tanghra ka vun awn tikcun ralbawi cawnnak phit ding kaa timhtuah. Khilio caan ah keimah cu Phyapon Parish i mino pakhat va sinak in lungtho tein aa telmi ka si. Hmunṭhu Siangbawi asimi Fr. Eugene nih Siangbawi cannak sianginn kai ding tha a ka pek. Tha pektu pakhatte asi.

Thanghra camipuai ka phithlan Nyaunglebin Bawinu Mary puai ah ka rak kal ve. Nu Mary lungkua hmaiah Rosary voi (10) te ka cam i thla ka cam.

Keimah cu camipuai phitding ah timhcia ka silo. Nu Mary lawng kan bochan ko cang lai. Keimah thla ka cammi cu; Nu Mary, tanghra camipuai kha kumkhat bakin awn dingah ka bawm tuah. Ralbawi si ka duhko. Bianaah ralbawi timi cu kei ka caah a rak silo ahcun na ka pekding mi thluachuah cu Siangbawi canter dingah thlen in ra ka hmanpiak ko tuah; tiah thla ka rak cam. A umtuning cu abiapi in ralbawi sinak ding ca thla ka cam ko nain, ka thlacamnak alak silo dingin khi thlacamnak kha thlenpiak dingah thla ka rak cam cu asi.

Cu kum bakah veel thawngin tanghra cu kumkhatte ah ka rak awng. Ka pa nih ka ca zoh ningcang a lung silo caah tanghra na awngbal lailo, a rak ka tibal. Mikip nih tanghra ka awn kha an khuaruah a har dih. Ca a fir caah a awngmi asi ko lai, tiah a ka ruahmi zong an ummen ko lai.

Sihmanhsehlaw, kei ka zumhnak nihcun, Pathian ka halmi le cafirmi kha aa pehin tuahkhawh asilo, ti a hngalh. Pathian kha thlacam sicun, Nu Mary kha bochan sicun, dinfelbik in kaa zuam ding asi. Ahmaanlo mi kha peh in tuah hnuah thlacam sicun a tlinglo mi a tam.

Tanghra ka hun awng tikcun, ka pa kha ka chimh. Ralbawi cawnnak kumkhat lawng ka phi lai. Ka sungh sicun Siangbawi ka va ṭuan lai, tiah hlankan in ka chimh. Culio i ka rak chimhmi kha ka pa nih fektein a rak zumhlo.

Ralbawi cawnnak cu a ṭhabik in kaa zuam i ka rak phit nain thim ka rak silo. Ahnu kumkhat phitṭhan khawh ka siko nain ka biahren ningin Siangbawi cannak sianginn kha ka pa a hnatlakpi lo buin ka rak kai.

Kawltung pahnih he keimah cu, atu ahcun tinhnak kawltung pakhatte cung lawngah kaar ka hlan cang.

Siangbawi canding timi kawltung cu ka caah fiangsetlo asi. Asinain ka rak i thimhnu ahcun fiangsetsai loin kumkhat hnu kumkhat kaar ka rakhlan cu asi. A fiannak umlo mi kawltung, nulepa chuahkhat unau ṭafar hawikom hna nih thapek lomi kawltung bak kha keimah nih ka rak i thim cu asi.

Tihna lei kalmi khuallam a tamngai. Kum (10) leng a rauh tikah cun kaar ka rak hlan mi kawltung kha zumhkhawh lo tlukin ka rak phanh khawh.

Na nunnak ah tinhmi kawltung pakhat nak tam in na chiahkhawh lo. Cheukhat kawltung hna cu asi khawh tilo hnu ahcun, ṭhial hloh asite ko lai. Kawltung tam i chiah cu, kawltung pakhat hmanh a ngeilo mi nakin khahchunh ahcun a ṭhadeuh ko.

Kawltung um seh, tilawng zong zah ko. Thla zong cam. Hi pathum hna a um ahcun naa ruahchanhmi kawltung cu tlolhlo nikhatkhat ah na phanbak te ko lai.

Ahrampi - Fr. Thet Kyaw

Alehtu - Norbert Ca Ling