Mino le Thilthar

MINO LE THILTHAR UMTERNAK

Mino silio ah thilthar umternak te hna, a tharmi hmuhsaknak te hna a um awk asi. Teinak hmuh timi cu a fiangmi thil asilo nain pumpek in thilthar umter-chuahtertu siawk asi. Mah nih umternak, khuaruahnak thar pakhat cu mah nunak kha kaupi in a thlenter khawh.

Thilthar chuahternak timi cu, a tharmi thil pakhat kha umter duhnak lungthin, khuaruahnak thar pakhat kha chiahpiak duhnak lungthin, duhthimnak thar pakhat kawl duhnak lungthin, buainak fianternak ah a ṭhadeuh mi ningcang thar kawl i langhter duhnak lungthin, mi he i komh i pehtlaihnak ah ningcang thar kawl duhnak lungthin, mah pumpak kha ningcang thiamnak thar he lunglawmhter duhnak lung asi.

Thilthar umter hneksak duhnak a ngeilo mi cu nunnak ah caansau teikhawh a har ngai. Mihna hi zeicah hneksak thilthar umternak tuah an duhcio?

Mi cheukhat asangmi conglawmhnak coduh ah a tuahmi an um bangin cheukhat nih cun mi he pehtlaihnak ningcang hna, minung tampi i hlumnak vawlei thar serduh caah tuahmi zong a um. Cheukhattu cu buainak hna fianternak ah aṭhakhun mi ningcang umter dingah tuahmi zong a um.

Thilthar umter duhmi siding cu tuahding mi konglam hna kha mizapi he aakhat lomi hmuhnak leikap zongin hmuh tuaktan khawhnak na ngeih lai.

Ahmaanmi ruahnak in ṭhenchuah i ruahnak phun, hmuhnak thar in zoh i ruahnak phun hna na tuahkhawh a hau lai.

Abiapibik mi cu asi kho dingmi thil sining thar pakhat kha chuahter langhter khawhnak asi. Thilthar umter timi cu asi kho dingmi a umnak menmen pinah aho he hmanh aalawh lomi a dangte a dir khomi lamthar zong asi lai.

Ningcang thar hna cu ningcang hlun hna cungah hrambunh mi asi tiah chimkhawh asinain cucu nangmah khuaruah khawhnak thlennawnnak, lungsaunak, teirialnak, thazaang chuah in zuamnak cungah tampi aa hngat.

Voitampi biaruah hneksak i aphichuah ter hnuah thilthar umternak pakhat cu a taktakin a rak i hrimhṭhan khawh lai.

Athar hneksak tuahdih nain, bianaal aphi kawl hna a tuahkho lomi, khuaruah mi thlennawnnak a ngeilo mi, teirial lomi, lungsau lomi hna cu athawk kaa ah rian a rak thawk nain kawltung phanhlo in a lohtlau mi an siko lai.

Mah pumpak i athar umternak pakhat cu timhnak a ṭhat lawng in a zalo. Vawlei minung zapi caah manngei i santlai mi thil zong asi lai. Siningcang a caan hna i halnak he caan hmaante phanhding zong a hau.

Athar umtertu hna cu mi sawhsawh hna he an i lawhlo. Tlawmpal an hleikhun deuh. Asiloah thluak a zum haardeuh mi an si kho. Vawlei le vawleimi a theih i a hngalhfiang mi an si. Vawlei thilhna i herhbaunak, mihna i herhbaunak kha a intuarhtu hna an si. Annih bantuk minung phun kha kan ngaih tuah ahcun, a thar mi khuaruahnak hna, afekmi bicahnak hna, anmah lawng nih an kawl an hmuhmi konglam thar hna a um kha na theih ko lai.

Tuanbia ah a thar umtertu hna sinakin minthannak nganpi a tantak mi hna cu Leonardo, Edison, Picaso, Einstine timi hna cu tuanbia chankhat a thlentertu hna an si. Annih i teihpan asilo mi fimnak, teikpan fimnak siternak hna cu vawlei kha a nuammi vawleipi an rak siter.

Nangmah va si ahcun annih tlukin nan min thanglo, tuanbia ah nan lutlo nain nanmah le tahnak ning cio in nan tuah khawh mi an umko.

Nang cu khuaruah tuaktannak a ngeimi, athar a serkhotu pakhat na si cang maw? Nangmah i a thar na serkhawhnak hna kha na innchungkhar, na chungkhat le na hawikom hna karlak ah thawk in na hmuhsak khawh ko hna. Nang cu cawnnak le hlathlai duhnak lungthin taktak na ngeih sicun a thar umternak timi kokek cu na chunmang ah hrin asi cang ko lai. >>> Kan peh`than te lai>>>

Fr. Thet Kyaw tialmi in Norbert Ca Ling nih letmi asi