NU LE VA KHAT LE KHAT CUNGAH CHIAHDING MI `TUANVO

1.d. Pakhat le pakhat aatluk tein i komhnak

Mi zeimaw nu le va hna cu pakhat zalonnak kha pakhat nih a upat lai. A khamhpiak lai. A dikmi dawtnak in dawtthiam mi hna cu mah dawtmi hna i nun zalonnak a daimi kha hmuh an duh cio.
    Nu le va an pahnih tein tunu tete an silo. Cuka ah “Kan chiahnak ah um, kan fialnak ah kal” tiphun in komh awk asilo.
    Sermi thilnung hna lakah zalong tein khuaruat le biachah khotu cu vawleicung ah minung pakhat lawng a um.

Zalong tein khuaruat i nunnak ser`han ternak nawl cu minung caah huham muisam pakhat asi. Cucaah nu le va hna cu pakhat i khuaruahnak le zumhnak kha pakhat thluak chungah rumro tein hmuhpiak ding asilo. Pakhat i zumhnak, ingtuarnak, khuaruahnak kha pakhat nih a upat lai. A theihkhawhnak ding aa zuam lai. Mah nih ahmaanmi ruahnak le zumhnak zong kha theihfian in a cohlannak ding a fianh piak lai.

Vate hna kokek cu thlitu chung i zalong tein tankhawhnak kha an tlaihchan. Nga hna kokek cu tili nganpi chung i lieuhnak kha an duh deuh. Minung hna kokek cu nunnak ah zalong tein khuaruahnak, biachah in umnak kha an uar ve. Zalonnak a uarmi, zalonnak kha man a ngeihter mi, zalonnak a tlaihchan mi kotho hmanh hi minung kan ruamkainak pakhat asi.

Cucaah pakhat i zalonnak kha a dang pakhat nih upatnak cu minung tling sinak kotho asi. Chungkhar kong ri chungin na dawtmi i ahmaan mi zalon tein khuaruat cohlannak nawl kha na upat piaklo ahcun na dawt taktak asilo.
Vate ka dawt a ti i vate chuan kha bawmchung a khumhmi bantuk asi.
Nga ka dawt a ti nain nga fate kha thol palang bite chungah a khumhmi he aa lo.
Na dawtmi cu va fate asilo i nga fate pakhat zong asi fawn lo.

Na dawtmi cu khuaruat thiamnak le theithiamnak a ngeimi, zalong tein khuaruat biachahnak nawl a ngeimi, zalonnak he aatlak mi minung pakhat asi. Pakhat i zalonnak kha pakhat nih a upat chinchin, pakhat le pakhat dawtnak a ngan chinchin.

Asinain nu le va nih zalong tein khuaruat, biachah, rian`uannak cu chungkhar kong ri chungah ahmaanmi zalonnak asi ding tucu philhawk asilo. Mah dawtmi nih zalong tein a khuaruahnak, a intuarnak a chimmi kha upat loin rumro tein mah duhnak ning hranhram tuahternak cu chungkhar i buainak kawl bantuk asi. Chungkhar kong ah a herhlo mi, asi awk asilo mi harnak hna kha kawh bantuk asi. “Vapa cu a nupi kha chungkhar pakhat i covo hna kha a pek awk asi. Nupi zong vale kha cubantuk tuahding a si ve (1Kor 7:3).

Chungkhar kong he pehtlaimi pakhat i nawlngeihnak hna kha a dang pakhat nih lungtling tein peknak cu nu le va karlak ah theihthiamnak, a karhter. Lungtlin lonak a zorter. Dawtnak hri a fehter lai.