Nuhrin Covo (Daihnak)

14. DAIHNAK LE FAPAWI KHAM, HRAWHNAK

Mikip nih hin ahohmanh nih hrawh le buar khawh asilo mi, i chuahpi mi nuhrin covo (nawlngeihnak tinvo) kan ngei cio dih. Cu tinvo lakah “Minung nunnak nawl ngeihnak” cu a biapibik mi thil asi. Minung i nunnak nawl ngeihnak kha minung vialte nih kan upat ding asi. Zeicah kan ti ahcun “Minung nunnak cu a thiang i a sungtuk caah asi. Minung cu Pathian nunnak hrawm i a cove mi kan si (Gen 1:27). Cu asicaah  a thian a sungmi minung nunnak kha kan that lai lo (Lai nan nawng lailo, Exo. 20:13).

Minung kan ti tikah takvun muici theidan loin, adot thleidan loin, minu/pa thleidan loin, vawlei cung i a ummi minung dihlak kan i tel hleiah hring rihlo mi, a nu pawchung a umrih mi ngakchia zong an i tel dih. Cuti asicaah Bupi i Canan upadi B. 1398 ah “Ngakchia no (pawilio mi) a nungmi in hrinnak nawl a ngei” tiah fiang tein a langhter.

1994 kum, October thla ah “Vawleicung ramkip naupawi kham/hrawh tonpumhnak kha Pope John Pawl II nih ralring pek bia a chimnak ah “Naupawi thawkka in, minung nunnak kha tanglo upat in kham zohkhenh cio ding asi”. Mah i minung sinak tinvo, minung tinvo le a dangdang nawlngeihnak hna kha hnatlakpi awk an si. Cu tinvo hna ah aho pakhat tal hmanh nih hrawh le buar khawh lomi ngakchiano nunnak nawlngeihnak zong aa tel ve.

Cozah vasi ahcun mi pakhat covo, nawlngeihnak tinvo hna kha humhimnak le `hanchonak um dingah a`thabik lam in tuah awk `uanvo a ngei. Mi pakhat cu “zalawng tein duhthimnak konglam langhtertnak le khi minung tinvo kha ralchanh khawh asilo” a nungmi sinak nawl kha upatnak cu luatnak nawltelh in, nawlngeihnak dangdang hna i a hrampibik asi, tiah fingfai tein a rak chim.

Pope John Paul II nih a rak chim bangin mikip i nuhrin covopi cu “a nungmi sinak tinvo” kha si ko. Nunnak nawlngeih tilo ahcun adang nawlngeihnak tinvo hna zong sullam a ngeikho ti lailo. Cucaah mi zeipaoh nih “a nungmi sinak tinvo” kan thlaihchan cio nak asi.

Cuasicaah sualngeilo hringrih lomi semka ngakchia hna i a  nungmi sinak nawlngeihnak cu man ngeih tein kan upatcio lai. Kannih nih zalong tein kan i thimnak ruangah sualnak ngeilo semka ngakchia no hna nunnak a sungh a rawhnak cu hruhrang in lainawnnak asi ti kha philhhlah u sih!

“Voihnihnak Vatican tonpumhnak nihcun nauhrawhnak le ngakchia no hna thah cu chim khawhlo tiang a nganmi sualnak tuah a si” a ti.