Nulepa Puai Roca

roca

26 July 2022- NU LE PA PUAI NI ROCA
(Exodus 20:12)

Nu-      Khuacaan cu helkhat a tling`than i, Fur can zong amah ningkelin a hung chuak`than cang. Vawlei hmai dihlak, zeihmanh langlo, chum nih a zelh dih. Nitlak thlanglei in a `thawngmi mohtung thli nih minmei tlawmtete khawmh in, ruah tidai cu, vawlei a hnamhter cang. Van kaupi khin, lunglawm thanuam in, Fidi ruahtidai le uhtlak fatete hna i an hla-oih thawng cu ngaih a va nuam hringhran dah! Khi hladawh hna he nang le kei zong kan i dawh zia, lungtling tein, khuacaan rel pangpar hna le rimhmui Hnisipar hna an eng. Mitthlam cuanter in hmuh khawhmi cu, donglo rosung petu nu le pa hna kha tangdor tein upat peknak “Nu le pa nisunglawi” ti a si ko lo maw? Upat awktlak mi Bishop, Siangbawi, Sister le Damah sayate, nu le pa hna kha upat kan in pek hna cu “Nawlbia pahra lakah a palinak” kha kan zulh le kan tuah a si. Cathiang nih a kan forhfial mi cu “Bawipa Pathian nih an pekmi hna ramah saupi na nunnak hnga na nu le na pa kha upat hna” ti asi.

Pa-       Aw…ruahti fatete catlo tampi in a thletnak July thla, nu le pa puai ni kan phanh tik poah ahhin, innhlum fale sihna seh, nunnak caah ramleng chuak fale sihna seh, konglam Dangdang ruangah a vakvai mi fale sihna seh, runinn le nu le pa kha hlam tawn hna lai mu!...

N+P-   Aw…nu le pa thladem, dawtnak muru nih tuamhlawm, `thal khualin ah daihnak, Furruahti lak in humhimnak pek, khuasik ral zong lumter zungzal, fale cah cun ral `tha deuhdeuh, rap phunzakip in khamh le `tanpi hna sayate, hlenthoinak phuntling nunnak “Ni” ah, hngalhnak thluak inruah le tuah, mah lungduhnak hnuchit in chungkhar fale caah papek, pum le rilca, fimthiamnak ca tiin, kha phunthum hna caah thlanhripipot in nan `tuanhawl hna maw?   Nu le pa aw….

N-        Khat le khat theihthiamnak in, chungkhar vawlei, lungthin a dai, piasen tangka pekin cawk khawh lomi, dawtnak le siannak in hmuhmi saduhthah innte, zungzal hmun dingah thazaang dihlak chuah in saknak lamthluan ah, fapa fanu mithmai mirhte kha, nan hmuh zawnah, nitlan tikah dapti cu tikhu a cang i a lohtlau bang…

P-         Thabat sifah tuarnak vialte cu, lamhlatpi hlonhbang, an lotlau dih tawn. Hmailei chan i fale nunnak a himnak ding le `thanchonak ah lungrual le lungnge tein nan `tuan, chankhat lunglawmhnak le khihnu a nuam i nunnak biazai thlum dingah, kut pahnih thazaang chuah i, mah duhning in ser, muisam thar chuahter dingah, fale caah nunnak cu nan hman (Nu le Pa aw…)

N+P-   Cucaah cun nu le pa cu fale hna nih, zungzal in cawm dingah, nan harnak le nan herh baunak vialte kha, `tuankawlpiak ding in, nan rothil coawk caah nan bia ngaih ding le thlanmual nan liam tik i nan rauthla caah a hlu pek le raithawi halpiaknak, nan miphun, nan chungkhar le nan Biaknak kilven ding ah, kan i zuam lai tiah biahren kan tiam fale hna nih.

P-         Rel cawklo kan palhsual zongah ngaihthiamnak thinlung a keng zungzal khotubik cu nu le pa nan si.

N+P-   Cuasicaah kan rak sem ka in kan nu le kan pa, caankhatte hmanh a dai ballo, a luang camcin nan dawtnak, a dih sual lai phan ding um lo, kan hnangam ko nu le pa aw… Hawihmuh a hmu kho kan si lo hmanh ah, Hawi ngeih angei kho kan silo hmanh ah, Nunu le Papa timi biafang te kha nan kan “Hawi" chungpoah cu, kan caah a `thabik a um ti kan hngalh.

Nan tlei lai ding ruah kan duh lo, nan kan liamtak lai ding kan ruat ngam lo, sikho seh law nunu le papa aw…kumthong chanzatiang, `then ti loin kan nunpi hram ko u law tiin saduh kan thah ee…

P-         “Kan Bishop Lucius Hre Kung, Siangbawi, Sister le Damah saya dihlak, nan ngandam in nan chanzaatlung ko seh”

N-        “Pupu, Pipi, Papa, Nunu nan zapi nan nun khuasau in nan ngandam cio ko seh” tiah thlaza campiak buin…

N+P-   Nan dawtmi nan fanau le hna

St. Joseph’s Cathedral, Hakha

26 July 2022, Parent’s Day

 

Add new comment

1 + 17 =