Nulepa upatnak

upatnak

Biahalnak le Bialehnak a peh>>>>>

Pathian Nawlbia (4)nak ah, “Bawipa nan Pathian nih an pekmi hna ram ahhin saupi nan um lainak ding caah nan nu le nan pa kha upat hna u (Exo. 20:12)” ti kan hmuh. Cun Bawipa nih ralrin a kan pekmi cu, “A nu siseh, a pa siseh a thatmi cu thah a si ve lai, (Exo. 21:15-17)”, Jesuh Khrih nih cun (Mt. 15:4-6) ah, “Na nu le na pa kha va upat hna, a nu siseh, a pa siseh a congoih mi cu thah siseh,” tiin nawlbia kha a hman`than i a cawnpiak. Khrih hrimhrim nih nu le pa upat awk a cawnpiak mi cu (Lk. 2:51) ah, “Jesuh cu a nu le pa sinah khan Nazareth khua ah a kir i a nu le a pa kuttang a nawlngai tein a um,” ti kan hmuh. Hawile hna, nu le pa, saya hna kha khukbil upat peknak siseh, zei bantuk umtu ningin upat peknak siseh Pathian nih a tlaihchan cang mi a si, ti theih ding a si. Pathian kha Pathian hmun ah chiah in nan biak lai, tiah fiang tein a chim ko.

Jesuh hrimhrim nih a hnubik vailam cung in nu le pa upat awk a cawnpiak mi cu zohchunh awktlak ngaingai a si. A nu taktak asi lomi Nu Mary kha Johan nu ah a rak canternak cu, “A dawtmi a zultu Johan zong kha na nu kha zoh,” tiah a rak cah caah cu ni thawkin Johan nih cun a inn ah a umter (Jn. 19:27) tiah kan theih. Cuve bangin Nu Mary zong nih a fapa taktak a va si lo hmanh ah Johan cu Nu Mary fapa dirhmun ah a rak chiahmi cu, “Cu tikah a nu le a dawtmi zultu hna cu a pawng i an dir kha Jesuh nih a hmuh tikah “Woman (အချင်းမိန်းမ - Minu) na fa kha zoh” tiah a hnubik nawl a rak pek. Hitluk upat peknak phun hi khoika hmanh ah hmuhkhawh an si lai lo. Thlarau lei ah Nu Mary cu Khrihfa hna i nu dirhmun ah a kan chiahtak i nu `uanvo tlam a tlinh mi Nu Mary zong kan upat awk a si.

Biatlang kan komh ahcun Catholic nih hi sining kha `thatein an hngalh caah Biakinn i Pathian hmaiah lukhun khukbil in Pathian an biakmi a si i Pope, Bishop, Siangbawi (Tlangbawi) Sister le nu le pa hmai i lukhun khuk an bilnak cu an upat hna caah a si tiin thleidan thiamnak `tha tein an ngei. Cu ruangah Catholic pawl kha soisel mi nak in mah pumpak hrimhrim nih hi a `thami tuahsernak kha ngei ve u tiah kan sawm hna. Soisel tu hna hi lukhun khukbil dingin thilti khawhnak sining a phan rih lomi ti tlukin ka ruah tawn hna. Jesuh pekmi Khrihfa phung cu a nunnem i zatlang tuahning hna, zatlang ruahning hna, minung `thathnemnak a chuahpi mi a dikmi biading a si. Bible sining theih loin duhnak lei paoh mer, sullam hrilhfiah in nu le pa hna kha khukbil upat pek awk a si lo. Pathian nih a duh lo. Sayate zong kha khukbil lukhun in biakawk a si lo. Pathian nawlbia buar a si tiin cawnpiak nak cu a palhmi cawnpiaknak a si.

Cuti zatlang nunphung, phunglam hna a ralchanh i Jesuh cawnpiaknak hna kha thinlung ah chiah lo hlei ah kaa lawngin Pathian aa hruhchih mi chanthar profet deu hna kha kan i ralrin awk a si cang. Annih cu mi kha palhnak lam ah an hruai hna. Jesuh Khrih chan ah kei cu Pathian Fapa ka si a ti tikah Farasi mi hna nih Pathian kha a mawhchiat, cucaah thahawk a tlak an ti. Mizaw hna kha a damter hna tikah hi pa hi khuachia `hawnnak a hman i hi thil a tuahkhawh mi a si an ti. Jesuh nih ka sa kha ei uh a ti tikah annih nih a sa ei awkah zei bantuk mi dah a si. Josef le Mary fapa a si lo maw? A chuahkehnak khua a phak tikah an rak soisel. Cuhna ruangah Jesuh nih, “Aho profet hmanh amah a chuahkehnak khua ahcun conglawmh a tong bal lo (Lk. 4:24) tiah a ti hna. Jesuh nih mi hna kha na sualnak cu thlahpiak na si cang, a ti tikah hi pa hi Pathian lawng nih a tuahkhawh mi sualngaihthiamnak kha a mawhchiat cang (Lk. 5:20-24) tiah an i ceih. Jesuh nih misual hna, ngunkhuai khawltu hna, mi`ha lo hna he an ei`ti i an zaihnawh hoi tikah “Misual mi hna tu kha i ngaichih uh tiin kawh awkah ka ra,” (Lk. 5:27-32) tiah a ti hna. Cuticun Jesuh hrimhrim cu mi soiselnak kha a rak ing taktak. Cucaah amah (Jesuh) hrimhrim nih a rak dirhmi Bupi le cu bu chungtel Khrih i fale hna nih soisel le congoih an tonmi cu Pathian tehte kha a si. 

Hi konglam hna hi zoh in aho hi dah Pathian nih a hmanmi phungchim Saya a si ti kha Pathian pekmi pumpak thluak in ruah cio a hau. Nu le pa hna kha upat peknak nu le pa thluachuah hi zeitluk in dah san a tlaih ti kha zohtuah usih! Abraham fapa Isaak nih Esau ai in Jacob kha thluachuahnak a peksual ko nain cu thluachuahnak cu Jacob cungah a rak tla `thiam`hiam (Gen. 27:28-29). Jacob fapa(12) hna kha thluachuah nak a pek hna caah Israel phun(12) an rak chuak. Pathian nih an pu Jacob thluachuah nak kha a fehter. Bawipa nih profet hna hmang in Israel Siangpahrang hna kha chiti thuhmi Siangpahrang ah a rak khinh hna. Cucu Pathian nih a rak fehter.

Hi konglam hna cu kamkhat lei in Siangpahrang le profet hna karlak upat hmai-zahnak kong kha a langhter. 2 Siang. 2:24 ah, “Elisha cu Bethel khua ah a hung kal pah ahkhin ngakchia pawl nih amah cu an nihsawh i, “Lukolh pa hung kal tuah! tiah an hauh tikah Elisha nih Bawipa min in chiat a serh hna. Cun ramlak in vom a pi pahnih an rak chuak i pa ngakchia cu sawmli le pahnih a seh hna,” ti kan hmuh. Ca reltu dihlak nih hi kong hi nan lung a pem cio nakhnga .....
 

Add new comment

3 + 14 =