Nunnak kha Pathian A Ngeih

Chungkhar

     Minung kha Pathian nih a rak ser. Nunnak thaw a rak pek. Cucaah mikip nih a nungmi sinak nawl kha Pathian lawng nih a ngeih (Nam 32:39). Cairo khua i an tuahmi vawleicung milu timhtuahnak (simanking) ton pumhnak ah Mother Theresa nih a chimmi cu;

     “Nunnak cu Pathian pekmi aa dawhbik laksawng a si. Cucaah ‘Nunnak’ kha duhpoh in a thahnawn mi raldohnak hna, hramhram tuahnak hna, fapawi hrawhnak hna kha vawlei ramkip ah kan hmuh (ton) nak cu lungfah awk ngaingai a si. Mi nunnak a hrawkmi a nganbik thil cu nauhrawhnak a si, tiang fiang tein ka chim ngam. Minung nunnak a hnuktthan khotu minung cu minung nunnak a sertu Pathian lawnglawng a si. A nu siseh, a pa siseh, siibawi siseh, tonpumhnak meeting nih siseh, rampi uktu nih si hna seh, ahohmanh nih laktthannak nawl an ngei lo,” tiah a phi a rak chuahter.

     American ram pumpi thlacamnak puai zongah Mother Theresa nih, daihnak i a biapi sualtuahtu cu nauhrawhnak a si, tiah a tanglei bangin a chim. Nihin daihnak a hrawktu a biapi bik sualnak a tuahtu cu nauhrawhnak hi a si. Nauhrawhnak a simi paohpaoh hi nunnak bawipa, Bawipa Jesuh kha a almi an si, tiah a ti. Nauhrawhnak cu ngakchia note hna minung an sinak kha alnak a si. “Minung pakhat a si, tiah cohlan lonak cu a dang thahnawnnak a onhtu an si. Nauhrawhnak a onhmi zeibantuk upadi si ko seh, a hranpi ah Democracy he a ralchanh mi a si i, Democracy caah ttihnung ral a si,” tiah Pope John Paul II nih ralrin a rak pek.

     Democracy phung caah ttihnung a si ahcun amah duh tein daihnak kha ral a siter lai timi a faing ko. Pope John Paul II nih cun ram hruaitu hna sinah nunziaza le tthanchonak kongkau a chimh hna nak ah, “Daihnak a hrawklio cuahmah mi a nganbik thil cu nauhrawhnak hi a si, tiah kei nih ka ruah. A ruang cu nauhrawh ternak cu sualnak a tuahthiam rih lomi ngakchia note hna kha ralsernak a si i, a nu pumpak thahnak a si. Bianaah nu a simi pakhat nih amah fa a simi thahnak kha kannih nih kan cohlan a si ahcun midang kha zeitindah pakhat le pakhat nan i that lai lo, tiah kan tikhawh hna hnga,” tiah biahalnak a rak tuah.

     Fapawi khamhnak kong kha Pope John Paul II nih, “Thihnak bawi Nunphung” tiah a ti. Amah nih, “Nunnak i Pathian bia” cathluan ah; Mizei paoh a si ah minung nunnak zuanhnawh in a dohnak cu Pathian hrimhrim kha a dohmi a sinak le a pa siseh, a nu siseh, a hawi siseh, siizung ah ttuanvo a lami siibawi te si hna seh, nauhrawh dingah thapek in a bawmh a si ahcun mithah sualnak chung he aa pehtlai mi an si, tiah thukpi in ralrin a rak pek hna. Cu bantukin midang nunnak hrawh cu daihnak hrawh zong a si.

     Pope Paul VI nih; “Nunnak a ralchanh mi sualnak paoh cu daihnak an dohmi a si dih” tiah thukpi in ralrin a rak pek hna. Cu a si caah a phukip, ramkip, mikip cu mah le nunnak kha i khamh awk ttuanvo an ngei dih. Nannih cu daihnak kha lak nan duh ahcun mi nunnak kha khamh cio u,” tiah a rak chimtu Pope Paul VI i bia kha philh awk a si lo. Cu a si caah Khrihfa kip, minung kip nih daihnak caah a hramthawk ttuan dingmi cu nauhrawhnak kha ralchanh i sual ngeilo hrin dingmi hmailei fanu/pa rosung hna kha khamhpiak nak lam a si.

     A hnubik kan philh lo dingmi cu, “Mi kha va thah hlah” (Mt 19:18) ah a timi Pathian Nawlbia a si. Mikip nunnak kha Pathian nih a ngeih (Job 12:20). “Mah duhning tein umkhawh nak caah pawilio mi fa note nih a ka thihkanh lai, timi biachahnak cu a ttumchuk tukmi a si,” tiah Mother Theresa nih a rak chimmi kha nu le pa hna nih thukpi in ruah a herhmi a si. Catholic nu le pa kip nih chungkhar kong i a sunglawi mi ttuanvo pakhat a simi fale ngeihnak (cikor karhnak) he a ralchanh mi nauhrawhnak hlei ah, phungning a si lomi lam in naukhamhnak tel in zeibantuk tuahsernak hmanh kha a tuah a si ahcun Pathian hmai ah tthatlonak tuah a si i, Pathian thluachuah alnak a si.

Add new comment

4 + 4 =