Nunning Cawnpiaktu Nulepa sihram u

Mino pawl ahmaan mi khuaruat thiamnak le nunning ziaza `thatnak ding zong cawnpiaktu saya hna le nu le pa cungah aa hngat mi a si ve. Abikin a hramthawknak saya asimi nulepa hna hi an biapi deuh. `Tuanvo a hngalh mi mino hna, pumpe mi mino hna, keimah timi thinlung a tlawm mi mino hna, nawlngai mi mino hna, ziaza `tha mi mino hna, theihhngalhnak a `thancho mi mino hna cu mankhiah khawhlo mi mansung lungvar kan ti khawh. Chan kha a thar in dawhzer dingah a `tamhmawih kho dingmi chanthar zuksuai ansi tiah tikhawh an si.

            Mithiam, mi`tha cipeh chanthar mino hna kha Bupi nih a bochanh hna. Chanpeh mino pawl i a sunglai mi thazaang kha Bupi nih aa ruahchan mi a si.

            Khuatepar (ciapan) a umlo mi tili, pangpar a umlo mi dum, lawngzahnak a ngeilomi vokkuang lawng  cu iang a tling kholo bantukin, pumpek in mah ca `thatnak a hlawt kho mi mino an umlonak bu cu iang dawhnak he an tling kho lailo.

            Khawtepar fang le a ko kha zohin tili a thukpuan tah asi. Nithladem zohin caan kha tah asi. Minmei hna, ruahphawr minmei hna zohin khuacaan ruahdamh khawh asi bantukin, tuchan mino pawl an `hatchiat zohnakin Bupi le phu pakhat `thanchonak, `tumchuknak kha ruah dawmh khawh a si.

            Fale hna i a hramthawknak saya hna cu nulepa hi an siko. Nulepa `tang cu mansung hrinhniang hna caah hmasabik fimcawnnak sianginn tiah tikhawh asi. Nelepa nih hrinhniang hna kha a biapibik asimi ziaza `hatnak pahrang hna kha cawnpiak ding asi.

            “Nulepa hna nan fale kha ziaza `thatnak cawnpiak hna uh” (Tobiah. 2:13). Fale hna cu a `thami nulepa nun ziaza kha an zohchunh tawn. Cuve bangin, a `thalo mi nulepa nunning ziaza chia zong kha an zohchunh hoi tawn.

            Nulepa khuaruahnak, nuning ziaza hna cu fale hna nunnak kha a tlawmtam khuhchilh khawhnak a ngei.

            Hmailei Bupi i chanpeh asimi fale sung hna kha lamdang an pialnak hngalo Catholic nulepa nih ahmaan mi lam an zulhkhawhnak hnga dawtnak in nan cawnpiak hna lai. A sunglawi mi nun`tha in nan hruai hna lai.

            Nulepa hna cu fale hna kha a `thami thlaici ro nan thlakpiak hna lai. Fale hna kha hngalhtheih fimnak, tuahthiam fimnak le tuahkhawhnak pahrang hna kha cawnpiak in `thanlian ternak cu nulepa hna i a sunglawi mi le a biapi ngai mi `tuanvo pakhat asi kha nulepa nih nan theihfiang asiahcun `tuanvo tlamtlinh awk lawng asi ko cang.

            Vokhat ah siangbawipa pakhat cu a dumkulh chung aa chawklio ah thingkung cungin a rak `tummi ngakchiapa pakhat a hmuh i a auh. Ngakchiapa kutcung ah songkhuai pakhat, a chung i apple thei a khumhmi kha a hmuh. Apple thei a `tawhmi ngakchiapa kha siangbawipa nih; na pa kan chimhpiak lai” a ti tikah, ngakchiapa nih; zeitikka ahdah na ka chimhpiak lai? tiah a hal ve. Siangbawipa nih “zaanlei ah kan chimhpiak telai” a ti `han i, ngakchiapa nih, ‘Bawipa na chimh duh ahcun atukbak hi chimh ko’ zanlei ahcun ka pa hi inn ah a um thenglo, a hawile he zudin ah an kal `theo’ tiah a leh. Asiahcun atu khoika dah a um’ tiah a ti i ngakchiapa nih ‘ka pa kha lamhlatpi ah kawl a hau lo’ tiah a ti i thingkung cunglei a kutdong a sawh piak.

            Cutikah, ngakchiapa i a pa cu ithup khawh asi tilo kha a theih i apple theisongkhuaipi he thingkung tang ah a rak `um. cubantuk pale hna cu zeitindah a fale kha lam`ha ah a hruaikhawh hna lai?

            Mitcaw nih mitcaw kha lam a hruai ahcun an pahnih in khor thukpi ah an tla lai (Mt. 15:14) asilo maw?

            Mifimpa pakhat nih a tanglei bantukin a rak `tialbal mi cu “Soiselnak tangah a `hanglian mi ngakchia cu midang sualphat soisel namneh sersatnak kha rak thiam” a ti.

            Ingtuarh ngaihthiamnak hna a ingmi in a `hanglian mi ngakchia cu midang ngaihthiamnak kha a ngaihthiam a ti.

            Amah kha a cohlan thiammi pawngkam in a `thanglian mi ngakchia cu midang dawt thiamnak kha a cawng i a thiam. Cucaah nulepa hna i a chia, a `tha nunning ziaza pahnih ningtein fale nunnak kha a khuhchilh khawh timi kha nulepa hna nih ralrin awk asi. Nulepa cu fale hna i a hramthawknak saya an si. Chimh le cawnpiaknak hlei in mah nuncan ziaza `tha hna in lamhruai awk an si.

#kan pehthan lai