Nupi `Tha Hna Man

Dawtnak

1.b. Pakhat le Pakhat Duhdawt Lungtlinternak

Nu le va hna cu pakhat le pakhat upat awk `tuanvo an ngei tiah Mithiang Paul nih chimhhrinnak a tuah. “Khrih nan upat bangin pakhat le pakhat i nawl thiam u. Zeicatiah Khrih nih Khrihfabu cungah nawl a ngei bantukin nupile zong nih nan vale tangah tlingten nan i dor awk asi”. “Vale hna , Khrih nih Khrihfabu cu a dawt i a nunnak a pek bantukin, nannih zong nih nan nupile kha nan dawt ve awk asi” (Efe. 5:21-26).

“Vale nih nan pum nan i dawt bantukin nan nupile cu nan dawt hna lai i, nupile zong nih nan vale cu nan hmaizah  hna lai” (Efe. 5:33).

Nu le va hna cu pakhat le pakhat nan i dawt, nan upat veve hna lai. Dawtnak cu hnuhnak (attraction) a um ruangah asilo. Hnuhnak a um ruangah asiahcun dawtnak taktak asilo. Hnuhnak cu nangmah sinin a rami asilo. Nangmah kan dawt na ti siahcun amah sin a rami asi. Cu mi i hnuhnak a umnak a loh ahcun nang cu anih kha na dawtkho ti lai lo. Bianaah nangmah i na dawtnak cu na dawtmi hnuhnak ruangah asi ahcun nang cu amah kha na dawt taktak mi asi kholo. Amah i forhfial khawhnak a thil tikhawhnak lawng kha na dawtmi a si.

Bianabia ah cu mi i aa dawhnak, a reng le a rumnak lawng kha na duhmi a si. Cu thil hna tikhawhnak a lohtlau ni ahcun cumi cungah na chiahmi dawtnak zong a donghve te ko lai.

A dikmi dawtnak cu thinlung chungin a rami asi. Nunnak in a rami asi. Nangmah na thinlung chungin a rami asi. Parpavuan thil tikhawhnak hna kha hram a bunhlo caah cu thil hna lohtlau hmanhsehlaw cumi cungah na duhpeng khawh rih.

A dikmi dawtnak cu lungtlinter duhdawtnak (appreciative love) asilo. Mi pakhat kha hrambunh duhmi dawtnak asi. A herh caah dawtnak (need love) he aa thleidan mi asi.

“A her caah dawtnak” cu mi pakhat kha dawtnak asilo. Keimah kha cu mipa/nu nih thil pakhatkhat a ka pek khawh ruangah siseh, pakhatkhat a ka tuahpiak khawh ruangah sieh, cumi kha duh khawhnak menmen asi. Ka herh baunak hna kha a ka bet piak khawh ruangah cumi kha ka dawt asi. Cumi nih ka herhbaunak kha a bet khawh tilo nikhat cu a cungah chiah mi dawtnak a lohtlau ni asi ve lai.

Cucaah nang cu mi pakhat kha a biapi ah na chiah ahcun lungtlinter duhdawtnak (appreciative love) in na dawt khawh lawngah na dawtnak cu caansau a nguh te lai.

Mi pakhat kha a biapi ah chiah in duhmi dawtnak cu a dikmi dawtnak asi. Muidawhnak kha hrambunh in na duh siahcun cu dawtnak cu aa thlengthiam mi asi. Aruang cu muidawhnak cu aathleng thiammi asi caah asi. Huham chawva rumnak kha hrambunh in na rak duh asi zongah aathleng thiammi asi ve caah a rawh a fawi. Zeicah kan tiahcun huham chawva rumnak timi cu caantawite ca lawng asilo mei. Chun ah hmuh, zaanah a tlau khomi bantuk asi. A minung kha biapi ah chiah i duhmi dawtnak timi tu cu huham le rengsang chawva ngeihnak he aa pehtlai lo.

Minung kha biapi ah na chiah caah huham chawva a ngeihlo zongah a muidawhnak a lohtlau zongah an dawtmi kha cu na duh `thiam`thiam ko lai. Cubantuk dawtnak cu a dik. Caansau a nguh. Thih tiangin kutsih dingmi hna ah a umlo awk a `thalo mi dawtnak phun asi. 
 

Add new comment

5 + 5 =