Bible le Milem

BIBLE HLUN CHUNG I A UMMI PATHIAN  PHUNPHUN LE MILEM LE ZUK HE PEHTLAI IN CATHOLIC BUPI CAWNPIAKNAK

Kan hnuzarh i a peh

Khrihfa kip nih zalong tein Bible relnak nawl kan ngei ko nain a hmanmi sullam hrilhfiahnak ngeih loin mi kha a hmaanlo mi cawnpiak sual ahcun a theipar cu Pathian sinin `thaten zun hrimhrim ding a si ti hi  philhlo awk a si. Bible kan rel tikah Bible i hnuphen tuanbia, thilsi can ning, mi nih an rak hmuhtonmi thil vialte kha zohchih dih a hau. Bianaah; Bible nih milem le zuk ti le cangka hi milem le zuk cu zei bantuk pathian phun, milem maw? Asiloah khuahrum mi lem maw? Mizei hna khuahrum dah a si? Zei chan i a chuakmi dah a si?

A hmunmi Pathian nih cu khuahrum hna kha zeicahdah a rak huat hna. Amah le Israel mi karah kha khuahrum nu hna, kha khuahrum milem hna cu zeitluk in hnahnawh nak a chuahpi i Pathian nih Israel mi hna kha zeitin a umter  duh hna, Israel mi hna nih tah an Pathian kha zeibantuk pathian dang an biak ruangah voitampi a thin an phawh timi hna kha kenkip in zoh a hau. Cuti siloin milem zuk a ti le cangka Catholic nih Pathian he pehtlaimi  milem an upat kha va hmuh colh i RC pawl cu Pathian duh lomi milem an biak ti phun in soiselnak cu cawnnak thazaang a dernak kha a langhter. Asual deuhmi cu Jesuh zuk, Nu Mary milem, Vancungmi hna milem, mithiang (Saints) hna i milem kha ser in upat peknak kha lenglei lawng i hmuh in Pathian dang a biami hna tiah congoih cu hngalhtheihnak a tlawmtuk mi a si. A poi bikmi cu Jesuh Khrih milem kha pathian dang milem ah ruahmi hi a si. 

Catholic pawl cu Pathian duh lomi, milem le zuk hna kha an hrial i amah Pathian hrimhrim nih Moses kha a serter mi pathian he pehtlai mi vancung mi Cherubim milem hna le zuk hna siseh, a dang milem-zuk hna kha an ser i cu hna cu upatnak an pek. Cu tuahsernak cu mit in hmuhkhawh lomi Bawipa Jesuh biak le upat pek a si tiin lung chungin an ruat i Nu Mary le Lamkaltu hna tu cu zohchunh awktlak an sinak kha an ruah`than mi a si. Zeicah Bible chung i a thicia mi hna, Abraham thawkin mi-thiang hna, Lamkaltu hna siseh, Nu Mary siseh, atu lio uktu hna kha upat an pek kan ti ahcun, Hebrew 13:7 ah, “Pathian bia a rak in chimtu hna nan hruaitu hmasa hna kha philh hlah u, zeitindah an nuncan a si i zeitindah an thih ti kha ruat`than ulaw an zumhnak kha cawng hna u,” tiah fiangtein a kan cawnpiak caah a si. Cucaah a thi cangmi mithiang hna (Saints) milem-zuk ser nak, upat peknak in an nunnak pek tiangin an kan hmuhsak mi zohchunh awktlak thinlung hna kha i zohchunh `thannak in Bawi Jesuh Khrih an biak kha a si. Bible hlun chan i kan hmuh mi milem vialte cu Catholic nih an ser mi Bawipa he aa pehtlai mi milem le  zuk hna he pehtlaihnak a um bak lo, tiah chim ka duh.

Kan hawi Khrihfa nih an congoih bangin Bupi cu Pathian Nawlbia pahra chungin, “Keimah hlei in Pathian dang zeihmanh nan bia lai lo, siasal zeihmanh nan ser lai lo. zei bantuk siasal hmanh an si ah an hmaiah nan kun lai lo,” Exo 20:3-5 timi nawlbia kha an hlaw taktak maw? An hlaw hrimhrim lo. Bupi nih hihi kha an zulhtuk hlei ah Bible lengah a biapi mi Bupi cawnpiaknak cauk timi {Catechism of the Catholic Church (CCC)} cauk ah biapi ngai in a langhter. (CCC) No. 2112 ah Catholic nih a cawnpiak mi cu, “Nawlbia pakhatnak cu pathian tampi a um timi kha a hnon. Cu nawlbia pakhatnak cu Pathian pakhat lengin pathian dang zumhnak (or) biaknak, lukhun upat pek lo ding kha a chim. Bible chungah pei minung kut in sermi, sui, ngun hna in sermi milem hna biaknak kha a ralchanh lengmang cu. Cu thil hna cu mit a hmu lo, hna zong a thei lo, kaa an ngei ko nain biachim thiam lomi (khuahrum) milem hna an si. Hi thil a ser mi hna, cu milem hna a zum i a bia mi hna zong pakpalong an si. A hmunmi Pathian lawnglawng hi a nungmi Pathian, nunnak petu Pathian a si i chan a pehpeh in an rak biakmi Pathian taktak a sinak” kha a cawnpiak (Salm 115:4-5/ Isaiah 44:9-20/ Zeramiah 10:1-16/ Daniel 14:1-30).

Catholic Bupi nih CCC No. 2113 zongah milem le zuk biak timi cu a hmanlo mi khuahrum pathian hna, milem kha pathian can ah biak a si timi menmen a si lo. Pathian cungah mah zumhnak kha hnahnawhnak a kan petu zong a si ve. Pathian a si lomi thil paohpaoh Pathian hmun ah chiah i zumh le biak cu siasal milem biak timi ah aa tel i Pathian taktak a si lomi thil kha Pathian sinak ah chiah i zumh le biak zong siasal biak a si. Biana ah, Satan khuachia hna, aana duhtuk nak, chawva thilri dufahnak, miphun `tanhtuknak, ram `tanhtuknak, luantuk in nuamhnak, phun`tanhnak le tangka duhtuk nak zong siasal milem biaknak phunkhat a si ve. (Abik in peng le ram dawt cu a `tha ko, sihmanhsehlaw cu peng le ram cu Pathian nak in sunsak deuh ahcun a `tha ti lo). Mt 6:24 ah “Pathian le tangka cu a rian nan`tuankep kho lai lo,” tiah a ti. CCC No.2114 ah “Siasal biaknak cu minung kokek hngalhnak he a ralchanh. Milem a biami cu mah sinah a ummi a rawk kho lo Pathian he aa pehtlai mi theih-hngalhnak kha Pathian a si lomi thildang ah a thlengtu an si,” tiah a cawnpiak.

<<<<Kan peh`than telai>>>>