Biblehlun pathian phunphun

BIBLEHLUN CHUNG I A UMMI PATHIAN  PHUNPHUN LE MILEM LE ZUK HE PEHTLAI IN CATHOLIC BUPI CAWNPIAKNAK

Hal (7):    Biblehlun chan dihlak ah Pathian le Israel mi hna karlak theihthiamlonak a chuahter mi khuachia pathian hna, pathian nu hna zeizatdah an um hnga?

*Israel miphun hna nih zeibantuk phun in kha khuachia hna kha an biak caah dah Pathian thinhunnak an chuahter?

*Zungzal nung Pathian le khuachia pathian hna auh ning kha zeitindah kan thleidan hna lai?

*Budang hna nih an soisel bantuk in Bible hlun chan i milem le zuk hna cu Jesuh Khrih i milem maw an si?

*Catholic bupi nih “Milem le zuk nan ser, nan bia lai lo, nan lu nan khun lai lo,” timi nawlbia he pehtlaih in Khrihfa hna kha zeitindah a cawnpiak?

Leh:        Biblehlun chan i Pathian nih a thlauh mi biaknak dang pathian hna kong zoh tuah usih. Abikin khual pathian le pathian dang hna kong (strange gods or other gods) kong kan zoh lai. Israel mi hna Pathian nih a kalter nak mi ram kha an phak tikah a hmunmi Pathian kha an hlawt, pathian dang kha an biak caah dantat an si lainak kong kha a thi dengcang mi Moses sinin hlankan a rak chim (Deut. 31:14-29). Joshua a thih hnu zongah Israel mi hna nih a hmunmi Pathian kha an hlawt i pathian dang a simi Baal pathian kha an biak caah Pathian thin an phawh (Biaceihtu 2:6-24) nak kong kan theih. A hmunmi Pathian lawng hi pathian dang hna nakin a lianngan deuh ti kha kan theih`than (1Chanrelnak 16:25-26).

Judah Siangpahrang Manasseh cu Pathian a ralchanhmi sualnak a tuah caah a hmunmi Pathian Biakinn ah pathian dang milem kha a chiah, Van arfi le thlapa hna kha a biak, cucaah Pathian thin a phawh i aa ngaichih i kha milem hna kha a hrawh`than dih i a rammi hna kha a hmunmi Pathian lawng kha a biakter `han hna nak kong, A fapa Siangpahrang Amon zong nih a pa bantuk in a dang milem hna kha a biak ve caah Pathian thin a hunter nak kong, thah a tonnak kong (2Chanrelnak 33:1-25) ah kan hmuh. Cun min dang pakhat cu “EL (skygod)-Van Pathian” timi a si. Hi min hi min langhter duh lomi pathian auhnak  caah an hman. Ahnu ahcun a hmunmi Pathian min ca zong an hman (Gen 32:29/ 33:20/ Biaceihtu 9:46). Hmundang langhternak zongah an hman.

“Baal (Baal khuahrum)” cu a min a than bantukin a min tampi in an auh (Biaceihtu 2:13/ 1Siang. 16:31-32/ 2Siang 5:17-18/ 2Siang. 17:29-41). Jerimiah 19:5 zong nih Pathian nih a duh lomi Baal milem kha an ser i sualnak an tuah ti kan theih. Isaiah 27:1 ah “Leviathan” timi khuahrum kong kan hmuh. “Molech” timi khuahrum cu an fanu/pa hna pek tiang in an rak biak caah a biapi mi khuachia pathian(khuahrum) ah a rak cang (1Siang. 11:5-9/ 2Siang. 23:10-14/ 2Chan. 28:3/ Jerimiah 7:30-31/ 32:35/ Lamkaltu 7:41-43).

Kum (12) a si ah Siangpahrang a cangmi Manasseh nih Van arfi le thlapa vialte kha a biak i a fapa kha raithawi pekchanhnak tiangin a sualpalh i Pathian kha a rak ralchanh (2Siang 21:1-25). Cu lengah “Asherah(Anath)” timi khuahrum bawinu a rak biak sualnak kong kha (1Siang 14:23/ 16:32/ 18:18-19/ 2Siang 17:29-30) ah kan hmuh. “Ishtar of Babylon (Inana of Summer)” Khuahrum bawinu kha an rak biak sual (Jerimiah 7:18/ 44:17-19) “Astarte” an ti mi khuahrum bawinu kong kha (ISamuel 31:9-10/ 1Siang 11:5-8, 9:33/2Siang 23:13-15) ah kan hmuh. Cu khuahrum bawinu cu “Asherah” khuahrum bawinu ti zong in an auh. “Tamuz (Dumuzi of Summer) an timi khuahrum cu “Astareh (Ishtar)” khuahrum bawinu fapa a si i a min a rak thang (Exkiel 8:14). “Dragon” timi khuaahrum nu zong kha an rak biak, (Biaceihtu 16:23/ 1Samuel 5:1-5/ 1Chan 10:10). “Hosts of Heaven (Zadiac)” an timi khuahrum hna kong cu (Deut 4:19/ Zerimiah 8:2/ 44:25) ah kan hmuh. A caancan ah cunglei i “Hosts of Heaven” kha sertu Pathian ca zong ah an hman. A hnubikah “Bel Marduk” timi khuahrum cu a rak biapi ngainak kong (Isaiah 46:1/ Zerimiah 50:1-2) ah kan hmuh.

<<<Kan peh`tha telai>>>