DAIHNAK NICEU DAWH

                        DAIHNAK NICEU DAWH KHA POMNAK

A SAU NGAIMI HNAHNAWHNAK LE THLALAUNAK HNA NGOLDING NAWLNAK

   Ka dawtmi u le nau hna, kanmah pumpak kha tuaktan zohfel ṭhannak, midang he remnak hna kha hleice tuah i ruahkhun ding a simi a thiang i a sung tukmi ulhcaan chung khuallam karhlan buin Pope Francis i a thukbik thinlung in a rak chuak i hma hna he a khatmi, kan vawlei khuaza kipah awtleng aa thuat mi daihnak auhthawng kha lehrulh ṭhannak in kan lungrual hna usih!

   Kannih i a ṭhawngmi thlacamnak hna chungah sualnak zeihmanh ngeih lo hna i fah ngaiin an ṭahhramnak hna, namneh hrem a ingmi hna mitthli, hnahnawhnak i khat le khat pehtlai tein kahdohnak hna chungah kharkhumh a simi hna i a maan cikcek mi zanmang hna kha zei relloin um hlah uh. A palh mi hramhram in lemsoinak hna kha hlawt i, daihnak nih a thlenpiak khawh mi thazaang kha pom cio ding ah ramkip sinah nawlnak a tuah lengmang mi Pope Francis he hmunkhat kutsih in dir hna usih!

   Ulhcaan, caan sunglawi chungah aa rungtein a simi Jesuh Khrih cawnpiaknak kha ruahṭhan hna usih! Adik ahmaan mi thazaang timi cu toidornak le salcannak thawng lawngin kan hmuh ti kha kuttongh hmuhsak in a rak cawnpiak hna. Khrih cu dawtnak tling, toidornak tling he zultu hna ke ṭawl dingin a khuk aa bilhnak cu adik mi aana timi khuhchilh uknak ah siloin, midang caah pumpek sal cannak lawnglawng ah a um tikha a rak langhter.

   Tuni caan lio ahhin hnahnawh buainak hna cu thinphan thlalau awk tiangin a tam. Jesuh Khrih chuahnak Vawlei telin, Ukaraine le kannih kan nu Myanmar ram zongah a canglio mi thil a si. Aw santer deuh in daihnak caah lungtho tein thlacam hna usih! Kanmah kha ningcangte sinak ah a ummi daihnak veel lawksawng he a tleu deuhmi hmailei chan kha a kan zaangfahnak lai donglo Pathian sinah thlacam usih! Kannih i Vawlei ah rum ngaiin a kan chiah piakmi, minung hrihram hna kha raldohnak i lungtlin lonak hna lakah uai i tilhter loin, mansung ah chiah in ci-erh hna usih! Ahnu hleikhun chanpaoh mino hna cungah hram bunhnak cu caansau a hmun ding mi daihnak caah hram bunhnak a si.

   Pope Francis i a fiang a piatmi nawlnak kha biapi ah tuah cio hna seh, Khat le khat pehtlaitein biaruahnak le rem ṭhannak hna kha, daihnak ah hmaihoih mi kalnak lam i a hrampi sinak in pom kho cio hna usih. Kannih thinlung chungah ruahchannak meilei kha kanghter thluahmah ding, huatnak le hnahnawh buainak hna i lungput aa dannak hna i a khulrannak kha hrawhthlaknak ah a fekmi duhnak ngeih ding i zuam peng usih.

   Pope Francis nih atu le atu mino hna sinah thapek in a sawm theo mi hna cu “Nannih nan ruah channak kha in firpiak hna hlah seh.” Tuni Vawleipi nih a tonmi hnahnawhnak hna, buainak poipang hna he nan hmaitonh tik hna ah, thihnak a tei i, kannih kha a dikmi nunṭhannak lamthluan kha a kan petu, thihnak in a thoṭhan mi Jesuh Khrih kha hngatchanh in kan ruahchannak kha kan ṭhanter awk a si. Kannih kha, hi ruahchannak nih nunṭhannak i Ceunak kha a kan hrin piak. Lungdongh lungrawhnak hna kha lonh khawhnak thazaang ṭhawnnak a kan pek. Hi ruahchannak nih ralram hna a chuah ter i, kannih minung phu/bu chungah erhmi zei rellonak le hmaitonh tein i tonnak timi thlaici kha a thianh a ṭhawl i, hmunkhat tein tinvo co ṭinak lungput hna kha a hrin piak.

   Raldohnak i hriamnam thilri hna kha daihnak i thilri hna sinak in, ṭihphan thlalaunak kha a ralchanhnak um lomi zumhnak sinak in, thlen khawhnak dingah Vawleicung dihlak nih hmunkhat ah kutsih in tuahṭuan hna usih. Kannih kan biafang hna cu Vawleicung dihlak nih theih khawhmi kan u le kan nau hna i holhbia si ko seh. Kan tuahmi paoh zong kha daihnak hmuh a duhmi i, biataknak nih kilveng piak ko seh. Hi a ṭhami daihnak caah zuamnak cu ṭhihphaihnak ah fek tein, hrihram a bunh mi thinlung hna kha a nemter i rem ṭhannak kha pom khawhnak thazaang ngeih dingah Pathian veel laksawng kha hal cio hna usih!

 

Shanthi, Shalom Peace Salaam.

Cardinal Charles Bo 

President

Myanmarram Catholic Bishop hna Hmunpi

Yangon Catholic Archbishop.

 

                                                                             A lettu ;

                                                                                      Norbert Ca Ling (OSC)

                                                                                      Hakha RVA- Ca lettu

                                                                                      26 Mar 2024 (Tue)    

 

Add new comment

3 + 0 =