Hruaitu Hna Upat peknak

Upa hna upatpeknak

CATHOLIC FALE HNA NIH HRUAITU HNA AN UPAT NINGCANG

Hal (6):    Nannih RCM pawl nih Pathian ser ciocio minung pakhat le pakhat kha, khukbil, kun, lukun in upatnak nan i pek tikah, “Keimah hlei in Pathian dang zeihmanh nan bia lai lo, nan kun lai lo,” (Exo 20:3-4) chung i Pathian nawlbia kha nan buar a si lo  maw? Cu bangin nannih RC Khrihfa hna nih Khrihfa upa hna, Nu le Pa hna, Catholic “Pope” thawkin Bishop, tlangbawi (Siangbawi), Sister hna hmaiah Khukbil in upatnak nan pek tikah Pathian Nawlbia nan buar lo maw? Nu le Pa upat, Pathian rian`uan hna upat peknak nih a santlaihnak a um maw? Nu le Pa thluachuah hi fale cungah a tlung taktak maw? Nu le Pa, Sayate le Pathian minung hna kan serhsat ah tah zeidah a cang lai?
Leh:        Upat awktlak a simi upatpek cu, Pathian chim lo, minung hmanh nih kan duh kan tlaihchan mi a si. Cu tuahsernak a simi upatpek tikah tuah ningcang (pungsan) a phunphun a um ti kan theih hmasa a hau. Gen 18:2-3 ah, “Abraham cu a thlam innka i a `thut lioah khan, khua a hei zoh i mipa pathum an dir ko kha a hmuh hna. A hmuh hna le cangka a va tli i a va don hna. A khuk aa bil i Bawipa, ka sinah tantak loin kei santlai lo pa hi, ka lanhtak sawh hlah,” tiah a nawl hna kha fiang tein kan hmuh. Hi Bible ah “Zumhnak i Pa,” kannih vialte nih zohchunh mi, a fapa ngeichunh te hmanh Pathian a pekchanh ngam caah, Pathian thluachuah khatlak a rak comi Abraham hmanh nih Pathian a si lomi minung pathum (Vanmi pathum) khukbil lukun in upatnak a rak pek hna caah fapa laksawng a rak hring lo mei! Amah nih nawlbia a buar ti khawh a si lai maw? Pathian nih dan a rak tat maw? Gen 19:1 ah, “Zanlei sang ah vancungmi pahnih kha Sodom khuachung i an va luh tikah, Lot cu hauka hram ahkhan a rak `thu. A hmuh hna le cangka a tho zau i annih kha a rak don hna. An hmaiah cun a kun i, “Ka Bawipa le hna, nan salpa inn ah rak lut tuah ulaw, ka tlung tuah u, nan ke i `tawl ulaw tuzan cu riak u. Thaizing ah tuante nan tho lai i nan duhnak ah nan kal chin te lai,” tiah a ti hna mi kan hmuh. Hi ahhin Pathian a zum taktak mi Lot nih Vancung mi hna kha Vawlei ah a kun i a dong hna lo mei? Amah nih Pathian nawlbia, “Keimah hlei in Pathian dang kha lukun in na bia lai lo,” a timi kha a buar a si maw? Gen 19:10-11, 15-27 ah, Lot cu innchung ah a lut i ral a rak sermi hna kut in vancungmi nih an khamh i a innchungkhar zong kha Pathian nih Kat mei chung in a rak khamh hna. Cucu vancung mi hna kha a upat hna nak theipar a zunmi a si.
    Gen 33:3-4 ah, “Thluachuahnak a ka fir piak tiin Esau huatnak a tongmi Jacob nih a u Esau kha remhnak tuah dingin a hmai vawlei ah voi sarih a kun caah Esau nih a zuanhnawh i a kuh i a hnamh. An pahnih in an `tap, ti kan hmuh. Jacob nih a u kha upat a peknak a si. Gen 42:6 ah, Izipt ram i mang`tam a tlun lioah Josef cu ram uktu a si i a rammi hna kha facang zuartu rian `tuanvo a lak lioah, “Josef a ule cu an ra a hmaiah cun an kun,” tiah a `tial.
    Hika ahcun minung le minung karlak upa deuh cungah upat peknak a si. Pathian thluachuah he khamh a simi Josef hmanh nih aa tlak caah a ule upat peknak kha a rak co. Cucu Pathian nawlbia a buarmi a si maw? Gen 48:1-22 ah, “Josef fale pahnih Manasseh le Efraim hna kha an pu Jacob nih thluachuah a pek dih hna hnuah Josef nih an pu Jacob phei cung cun a `thial hna i kun in upat peknak a tuahter hna. Cu ni ah zeitluk indah a fale pahnih cu thluachuahnak an co ti zong kan theih. Kum upa cang mi pipu hna kha kun i upatnak a pemi hna nih thluachuahnak an hmuh cio ti cu hlanlio tein kan theihmi a si. Catholic hna caah hihi kan upa hna, nu le pa hna, Siangbawi hna, Sister hna, pupa hna kha Nu le Pa puai ni ah siseh, zeitik caan paoh ah siseh, upat peknak cu a sunglawi tuk mi a si ti kan hmuh. Joshua 5:14 ah, “Bawipa ralkap bu hruaitu ralbawi, vancungmi kha Joshua nih vawlei ah a bawk i a biak,” ti kan hmuh. Hika ah, Pathian hmai lawngah khukbil in nan biak lai, tiah Moses nih Nawlbia pahra a lak lioah mithmuh tehte a simi Joshua zong nih zeicah Pathian a silomi vancungmi kha a kun i a biak kun? Nawlbia a buar maw? Tuahtlak mi a tuahtu a si ruangah Pathian nih Israel mi hna hruaitu dirhmun a pek rih ti philh hlah usih. 1Samuel 28:14 ah, “Sawl Siangpahrang nih tarpa pakhat Angki fual aa hrukmi cu profet Samuel a si kha a theih tikah Vawlei ah a lu a kun i upatnak a tuah,” ti kan hmuh. Hika ahhin Israel miphun hna Siangpahrang, Pathian amah nih a thimmi Siangpahrang Sawl nih Pathian kong a chimtu profet Samuel kha lukun in upat a pekmi a si. Pathian Nawlbia a buar maw? Ruat hmanh! Bible an rel i hibantuk sining an theih caah an  Siangbawite le Sisterte kha aa khat in lukun khukbil in upat an pekmi hna a si. Annih kha Pathian ai in an biakmi a si lo. Upatnak an pekmi a si. Hawi Khrihfa hna nih cunglei i Bible kha an rel lo caah a si. Mah hmuh lomi thil a tuahtu hna va soisel rih cu ningzah awk a si. 

*Kan pehthan telai>>>
 

Add new comment

2 + 9 =