Lai Nunphung (Fanh le dawi)

5.Fanh le Dawi
    Hringtu nulepa nih a rak haltu hna mui le sam, zia le za, a nunnawl, a thlawh`tuan, an khuasak tintuk zoh in nupi fate cawmhlawm kho dingah an hmuh hna i an cohlanmi hna cu an fanule nih al hi a rak umtuk lo. Asinain, nulepa nih fanule lungthin zoh loin palei ngeih le chiah, chaw le va zaangram ah fanu le an duh na loin til, ben le hnek in vatter hi a um tawn. Cucaah chaw mitthit ruangah fanule thilben in vatter fial cu, fanule zuarh asi lengah man hna hi kanman kilhkamhtu si ti loin zuarhchaw ah kan hman tawn. Cu ruangah atu mino nih man hi a `thalo tiah a doh in an dohnak zong hi asi.
    Cubantuk caan a phak tikah fanule nih duhmi dang sinah tlik le zam a chuah le fanh le dawi a chuahnak asi fawn. Cutikah, a tikho le fanu zawn a ruatmi an si ahcun; palei zong nih fanu kha an hnatlakmi asive ko ahcun; a rat zaan ah muikhum loin a thaizingte in an kaphnih nu le pa hna kha an i hmutong i arsathah he fonhtonh a um tawn.
    Hibantuk fanh le dawi a um tikah palei nih umpi awk i an timh ahcun; khua khat an si ahcun a thaizing he aa naibik ni ah a nu le a pa kha mi i sawm in an va chawnhbiak hna. Khual an si belte ah a rat zarh lenglonh loin a semnak nu le pa sinah mi i sawm in ar an i put i an va chawnhbiak hna.
    Hibantuk caan ah a fantu `ta, pa nih a fanhmi kha an duhlo asiahcun an farnu kha a ban in an i hnuh i an inn ah an i `tinpi khawh. Inn an phak tikah biatak tein an chungkhat he chimhhrinnak an ngeih tawn hna.
    Hibantuk asilo ahcun ngaknu nih tlangval a fanh zaan ah sahring thiluanh in an rak umpi i a hnu ah `thitumhnak an tuahpiak hna. Nu cheukhat pawl nih anmah lung kha i rinh i tlangvalpa nih a ka umpi `tunglai lo ti kha ruat hleng loin, mah duhrinh in tlangval a dawi le a fanh tikah; palei nih umpi an tim lemlo nain vanni    tin lailo ruahah rak muikhum zong a um kho ve. Pa nih nu kha a duhlo le a umpilo tikah nu cu a duh tik paoh ah a umkal kho `than.
    Hive bantukin nulei nih an fanu nih a fanhdawimi tlangvalpa kha an hnatlaklo ahcun a `ta, a pa nih hnuh le dawh zong a um ve.
    Pa zong nih ngaknu pakhat kha a duh ko nain zeite he a `hutto lo ahcun arsate aa zuat i a zat tikah arsa laang he (laang in arsa an i put i ti duhnak) nungak kha an luh hnawh ve ko. Cucu fanh, fuh a si ve.
    Hakha Sangpichung Yongte an timi nih Sangpichung Nung Hmung inn ah nupichun si awk in a fanh tikah arsa an rak thah, man cheukhat zong an rak man i an umpi ve. <sup>12</sup>
    Hakha, Kodawn sang i Thlaceuchung fanu Sai Doi nih Hluan Sang cu a fanh i thla hnih khat a um. Asinain Hluan Sang nih muikhum le a dang thahnak a tuahpiak duhlo caah Sai Doi cu a kir `than. ¹³

^{End Notes:}

^{12.Op.cit.,W>R> Head. 9.}

^{13. Ibid. 17.}

^{#Credit to Stephen Ni Kio}