Lai Nunphung (Mak a tlamtlinnak)

Maknak

Mak a tlamtlinnak

Laimi nih nupi kan ṭhit tikah fakpiin kan i ruah hnuah nupi kan ṭhit bantukin nu zong nih fakpiin khua an ruah hnuah an kan vat ve. Hibantukin mak caan a hung phanh lai tik zongah khuaruah cikcek hnu lawngah mak a si ve. Culo ahcun nulepa i tonnak hi ngakchia inntelenh, lenhthil ham bantuk asi hnga. Hibantukin nupi he ṭhencheu dingin caan a hung chuah tikah mak tlamtlinhnak cu phunhnih a um.

A pakhatnak cu a nupi nih nifatin a kuttlaih a tuha le a sei kha, a va nih a pek i ‘kaan mak’ a ti ahcun a tlingmi maknak asi.

A pahnihnak cu mak timi bia a chim lai zaanlei ah zanriah kha buh le sa an tuah. Cucu ‘ṭianbuk erh’ an ti. Lo in an tlung i zanriah kha khim tein an ei hnu ah, a sei le a kutlaih thmui a pek i ‘kaan mak’ tiah a chim ahcun mak a tlamtling ko.

Kir le maknak kong he pehtlaiin Head nih a rak ṭialning ah hitihin a fianter.

Pa nih a nut (impotent) ruangah i ṭhen a si ahcun pa cu man a sungdih lai. Puman manh le arsa a thah rihlo ahcun a that ti lai lo.

Cozah nih Lairam an pen hlanah cun pa nih, va ngeicia mi nupi kha a tlaihhrem, a sualpi ahcun, a sualpitu pa kha nu i a ṭa le pale nih an nawn men ko lai.

Va ngeicia nu nih a va cungin pa aa duh ahcun a mancia chaw vialte kha a rulhdih lengah a va nih a nupi kha a hnar le a hnakhaw hna kauh in a lehrulh men ko lai.

A va nih hri le hreng saupi a in (thong a tlak) ahcun a nupi a kir kho ko. Asilole va dang a ngei kho. Man kong i ceih in a kir kho ko.

A va asiloah a nupi nih thinghmui hma a in ruangah an i ṭhen ahcun man a kir ti lai lo i manba zong an pe ti lai lo. Pa nih hibantuk hma a in ruangah a nupi nih a kaltaak ahcun man a kir lai lo.

A nupi nih a va sinah a um duh tilo i chimhrelh awk a ṭhat tilo ahcun man an khirh lai i a kir ko lai.

A nupi nih zu a rit lio ah pa aa duh i a va nih a ngaihthiam khawh ko ahcun ṭhen loin an um kho ṭhan ko. Cubantuk caan ah a va nih a ngaihthiam khawh ahcun a nupi chungle nih a nupi i a sualnak le ningzahnak thianhnak caah sa an thah ali i a sa cu khuami vialte thawngtheihnak ah tang an zam lai.

Kan Laiphung ah va ngeicia nu nih a thli tein pa i duh khawh asilo. A thlitein pa aa duhziar i chim loin a um ahcun vale thihnak asi. Cucaah va ngeicia nu nih pa aa duh sual asi ahcun a sual le cangka in a va kha ihpi ti loin a ṭa a pa inn a fuh lai i a chimh hna lai. Vale nih pasualkuai kongah ngaihtham hi a umlo ti tluk asi. Zeicahtiah thihnak, chantawinak asi ruangah asi i ahohmanh nih chantawi cu an duh cio lo.

Head nih a ṭialmi nih hin hmanthlak bantukin a tanglei ah a vun fianh hna.

Sangtechung That Cin nih an nu a mak i midang a ṭhit. A ṭhit tharmi cu a mak ṭhan i hmasa an nun cia kha a ṭhit ṭhan. Cucaah manpi tluk in hmaitlam ah siapi a manh ṭhan hna.

Sangtechung Lian Mo nih a nupi cu a velh i a nupi cu a ṭa ~ial Ling inn ah khua a tli. A auh tikah a ṭa ~ial Ling cu hmaitlam caah siapi a manh. Lian Mo nih cun a sikṭhuat ṭhan hoi i khua a tli ṭhan. An au len nain a nupi cu a kal duh tilo nain a ṭa nih cun a fialtuk caah a va inn cu a tinh ṭhan. Lian Mo nihcun hmaitlam a liam ṭhan i ~ial Ling nih cun cawtum in sahring thi a luanh ve.

Sangte Pa Awi nih a nupi cu atu le atu a velh lengmang i, a ṭa, pa nih an hnuh hnu ah mantlau an hauh. A ṭa, pa inn a phanh hlanah Pa Awi nih manpi he aa tlukmi a manh hna i an ṭha.

Khenglawt chungphun Tluang Er nih Sangpi No Hngel cu a ṭhit i ngol hngal loin a nupi cu a velh lengmang. Cucaah a chungle snah a zamtaak. A chungle nih mantlau le a dang man a tangmi vialte kha manh an hauh i kumkhat nih an tuk. An nituk a tlin tikah a va nih a hlam hleilo caah a nu le a pa nih muikhumm asiloah thlathlauh an timh. Bawi le tlang hmai i biaceihnak an in tikah bawitlang nih ‘Hibantuk cu thlaruk lawng nituk phung asi’ tiah an chah Tluang Er nih cun a nituk a luan caah mak ah a cang. Cucaah a nu le a pa nih an fanu cu an thlathlauh.

Dongva khuami Kawi Hmun nih Sangte fanu Ret Te a ṭhit i kum nga chung khua an sa ṭi. Mah khua an sak chungah cun man vialte cu an tlinh dih. An i umh tlawmpal ah an pa cu a nu ai. Aa bolsan lengmang ko nain a ṭha kho hlei tilo i a nut hnu kum nga ahcun a nupi cu mak ah a tla. A chaw cu a sungdih ko.

Lunghnam pa nih Nabual Ni Lawng a ṭhit. Ni Lawng cu zu a rit lio ah pa nih an sualpi ai. A va nih a ngaihthiam caah a ṭa, a pa nih hmaitlam ah sia an thah. A va a unau nih sia le vok in an rak muikhumh.

Acozah an kai hlan ah Khuabe Ram Khar nih a nupi Tawk Iang cu a cungin pa aa duh caah a hnakaw a kauh (slit).

#Credit to Stephen Ni Kio

Add new comment

1 + 0 =