LAI NUNPHUNG (MUIKHUM)

Muikhum

          Hi biafang he pentlai in tam nawnte upa tonnak ka ngeih hna. Ka halmi hna cu muikhum le thlathlauh hi dannak zeidah an ngeih? Zeidah a hme i zeidah a ngan deuh? ti kha a si. Kan pale Rev. Mang Kio, Pa Uk Mang, Rev. Van Hre in Khuathar, khuahlun upa pakuahra tiang ka ton hna i ka hal hna.

          Rev. Van Hre nih ‘muikhum cu Hakha holh a si i thlathlauh cu Thlantlang holh a si ko hen cu’ tiah a ka leh. Khuathar kan patar pawl nih an chimmi cu, “Kanmah hna hmet lioah thlathlauh ti cu kan thei bal lo i, chan le khua aa thlen i kan i cawh dih hnu ah hi bia hi kan theihmi a si. Cucaah Thlantlang holh a si ko” tiah an ka ti. Cucaah muikhum le thlathlauh hi aa khatmi a si ko rua.

           Hi biafang hi ningzah huhphenhnak ah rak hmang hna sehlaw a dawh. An rak hman ning cu mi pakhat nih zunceh, innlam palh, innlak i sa an zawh, zu an din ah savo le zulap tin lo, pa nih a nupi a mak tikah a nu le a pa nih, nu nih pa a fanh tikah an tuah tawnmi a si. A tambik cu vok thah hi a si i, a dir ngaingai thah cu mingei deuh lawng nih an hman.

           Hi nih hin a langhter mi cu ‘keimah ve‘ timi lungput zong aa tel lai nain ningzah an tonnak kha nihin i kan i umpi mi, kan thuhphenhmi thinlungput hi si loin zapi sinah a ngaihchiatnak, a mualphonak, a ningzahnak kha fianghlang tein a phuan a si kan ti khawh.

             Cun kapkhat in kan zoh ahcun nu kha a va nih a mak tikah kanmah chungphun ah a kir ṭhan cang ti hngalhnak, thanhnak ca zongah mui i khum a si fawn.

             Nu nih pa a fanhmi hi nihin mit ahcun ‘duh lo mi he umnak cun duhmi he thihhlan khuasak cu kan duh deuh’ ti sawhsawh a si ko lai nain; duh awk hringhran lo a si le chaw le va rumro duh ruang i asilo ahcun, hringtu nu le pa duhnak kha zulh a hau mi a um ve. Semnak nu le pa nih a caan ah mah fanu le nun i nuamhnak duh ah siseh, kan Laiphung in ṭangle fapa cu vat awk ding ah fial cu a si ko. Asinain nu nih duh dang cungah a tlikzam tikah nu le pa lawng siloin, amah pumpak a man hrimhrim aa ṭhumh lengah a phunpi ning zong a zahter hna. Hi bantuk tlik le zam hi a ṭha ko ti hi kan nupa hna nih an rak hngalh ve ko, nain Laimi kan nunphung lonh le buar an rak duh lo i, kan nunphung kha upatnak an pek ruangah fanh le dawi an rak hman lo hi a rak si.

            Cucaah nu nih pa a fanh tikah maihngal ngai cun an rak um lo. A dawimi nu le pa nih an duh lai le duh lai lo zong a um i mi inn tangah luh lai cu fakpi in a tuak hmasa ve. Cucaah nu nih pa inn tang i a luh tikah, va a fanh tikah puanlu aa khuh i innchungah a lut. Chaksang ah lang loin puanlu aa khuh i minute pakuahra tal a um. Cu hnu ah a luhnak chungkhar pakhatkhat nih a puanlu hi an rak hun tawn. Cu tluk in mi hmaikhap loin luh hi a si caah fanh le dawi hi biatak tlak ruah hau in a um. Cu behbeh i sahringthi luanh in an muikhum dih lo le an umpi duh chinchin lo ahcun cu ngaknu man cu a dih ti tluk in ruah a si caah muikhum a rak hauhnak cu a si fawn.

            Cu bantukin a cuza ciami upa pakhat nih sa an zawh tikah siseh, zu a hrawn tikah siseh, hawi nih an tin cio mi zulap, savo an phawt hna lo tikah an ning a zak i an i muikhum tawn. Cucaah dahkaw chunhthah chungṭuan tikah mah chung taktak tule fa nih ṭuan a sinak a si fam cu. Cucaah muikhum timi cu ningzah i huhphenhnak caah hmanmi tuahmi a si i a mui le a thla kha kan khumh, kan sinah kan umter ti duhnak a si.

Credit to Stephen Ni Kio

Add new comment

8 + 1 =