Lakfa, lenfa, Kir le mak (Lai Nunphung)

Lakfa, lenfa

Tlangval pakhat nih asiloah nupi ngeicia pa nih innlak ngaknu sinah fa a hrin i a nu kha a ṭhit duhlo ahcun ṭhitlo in umkhawh asi ko. Mah he an hrinmi fa kha pa asi i, a nupitak he fapa an ngeihlo ahcun mah fapa kha a tlanh khawh. Tlanh kan timi cu arsathah le phunthawh man kha chim duhmi a si. Nute a si zongah cubantuk ṭhiamṭhiam in a tlanh lai i amah fa ah aa chiah khawh ṭhiam. Mah lenfa i hrinmi fa cu a tlanhlo ahcun a pi le a pu fa ah a cang ko lai.

Cucaah Lai ngaknu a cuza cangmi cu fim tein nun le khuasak an i zuam. A ṭhi hngalomi pa kha fim tein hrial an rak i zuam tawn. Zeicah kan ti ahcun nu cu pa tang i rak chiahmi an si caah hibantuk caan an ton zongah ngaihchia le hacangrial in an nun an hman tawn. Hi lengah hibantukin lakfa a hringmi cu ṭale pa nih siseh, khuapi le mi nih siseh, nautat le zawmtaih in an zohchuk tawn hna. Va ṭha an tong kho ti lo.

 Kir le mak

Kir timi hi nu nih a va kha a phunphun ruangah hi pa he cun kan nunchung ruakfim in khua kan sa kho lailo tiah aa ruah ciammam hnuah a ṭa le a pa a fuhṭhan hna kha asi.

A va hi zu a din lengmang ruangah siseh, rianṭuan le khaitinh a tuaktanlo mipa asiah siseh, a va nih a velh lengmang ruangah siseh, a kirtaak khawh ko. Hi bantukin nu nih aa ruah ciammam hnuah a kir asi ahcun man vialte kha an khirhdih lai. Asinain hi bantukin man an khirh tikah pa le fa an karlak ah an um ahcun chaw dang vialte cu a kir lai nain phunthawh cu a kir lai lo.

Hi bantuk ṭhiamṭhiam in kan Lai nunphung ahhin kir le mak hi, fawite i a ruatmi hna caah cun a fawiko nain harpi in a ruatmi caah cun thil harngai asi ko. Cucaah a va nih an innchung tang an khuasak a phunphun a ruah i a lung a tlin khawhlo ruangah siseh, a nupi nih a va cungin pa aa duh ah siseh, a kut a zao i thil a fir ruangah a chimh lengmang i a duhlo ahcun siseh, an thinlung an i ton khawh tilo ahcun a mak khawh ko. Pa nih ‘kaan mak’ tiah bia kaakhat in tlam a tling khomi asi ko.

Hibantuk caan ah nu caah ngeihvo (right) an ngeihve mi cu sualpalhnak nganpi an ngeilo nain a va nih sik velh, zudin saei, namneh in nupi cungah lungtling loin khuasa i a um ahcun ralrin pek canah a ṭa le a pa inn ah a thin rolhnak ah khua a tli ko lai. Hibantukin khua a tlik tikah a chungkhat rualchan cingla manco vialte an i tong lai i mah kong he pehtlaiin lung i tonnak an ngei lai. Cutikah an fanu nih sualnak a ngeih ṭunglo ahcun man an hren ko lai. A va unau zong nih an nupi cu a va cungah sualnak a ngei ṭunglo nain hi bantukin khua a tlik ahcun an kawhauh ve lai. Hnatlaknak in an kawhauh khawh ahcun a va inn ah an ṭinpi khawh ko. A duh ahcun a va nih sahring thi a rak luanh khawh ko.

Zeidang siṭung lo, namneh in velhvuak ruang tibantuk, dinei i ṭuan tinh lo tibantuk ruangah a si ko i a zia aa ṭhinh hleilo ruangah khua a tlik ahcun a nu le a pa nih a va kha rak kawhauhnak nithla an tuk lai. An nituk tiangah a va nih a hruihlam lo ahcun a nu le a pa nih an muikhum lai. Muikhum timi cu a va nih a mak caah nihin thawkin ngaknu asi cang tinak caah thawngthanhnak asi i a duh ahcun vadang a ngei kho ṭhan kho cang.

Teh (Thor) nih phundang thil an ngeihmi cu Pa nih a nupi kha a mak ahcun man a manhmi vialte a sungh dih lengah an nupa an ṭuan, an kawlhawl mi thilri vialte zong kha a pekchih dih lawngah a mak khawh.

Nu nih a va kha kirtaak a duh ahcun a va nih a manhmi chawva vialte a khirh hnu lawngah a kir kho. Hibantuk phung an ngeih ruangah an i ṭhitumh lio ah upa nih zapi theih tein mi zapi hmai ah chaw le va an i manmi kha an chim, an thanh hna.

Credit to #Stephen Ni Kio

(Lai Nunphung)

 

Add new comment

9 + 3 =