Lungthin `tha Ngeih a Herh

6. MINUNG LE DAIHNAK THINLUNG

Daihnak timi cu minung le minung adik ahmaan mi hawikomh pehthlaihnak kha si. Hi ahmaan mi pehtlaihnak ah nun ziaza hna kha zulhnak zong aa tel ve. 

Minung hna cu pakhat le pakhat ton hawimhnak ah diahnak thinlung he i ton in hawikomh pehtlaih cio awk asi. Cucaah Mithiang Paul nih mivialte he i rem awk kha asi khawh chungin i zuam u, tiah a rak cawn piak (Rom. 12:18). “Daihnak cu minung pumpak pakhat cio thinlung le a thiangmi lungthin cungah aa hngatchan. Pope John Pawl II nih a forhfial mi cu midang kha daihnak na pek hlanah mah thinlung nunnak thlarau chungah a um a hau. Daihnak cu mi zapi ca asi hlanah minung pumpak pakhat cio he pehtlai mi asi. Kha daihnak a nung i a `thanchonak dingah Khrihfa kipnih thlaici erh piak ding `tuanvo a ngei” tiah a ti. 

“A chung (thinlung chungah) diahnak a umlo ahcun a leng daihnak a ngei kho lailo” ¹

Tibet Biaknak lei hruaitu le Daihnak Nobel laksawng a hmumi phungki Dlailama nih , “ vawlei cung daihnak cu vancung zongin a ra lo. Vawlei pumpi diahnak cu minung pakhat cio chungin a ra lai” tiah a rak ti. ²

Minung hna i thinlung chungin sawhsawh tein a ra chuakmi daihnak lawnglawng nih adik ahmaan i saupi a fek khawh.

Mahahtama Gandhi nih a chimmi cu “Keimah cu diahnak i minung ka si. Daihnak kha ka zumh. Asinain, man peklo mi diahnak cu ka herhlo. Thlanmual hna ah kan hmuh tawnmi daihnak kha ka herhlo. Minung i thinlung chungah fektein a ummi diahnak lawnglawng kha ka duh” tiah a rak chim.

Hakkauh mi, thinhun mi, dinlonak ah a lung a thling mi, minung thinlung chungah daihnak an hmu kho lo. Zeiah kan tiah cun, cu mi hna i nunnak ah Pathian i a daimi dawtnak kha an pom (cohlan lo) lo caah asi. A lin a kang mi thinhunnak, hakkauhnak, thil theihlonak he midang kha kan komh hna ahcun dai tein kutsih um`i khawh asilo.Mah i nunnak ah daihnak kha hmasabik ah kan sersiam a hau. Pathian kha nunnak ah kan cohlang i a `thalo mi sual tuah hna kha an hrial lai.

“Lungthin `tha a ngeimi hna vawlei ahhin daihnak um ko seh” (Lk. 2:14) a ti. Khrih Pathian i thawng`tha kha nan `tang in nan pom cio lai. Lungthin `tha a ngeimi, dawtnak a ngeimi hna kha, Jesuh Khrih nih a pekmi diahnak cu  a tlukmi an thinlung chungah a um. Cu daihnak cu rili hmaitang, a thukbiknak hmun i a ummi ti he aa lo. Rili hmai cungah tilet hna le thlichia hna ruangah diahnak a umlo nain rili hmai ti tang i a thuhnak hmun ahcun dai zirziar in a um.

Lungthin `tha a ngeimi hna nunnak ah harnak hna, piahtana hna, fahnak hna he an ton zongah diahnak a um lai.

Lungthin `tha a ngeihmi hna cu `thatlonak (chiatnak) kha an huat i dawtnak kha man ngeih ah a chiami an si. Dawtnak cu ti he aa lo. A kik i a dai. A kik a dai mi ti he zungzal a tonmi thil hna cu ti i a kik a daihnak kha an hmuh. A lintuk mi mei he aa ton zungzal mi thil hna cu mei linhnak kha hrawm in an cohlan ve. Cucaah mei he aa lomi huatnak kha hnon i ti he aa lomi dawtnak kha kan  sersiam lai. Minung pakhat cio cu daihnak he midang kha i komh hlanah mizapi caah daihnak rian`tuan hlanah mah nunnak ah diahnak hmu dingin aa zuam hmasa lai. Cubantuk zuamnak ah mei he aa lo mi chiatnak kha hnon i ti he aa lomi dawtnak lungthin kha sersiam hrimhrim awk asi.
 

End Notes;
1. Cf. Thomas Pazhayan Pill. Pastoral Quides Vol. II Fundamental Theology and Virtues. K.J.C. Publication, Bangalore 1984 P. 942
2. Cf. Sunday Examiner May 3rd 1991 Reflection on Peace of mind P. 224.