Nupi Phunli

Nupi phun li

            a. Nuhrim

          Nupi hmasabik ti kha asi. Nutak asilole nuchun ca zongah chiah khawh asi. Nutak a umlo caan paoh ah nutak i a `tuanvo kha a va nih a chaanter. 

            b. Nutak                                                                                                        

            Pa nih nupitak caah kawlchaw le arsa tling tein a `thit i arnak a hmanhmi asi. A thlacamnak khothlaban asiloah thlakhoban kha a tawnghter mi asi. Mah nu he an hrinmi fapa cu a pa ro conak nawl a ngei.

            c. Nuchun

            Nupitak le thlacamnak khokheng hrawm awk ding caah `thitmi asilo. Inn lakah a lang in a lenmi asi asilole nupichun hrimhrim ah chawva tling tein a `thit i arsa zong a thah khawh mi asi. A duh ahcun a inn zongah aa umpi khawh i innchung tang rian`tuantu lawng asi i nawlngei `tunglo, khuazeimaw caan nupi asi. Hibantuk nuchun hi anmah phun tia zong, anmah tia lo zong an si kho ko.

            Mah nu hi a nupitak he fapa an hrinlo mah nuchun he fapa an hrin ahcun `tha tein arsa a thahmi fa asi caah rocotu tiang a phan kho ko. Amah phun tia asi i nutak he fa ngeilo i an um, nutak zong nih a thih taak i pa nih a duhmi asiahcun nutak ah a chiah khawhmi asi.

            d. Nutlai

            Nupitak a thih hnu ah `thit nolhmi asi asiloah a nupi nih a thihtaak, a nupi he an i `then hnu ah nupitak ah khahmi minu kha asi. Amah chungkhar chung zongin siseh, mi chung zongin siseh, a `thitkhawh ko. Mi a `thit hna zongah, mah chung a `thit hna zong, a nupi nau aa laak zongah man cu a ning tein A in a thawk lai i Z tiang a manh ko lai.

            Sangpichung Za Tual nupi, nuhmei Sai `Tial nih a thih taaktu a va i a nauhniang bik Nga Pa a vat tikah, phunthawh ah siapi cu a `ta Ni Khar nih a co. 

            Darkhuahchung Sang Hrin nih khenglawt fanu Fam Zing a `thit. Fam Zing nih cun a thihtaak i a naunu Chia Kil kha nupi ah aa laak `than. Cucaah man cu kan Laiphung tein tling tein a manh `thiam`thiam dih hna.

            Rev. Van Hre nih hitihin a `tial.

            Mipa pakhat nih nupi a ngeih i tefa a ngeihhlan a si zongah, tefa an ngeih hua asi zongah nupi kha a rohtaak (a thihtaak). A va a thih hnuah a roh taakmi a nupi kha a chuahpi mi a unau an si zongah, aa pehtlaimi phunkhat unau an si zongah kan sianglo tiah nupi a ngei rihlo mi nih nupi ah aa tlaih `han. Rak `thitcia mi nupi asicaah arsa an that `than tilo, man an rak manhcia mi zong kha aa rinh dih. Man a bami asiloah a herh an timi tu kha an man chap. Cuticun a u a thihsual le a nupi kha a nau nih a co. A nau kha an man chap. Cuticun a u a thihsual le a nupi kha a nau nih a co. A nau a thihsual le a nupi kha a u nih co phung kan rak ngei.

            Hi kong he pehtlaiin Pu Lai Len nih a hmuhtawngh in a tonmi hitihin a chim.

            “Surkhua i sianginn kan kai lio 1964 ah kan sianginn piata asimi Pu Hram Mang cu fanu pakhat a ngeih ah a thi. A rohmi a nupi cu a ziaza le a umtuning kha, mithi i a nupa nih an duh le an tlaihchan caah kalter an siang tilo i a naupa Duh Hnin caah an tlaih. A thar in man vialte an man. Asinain mithi nu a nu le a pa nih dawtnak in khua an ruah caah man tenau cu an dawt hna.

#Stephen Nikio `tialmi 'Lai Nunphung' timi cauk chungin kan lakmi asi.