Pathian Dawtnak

DAWTNAK

Pathian cu dawtnak asi

1.    Pathian nih minung a dawt ruangah minung zong nih Pathian kan dawt ve a herh. Zeiruangah ti ahcun, Pathian cu dawtnak a si (cf; 1Jn. 4:8). Pathian kan dawt tikah  Amah mui keng in a sermi minung zong kan dawt ve a herh (cf; Deu. 6:5; Lev. 19:18). Pathian le minung dawt ding timi nawlbia pahnih hi profet hna an phungchimnak vialte a huapdih tiang in a biapi ngai mi nawlbia a si caah Jesu nih atu le atu “nolh `than” in voi tampi a chim (cf; Mt. 22:37-40). Dawtnak cu fiangchin seh tiah “Pathian dawt ding kong ah pathum, minung dawt ding kong ah pasarih” in “Nawlbia pahra” chungah a chim (cf; Ex. 20:1-17). Dawtnak cu pahra in Baibal zapi ah a cang. Dawtnak kong cu vawlei  hramthawk in an chim lengmang i nihin ni tiang ah a dong  kho lo, zeitik zong hmanh ah a dong kho hlei lai lo (cf; 1Kor. 13:8). Baibal ca chungah, dawtnak le bia dang pawl kha Pathian nih “nolh `than” in  a chim mi tampi a um. Cu bia hna cu vancung ah Pathian nih a `tial cang mi le zungzal a hmun ding mi bia pawl an si (cf; Gen. 41:1:32; Salm 119:89).

1Jn. 4:8     “Pathian cu dawtnak a si.”

Deu. 6:5     “Pathian cu na thinlung dihlak, na nunak dihlak le na thazang dihlak in na dawt lai.”

Lev. 19:18,    “Nangmah naa dawt bantukin midang zong va daw hna.”

Mt. 22:37-40,“Jesuh nih ‘Bawipa na Pathian cu na thinlung dihlak, na nunak dihlak le na thazang dihlak in na dawt lai, na innpa kha nangmah naa dawt bantukin na dawt ve lai. Moses nawlbia le profet hna cawnpiak mi vialte cu hi nawlbia pahnih nih hin a huapdih hna’ tiah a ti.”

1Kor, 13:18,     “Dawtnak cu a dong kho lo.”

Nolh`thannak

Gen. 41:32,    “Na mang ah voihnih tiang na manhnak cu Pathian nih hi bia  hi a `tialcang i a rauh hlanah a phan lai tinak a si.”.

Salm. 119:89, “Maw Bawipa na bia cu zungzal in a hmun lai, vancung ah a um cang mi bia a si”.

Note* Hi ca cu Sayagyi John the Baptist Thawng Luai Mang (tleicia) tialmi (95) Theses chungta kan lakmi asi. A donghtiang kan thlahpiak lengmang lai.

Khrih Bupi hi ka rak huattuk lio ahhin, biatak hmuhkawh dingin kum (12) renglo mitthli he nitin catloin a thli tein Rosary thla a ka campiaktu ka dawtmi ka nupi Emily cungah siseh, Baibal ca hi ahota dah a si, zei Bupi tuahmi dah a si tiah ka halh ruangah Khrih a Bupi chungah lam aa ka hruaitu Saya John `Tial Khuai (Falam Parish) cungah siseh, lungnemte le a thli tein Thlarau thlaici a rak tuhtu Rev. Fr. John Maung Nee le Sister Hilda Khin Win Myint cung zongah lunglawmhnak tampi ka ngei fawn rih.
    Pathian rian`tuannak ah khual a tlawn pah in aa dengkhong sual i, a ngalruh a kiah ruangah nganfah tuarpah in a biapi ngai mi Doctrine aa ka chimtu, hi ca a tawlrel i a `tialtu Rev. Fr. Paul Kip Thawng; Pastoral Centre (Hakha) cung zongah lunglawmhnak tampi ka ngei.
                    
                    Dawtnak he,
        
                                    JB. Thawng
                                    B.Com (AA)

Dated 17th May, 2013